Uno Kalunga Atwama naMajina Angahi?

PUTUKA KWIMBISA

Vyuma Yakumbulula Mbimbiliya

Kalunga atwama nalijina limwe kaha. MuchiHepeleu valisoneka ngwavo יהוה kaha muLuvale valisoneka ngwavo “Yehova.” * Kalunga ahanjikile kuhichila muli kapolofweto Isaya ngwenyi: “Ami yami Yehova. Eli likiko lijina lyami.” (Isaya 42:8) Eli lijina lyasoloka mapapa 7,000 mujimanyusikilipiti jakushikulu jaMbimbiliya kuhambakana kala vulukiso yeka yaKalunga chipwe kala lijina lyakwamba ngwavo Kalunga. *

Uno Yehova atwama namajina akwavo tahi?

Numba tuhu Mbimbiliya yavuluka ngwayo Kalunga atwama nalijina limwe kaha, oloze akwechi nawa jivulukiso jajivulu. Jivulukiso jimwe jili mwishi jasolola omwo apwa Yehova navilinga vyenyi.

Vulukiso	Chisoneka	Ulumbunwiso
Wangolo Josena	Kuputuka 17:1	Apwa wangolo chikuma. Lizu lyamuchiHepeleu valumuna ngwavo ʼEl Shad·daiʹ, kulumbununa “Kalunga Wangolo Josena,” lyasoloka mapapa 7 muMbimbiliya.
Alafwa naOmenga	Kusoloka 1:8; 21:6; 22:13	Mazu akwamba ngwavo, “yami wakulivanga yami wakukuminyina,” chipwe “yami maputukilo yami makumishilo,” alumbununa nge kunyima kakwapwile Kalunga Wangolo josena shimbu kanda Yehovako, kaha kulutwe nawa kakweshi kukapwa wekako. (Isaya 43:10) Alafwa yapwa sopelo yatete, kaha Omenga yapwa sopelo yamakumishilo kweseka nomu valikavangijila vasopelo vamuchiHelase.
Napungako Kufuma Kushikulu	Ndanyele 7:9, 13, 22	Kalunga katwama namaputukiloko. Kaha nawa napungako myaka yosena shimbu kanda atenge vyuma vyosena.—Samu 90:2.
Tengi	Isaya 40:28	Ikiye atengele vyuma vyosena.
Setu	Mateu 6:9	Ikiye Atuhana Kuyoya
Kalunga	Kuputuka 1:1	Apwa Kalunga wangolo uze tweji kulemesanga. Lizu lyamuchiHepeleu valumuna ngwavo ʼElo·himʹ lyasolola nge Yehova atwama nawata, wamulemu, kaha nawa wakulitulaho.
Kalunga katulunga	Lushimbi lwamuchivali 10:17	Kalunga wangolo josena alihandununa ‘natulunga vamokomoko’ vaze veji kulemesanga vatu vamwe.—Isaya 2:8.
Muka-kunangula Wamunene	Isaya 30:20, 21	Eji kutunangulanga nakututwaminyina.—Isaya 48:17, 18.
Tengi Wamunene	Samu 149:2	Atengele vyuma vyosena.—Kusoloka 4:11.
Kalunga Wakuwahilila	WaChimoteu 1, 1:11	Apwa Kalunga wakuwahilila.—Samu 104:31.
Muka-Kwivwilila kuKulomba	Samu 65:2	Eji kwivwililanga kukulomba chavaze vamufwelela.
Nangupwa Mweshomwo Ngunasakula Kupwa	Kulovoka 3:14	Eji kulilingisanga kupwa mweshomwo nasake mangana atesemo vyuma ajina. Ou ulumbunwiso wasolola omu lyalumbununa lijina lyaYehova kweseka navesi yinakavangizaho.—Kulovoka 3:15.
Kalunga uze asaka vatu valihane namichima yavo yosena	Kulovoka 34:14	Kechelela vatu valinge vyuma vyavipi mukulemesa chamuchanoko.
Mwangana wahaya myaka yosena	Kusoloka 15:3	Chiyulo chenyi kachatwama namaputukilo chipwe makumishiloko.
Mwata	Samu 135:5	Lizu kana lyalumbununa mutu kupwa Mwenya vyuma, kaha muchiHepeleu valivuluka ngwavo ʼA·dhohnʹ ʼnaAdho·nimʹ.
Wakulitulaho Chikuma	Samu 47:2	Ikiye kaha atwama nachihela chachinene.
Wajila Chikuma	Vishimo 9:10	Apwa Wajila chikuma (utoma) kuhambakana vatu vosena.
Tengi Yetu	Isaya 64:8	Atwama nawata havatu vakumafuchi osena, ngana muze muka-kutenga unonga atwama nangolo haunonga.—Wavaka-Loma 9:20, 21.
Muka-kutusokola	Isaya 41:14	Eji kusokola nakulanda vatu kushili nakukufwa kuhichila mundando yakusokola yize ahanyine Mwanenyi Yesu Kulishitu.—Yowano 3:16.
Lilolwa	Samu 18:2, 46	Apwa uchinyino wetu wakukola kaha nawa muka-kutupulula.
Mulwilo	Isaya 45:21	Eji kutulwilanga kuponde yosena.
Kafunga	Samu 23:1	Eji kuzakamanga vaka-kumulemesa.
Mwata Wakulitulaho	Kuputuka 15:2	Atwama nangolo jakulipwila, kulumbununa ʼAdho·naiʹ muchiHepeleu.
Wamulemu Chikuma	Ndanyele 7:18, 27	Apwa wakulitulaho chikuma havyuma vyosena.

Majina avihela vavuluka muVisoneka vyachiHepeleu

Majina avihela vimwe muMbimbiliya vyatwama nalijina lyaKalunga, oloze kawapwa majina aKalungako.

Lijina lyachihela	Chisoneka	Ulumbunwiso
Yehova-yile	Kuputuka 22:13, 14	“Yehova Mwahana.”
Yehova-nyishi	Kulovoka 17:15	“Yehova Ikiye Chitondo Chami chaChinjikizo.” Yehova apwa hiKalunga uze vapendamina kuvatu jenyi mangana avakinge nakuvakafwa.—Kulovoka 17:13-16.
Yehova-shalome	Vaka-kuyula 6:23, 24	“Yehova Ikiye Kuunda.”

Mwomwo ika twatela kutachikijila lijina lyaKalunga nakulizachisa?

Kalunga atela kutachikiza ngwenyi lijina lyenyi Yehova lyapwa lyalilemu, mwomwo valizachisa muMbimbiliya mapapa kakavulu.—Malaki 1:11.
Yesu uze apwa MwanaKalunga ashindakanyinenga ovyo lijina lyaKalunga lyapwila lyalilemu. Chakutalilaho, alombele kuli Yehova ngwenyi: “Lijina lyove lipwenga lyajila.”—Mateu 6:9; Yowano 17:6.
Vosena vaze veji kutachikizanga lijina Kalunga nakulizachisa veji kutunganga usoko wamwaza naYehova. (Samu 9:10; Malaki 3:16) Usoko kana naukavalingisa mangana vakanganyale kuvyuma vize Kalunga atushika ngwenyi: “Hakuwana nge anguzanga, ngocho nangumupululula. Nangumukinga mwomwo atachikiza lijina lyami.”—Samu 91:14.
Mbimbiliya yamba ngwayo: “Kuvali vaze vavuluka ngwavo tulunga, chipwe mwilu chipwe hamavu, nge muze vene kwatwama ‘tulunga’ vavavulu ‘navamyata’ vavavulu” (Wavaka-Kolinde 1, 8:5, 6) Echi chasolola hatoma nge Kalunga wamuchano ikiye Yehova.—Samu 83:18.

^ Vatu vamwe vaze valinangula chikuma Mbimbiliya yachiHepeleu navakiko vetavila ngwavo lijina lyaKalunga lyapwa “Yahweh.”

^ Lijina lyaKalunga lyamukavatu “Ya” lyasoloka mapapa 50 muMbimbiliya kuhakilako nalizu “Haleluya!” lize lyalumbununa “Mwalisenunga Ya.”—Kusoloka 19:1.