Kikii di yé Mbôgi Yéhôva, di ngwés di nkwel lôñni bôt ba bibase bipe inyu mam ma nhémle, ndi di mpôdna bé bibégés gwés lôñni bibase bipe tole ni bôt ba gwé hémle ipe inyu bégés Djob. Bibel i ñéba le bañga bikristen “yosôna i édi,” yimbne yada i adna i, i yé adna i hémle. (Efésô 4:​16; 1 Korintô 1:​10; Filipi 2:2) Hala a nkobla le di ta ndik bé ha le di nôgla ni bo inyu bilem bilam kiki bo gwéha, ñem ngôô, ni nwéhél. Biniigana gwés bi umne i ngii bañga yi i i mpémél ikété Bibel, ngi i yi i, hémle yés i yé yañga.​—Rôma 10:​2, 3.

 Bibel i nhégha i gwañna bibégés ni bôt bape kiki bo i ba i si kop nson i let, jam li li ntééñga hémle i kristen. (2 Korintô 6:​14-​17) Yésu a bi ti bé banigil bé kunde i pôdna bibégés ni bibase bipe. (Matéô 12:30; Yôhaness 14:6) Nlélém, i mbén Djob a ti Môsi i bé sôña litén li nlômbi Israel le li gwañna bañ bibégés gwap lôñni matén ma ma bé kéña bo. (Manyodi 34:11-​14) I mbus ngéda, bon ba Israel ba ba bi téñbe ni Djob, ba bi tjél mahôla ma biloñ bi bé bo ipañ inyule, ma bé le ma tinde bo i gwañna bibégés gwap ni bo.​—Esra 4:​1-3.

 Ñ. Kiki hihéga, i nwii 2023 di bi tégbaha 1 791 490 713 ma ngeñ i tééne bôt ba bibase bipe likalô. Kiki ñôma Paul, di nyoñ ngéda i nok mahoñol ni biniigana bi “jôga likeñi” li bôt ngéda di yé likalô. (1 Korintô 9:​19-​22) Mu minkwel nwés, di noode noñ maéba ma Bibel ni ñem wés wonsôna inyu ti mut wés libôk ‘njôôñ lipém’.​—1 Pétrô 3:​15.