Pathian Nih Min Pa Zeizat Dah A Ngeih?

AWNG

Baibal chimmi

Pathian nih pumpak min pakhat lawng a ngei. Mah cu Hebru ca in יהוה tiah ṭial a si i Hakha in “Jehovah” tiah an leh tawn. a Pathian nih a profet Isaiah hmangin hitin a ti: “Keimah cu Jehovah ka si. Cucu ka min a si.” (Isaiah 42:8, BAIBAL CATHIANG) Hlanlio kut in ṭialmi Baibal ah mah min cu voi 7,000 hrawng hmuh khawh a si i Pathian caah hmanmi a dang biafang nakin le midang min nakin tam deuh hmuh khawh a si. b

Jehovah nih min dang tah a ngei maw?

Baibal nih Pathian i pumpak min kha pakhat lawng a langhter nain upatnak min le a sining a langhtermi min tampi a hman. A tanglei i langhtermi upatnak min hna nih Jehovah i a sining le a thilti khawhnak hna kha an langhter.

Upatnak min	Cherhchanmi	A sullam
Allah	(A um lo)	Arabic holh in a rami “Allah” timi biafang cu pumpak min si loin “Pathian” ti sullam a ngeimi upatnak min a si. Arabic le a dang holh in lehmi Baibal hna ah Pathian caah “Allah” timi biafang kha an hman.
Lianngan Bik	Genesis 17:1	Ahohmanh nih tluk khawh lomi ṭhawnnak a ngei. “Lianngan Bik Pathian” ti sullam a ngeimi Hebru biafang ʼEl Shad·daiʹ kha Baibal ah voi sarih hmuh khawh a si.
Alfa le Omega	Biathlam 1:8; 21:6; 22:13	“Hmasa bik le hmanung bik” asiloah “hramthawknak le a donghnak” timi sullam cu Jehovah hlanah Lianngan Bik Pathian ahohmanh an um lo i amah hnu zongah ahohmanh an um lai lo tinak a si. (Isaiah 43:10) Alfa le omega cu Greek cafang i a hramthawknak le a donghnak a si.
Zungzal in a nungmi	Daniel 7:9, 13, 22	Pathian cu hramthawknak a ngei lo; ahohmanh asiloah zeithil hmanh an um hlanin a um cangmi a si.—Salm 90:2.
Pa	Matthai 6:9	Nunnak petu a si.
Pathian	Genesis 1:1	Biak awkah aa tlakmi, a ṭhawngmi a si. ʼElo·himʹ timi Hebru biafang cu a tammi caah hmanmi a si i Jehovah lianngannak, sunparnak le a ṭha bik a sinak kha a langhter.
Pathian hna Pathian	Deuteronomi 10:17	Mi cheukhat nih an biakmi “santlai lomi pathian hna” he i ralkah in Jehovah cu a sang bikmi Pathian a si.—Isaiah 2:8, Vawlei Thar Lehnak Baibal.
A Ṭha Bik Cawnpiaktu	Isaiah 30:20, 21	A ṭha bikmi cawnpiaknak le lamhruainak petu a si.—Isaiah 48:17, 18.
Sertu	Isaiah 40:28; Salm 149:2	Amah nih zeizong vialte kha a ser hna.—Biathlam 4:11.
Aa Nuammi Pathian	1 Timote 1:11, Vawlei Thar Lehnak Baibal	Aa nuammi le lung aa lawmmi Pathian a si.—Salm 104:31.
Thlacamnak a ngaitu	Salm 65:1	Zumhnak he a sinah thla a cammi pumpak pakhat cio i an thlacamnak kha a ngaih.
Keimah Cu Keimah Ka Si Ko	Exodus 3:14	Aa tinhnak tlinter awkah a herhmi zeipoah a hung si kho. Mah bia kha “Ka Duhmi Zeipoah Ka Hung Si Lai” asiloah “Siter Ka Duhmi Ningin Ka Hung Si Lai” ti zongin an leh. (J. B. Rotherham lehmi The Emphasised Bible; Vawlei Thar Lehnak Baibal) Mah cu a changtu cacaang ah aa telmi Pathian i pumpak min Jehovah a sullam a si.—Exodus 3:15, BAIBAL CATHIANG.
Nahchuak	Exodus 34:14	Amah lawng biak a duhmi a si. Mah bia kha “a dang pathian biak a duh lomi” tiin le “amah lawng biak dingin a halmi” ti zongin an leh.—God’s Word Bible; Vawlei Thar Lehnak Baibal.
Zungzal siangpahrang	1 Timote 1:17	A uknak cu hramthawknak asiloah donghnak a ngei lo.
Bawipa	Salm 135:5	A ngeitu asiloah uktu a si; Hebru biafang ʼA·dhohnʹ le ʼAdho·nimʹ a si.
Cungnung Bik	Salm 47:2	A sang bikmi dirhmun a ngeimi a si.
A Thiang Bikmi	Phungthlukbia 9:10	Aho nak hmanhin a thiang (ziazalei ah a thiangmi) deuhmi a si.
Um Sertu	Isaiah 64:8	Um Sertu nih tlak cungah nawl a ngeih bantukin Pathian cu pakhat cio le miphun vialte hna cungah nawl a ngeimi a si.—Rom 9:20, 21.
Tlanhnak Man A Petu	Isaiah 41:14; King James Version	Tlanhnak man timi cu thil pakhatkhat cawk ṭhan awkah asiloah thil pakhatkhat i a man caah pekmi kha a si. Sualnak le thihnak in kan luat nakhnga Pathian nih Jesuh Khrih tlanhnak man kha a pek.—Johan 3:16.
Lungpi	Salm 18:2, 46	Pathian cu kan dornak le khamhnak hrampi a si.
Khamhtu	Isaiah 45:21	Harnak asiloah rawhnak in a kan khamh.
Tuukhal	Salm 23:1	Amah a biami kha a zohkhenh hna.

Hebru Baibal chung i a ummi hmun min

Baibal i a ummi hmun cheukhat hna min ah Pathian i pumpak min aa tel, asinain mah cu Pathian caah airolh in hmanmi min a si lo.

Hmun min	Cherhchanmi	A sullam
Jehovah-jireh	Genesis 22:13, 14	“Jehovah Nih A Khan Ko.”
Jehovah-nissi	Exodus 17:15	“Jehovah Cu Ka Hmelchunhnak Puanzar A Si.” Jehovah cu a miphun a huppheng khotu le a bawm khotu Pathian a si.—Exodus 17:13-16.
Jehovah-shalom	Biaceihtu 6:23, 24	“Jehovah Cu Daihnak A Si.”
Jehovah-shammah	Ezekiel 48:35	“Jehovah cu khika ah a um.”

Pathian min hngalh awk le hman awk a sinak a ruang

Pathian nih Baibal ah a min kha voi thong tampi a telhnak thawngin pumpak a min Jehovah kha biapi ah a chiah.—Malakhi 1:11.
Pathian Fapa Jesuh nih Pathian min a biapitnak kha atu le atu a rak langhter. Tahchunhnak ah, Jehovah sinah hitin thla a cam: “Na min thiang cu upat si ko seh.”—Matthai 6:9; Johan 17:6.
Pathian min a hung hngal i a hmangmi cu Jehovah he pehtlaihnak ṭha ngeih awkah ke an hlanmi a si. (Salm 9:10; Malakhi 3:16) Cu bantuk pehtlaihnak nih mah Pathian biakam in ṭhatnak a hmuhter hna: “A ka dawmi cu ka khamh hna lai i [ka min] a ka hngalmi cu ka huhphenh hna lai.”—Salm 91:14.
Baibal chimmi: “Vancung ah siseh, vawleicung ah siseh pathian timi cu a um zong an um ko lai, cun pathian timi hna hi le bawipa timi hna hi tampi zong an si ko lai.” (1 Korin 8:5, 6) Asinain a hmaanmi Pathian i a min cu Jehovah a si ti cu a fiang ko.—Salm 83:18, Vawlei Thar Lehnak Baibal.

a Hebru mi Baibal lei mifim cheukhat nih Pathian min kha “Yahweh” tiin hman an duh.

b Baibal ah Pathian min a tawinak “Jah” timi biafang kha voi 50 hrawng hmuh khawh a si, mah ah “Pathian cu thangṭhat ko u” ti sullam a ngeimi “Hallelujah,” asiloah “Alleluia” timi biafang hna an i tel.—Biathlam 19:1; American Standard Version; King James Version.

Mah Kong Hna Zong Hi Na Duh Khawh Men

BAIBAL BIAHALNAK A PHI

https://cms-imgp.jw-cdn.org/img/p/502017121/univ/art/502017121_univ_sqr_xl.jpg

ijwbq capar 125

Jehovah Tehte Hna

Pathian Nih Min Pa Zeizat Dah A Ngeih?

Baibal chimmi

Jehovah nih min dang tah a ngei maw?

Hebru Baibal chung i a ummi hmun min

Pathian min hngalh awk le hman awk a sinak a ruang

Related Topics

Mah Kong Hna Zong Hi Na Duh Khawh Men

Jehovah Cu Ahodah A Si?

Pathian Cu Min A Ngei Maw?

Rak Len Dingin Halnak