Subong mga Saksi ni Jehova, nalipay kami nga isugid ang amon mga ginapatihan sa mga tawo nga sarisari sang relihion. Pero wala kami nagaentra sa interfaith ukon nagasimba upod sa mga tawo nga lain sing relihion. Ginapakita sang Biblia nga ang matuod nga mga Cristiano “nagaangtanay sing sibu,” kag ang panguna nga rason sa sini amo ang ila nahiusa nga pagpati. (Efeso 4:​16; 1 Corinto 1:​10; Filipos 2:2) Ini nga pagpati indi lang basta pagpakita sing mga kinaiya pareho sang gugma, kaluoy, kag pagpatawad. Kundi nabase ini sa sibu nga ihibalo sa Biblia, kay kon indi, mangin wala pulos ang amon pagtuo.​—Roma 10:​2, 3.

 Ang pagsimba upod sa mga tawo nga lain sing pagpati ginkumparar sang Biblia sa pagpagota sing sampihakan, buot silingon indi balanse ang pagpares, amo nga makahalit ini sa pagtuo sang isa ka Cristiano. (2 Corinto 6:​14-​17) Gani, indi gusto ni Jesus nga mag-entra ang iya mga disipulo sa interfaith. (Mateo 12:30; Juan 14:6) Paagi sa Kasuguan nga ginhatag sang Dios kay Moises, gindumilian man ang mga Israelinhon nga magsimba upod sa palibot nga mga pungsod. (Exodo 34:11-​14) Wala man ginbaton sang matutom nga mga Israelinhon ang tanyag sa ila nga bulig nga magaresulta sa pagpakig-alyansa sa iban nga pungsod nga nagasimba sa butig nga mga dios.​—Esdras 4:​1-3.

 Huo. Sang 2023, naggamit kami sing 1,791,490,713 ka oras sa pagpakig-istorya sa mga tawo nga lain sing pagpati. Pareho kay apostol Pablo, interesado kami nga mahibaluan ang panghunahuna kag mga pagpati sang “madamo” nga tawo sa amon ministeryo. (1 Corinto 9:​19-​22) Kon nagaistorya kami sa mga tawo, ginatinguhaan namon nga sundon ang laygay sang Biblia nga magpakita sing “tudok nga pagtahod” sa ila.​—1 Pedro 3:​15.