Nzambi Nkumbu Kwa Kena Zau?

WINIKINA MU

Mvutu za Bibila

Nzambi nkumbu imosi kaka kena yau. Muna Kiyibere basadilanga e sono יהוה muna yo soneka, owau muna Kikongo tusadilanga e nkumbu “Yave.” a Muna Yesaya wa ngunza, Nzambi wavova vo: “Mono i Yave. Eyayi i nkumbu ame.” (Yesaya 42:8) E nkumbu yayi yasonama nkumbu 7.000 muna ngungu zankulu za Bibila. E nkumbu yayi i yau isundidi o yikwa muna Bibila vioka mazina mandi yovo nkumbu a konso muntu. b

Yave nkumbu zankaka kena zau?

Muna Bibila, Nzambi nkumbu imosi kaka kena yau, kansi ovuidi mazina mayingi. E babu kilende kisonganga una konso zina disongelanga e fu ye kiwuntu kia Yave.

Zina	Sono	Nsasa
Alá	(Mwankatu)	Mu nding’a Arabe yatuka. Ke nkumbu a Nzambi ko, kansi zina dina ye nsasa vo “Nzambi.” E nsekola za Bibila muna nding’a Arabe ye ndinga zankaka zisadilanga mvovo “Alá” vana fulu kia Nzambi.
Mpungungolo	Tuku 17:1	Una yo nkuma wakondwa tezo. O mvovo a Kiyibere ʼEl Shad·daiʹ, i sia vo, “Nzambi a Mpungungolo,” yasonama nkumbu nsambwadi muna Bibila.
Alfa ye Omega	Lusengomono 1:8; 21:6; 22:13	“Wantete ye wansuka” yovo “lubantiku ye mbaninu,” disongele vo ke vena Nzambi ko osundidi Yave muna nkuma ye kesinga kala ko. (Yesaya 43:10) Alfa ye Omega i sono kiantete ye kiansuka muna alfabeto ya Kingerekia.
Munkulu-nkulu a Lumbu	Daniele 7:9, 13, 22	Kena yo lubantiku ko; ozinganga yamu mvu ke mvu, una ke vakedi konso muntu yovo konso lekwa ko.—Nkunga 90:2.
Mvangi	Yesaya 40:28	Wavanga lekwa yawonso.
Se	Matai 6:9	Mvani a moyo.
Nzambi	Tuku 1:1	Konso lekwa kisambilwanga kilenda yikilwa vo nzambi. O mvovo wau una mpe ye nsasa vo “nkwa nkuma.” O mvovo wa Kiyibere ʼElo·himʹ usadilwanga muna plural mu songa o zitu yo nene wa Yave.
Nzambi a zinzambi	Daniele 2:47	Disongele vo waswaswana ye “fwafwala ya nzambi” zisambilwanga kwa wantu ankaka.—Yesaya 2:8.
Nlongi Anene	Yesaya 30:20, 21	Ovananga malongi ye tuludiku twamfunu.—Yesaya 48:17, 18.
Mvangi Anene	Nkunga 149:2	Wavanga lekwa yawonso.—Lusengomono 4:11.
Nzambi a Kiese	1 Timoteo 1:11	Osonganga kiese yo luyangalalu.—Nkunga 104:31.
Owanga e sambu	Nkunga 65:2	Owanga e sambu yawonso ina wantu belombanga muna lukwikilu.
Ikituka Konso una Nzolele Kituka	Luvaiku 3:14	Okitukanga konso una kazolele muna lungisa e kani diandi. Ediadi disadisanga mu bakula e nsas’a nkumbu a Yave, eyi iyikwanga muna tini kilende.—Luvaiku 3:15.
Nsongo	Luvaiku 34:14; Mvovo vana yand’a lukaya.	Nzambi ke tambulwilanga mbanda ko muna nsambila. O mvovo wau usekolwanga mpe vo Yave “ovavanga vo wantu basambila kaka yandi.”—Bibila—Nsekola ya Nz’ampa.
Ntinu a mvu ya mvu	Lusengomono 15:3	Luyalu lwandi ke luna ye lubantiku ko ngatu mfoko.
Mfumu	Nkunga 135:5	Mvue; muna Kiyibere, A·dhohnʹ yo ʼAdho·nimʹ.
Mfumu Sabaoti	Roma 9:29, Masonukwa Manlongo	Mfidi a buka kiampwena kia ambasi. E zina “Mfumu Sabaoti,” dilenda mpe sekolwa vo “Yave a vu.”—Roma 9:29. Bibila—Nsekola ya Nz’ampa.
Mpungu-nene	Nkunga 47:2	Yandi ovuidi fulu kilutidi tundalala
Mvauki	Ngana 9:10	Osundidi vauka yo velela lutila wantu awonso.
Nwumbi	Yesaya 64:8	Ovuidi wisa kuna kwa wantu ye zula wauna nwumbi kenena ye wisa muna tûma.—Roma 9:20, 21.
Nkûdi	Yesaya 41:14	Muna kimenga kia lukûlu kia Yesu, Nzambi wakûla wantu muna sumu yo lufwa.—Yoane 3:16.
Tadi	Nkunga 18:2, 46	Tininu diasikila ye tuku dia luvuluzu.
Mvuluzi	Yesaya 45:21	Ovuluzanga muna vonza yovo lufwasu.
Mvungudi	Nkunga 23:1	Olunga-lunganga asambidi andi.
Mfumu	Tuku 15:2	Olutidi muna wisa; muna Kiyibere ʼAdho·naiʹ.
Mpungu	Daniele 7:18, 27	Osundidi muna kimfumu.

Nkumbu za fulu ina muna Sono ya Kiyibere

E nkumbu za fulu yankaka ina muna Bibila inatanga nkumbu a Nzambi, kansi e zazi ke nkumbu za Nzambi ko.

Nkumbu a fulu	Sono	Nsasa
Yave-yire	Tuku 22:13, 14	“Yave Ovana.”
Yave-nisi	Luvaiku 17:15	“Yave i Lunzi Diame dia Sinsu” yovo “Baniele kiami.” (Masonukwa Manlongo) Nkangu a Nzambi balenda bunda vuvu kwa yandi muna vua lutaninu yo lusadisu.—Luvaiku 17:13-16.
Yave-salome	Afundisi 6:23, 24	“Yave i Luvuvamu.”

Ekuma tufwete zayila yo sadila nkumbu a Nzambi?

Nzambi ozeye wo vo e nkumbu andi, Yave, mfunu kikilu ina. Muna kuma kiaki, wasonekesa yo muna Bibila mu fulu yayingi.—Malaki 1:11.
Yesu wa Mwan’a Nzambi, nkumbu miayingi kayika o mfunu a nkumbu a Nzambi. Muna bonga e nona, wasamba kwa Yave vo: “Yambula e nkumbu aku yazitiswa.”—Matai 6:9; Yoane 17:6.
Awana bezayanga yo sadila nkumbu a Nzambi, bevanganga diambu diantete divavuanga mu kala nkundi a Yave. (Nkunga 9:10; Malaki 3:16) E kikundi kiaki kikubasadisanga mu vua nluta muna nsilu a Nzambi uvovanga vo: “Wau vo zola kekunzolanga, ikumvuluza. Ikuntanina kadi ozeye nkumbu ame.”—Nkunga 91:14.
Bibila kivovanga vo: “Vena ye awana beyikilwanga vo nzambi, kana kuna zulu yovo ova ntoto, wau vo ‘nzambi’ zayingi zina, e ‘mfumu’ mpe zayingi zina.” (1 Korinto 8:5, 6) Kansi, Bibila kiyikilanga Nzambi mosi kaka aludi muna nkumbu andi, i sia vo, Yave.—Nkunga 83:18.

a Awana belongokanga Kiyibere kiasadilwa muna Bibila bamona vo diambote mu sekola e nkumbu a Nzambi vo “Yahweh.”

b E “Ya” i mpila yankufi yayikila e nkumbu a Nzambi ye yasonama tezo kia nkumbu 50 muna Bibila kumosi ye mvovo “Aleluya!” una ye nsasa vo “Nukembelela YA!”—Lusengomono 19:1. Almeida, revista e atualizada; Pontifício Instituto Bíblico de Roma (Edições Paulinas), nota.