Maganoho Meu Suꞌmi Noosi?

FANI

Qullaawu Maxaafi mayyaanno?

Maganoho mittu umisi suꞌmi noosi. Konne suꞌma Ibiraawootu Afiinni יהוה yine borreessinanni; Sidaamu Afiinni kayinni duucha woyite “Yihowa” yine woshshinanni. a Maganu masaalaanchisi Isayaasi widoonni togo yiino: “Ani Yihowaati. Suꞌmiꞌyano konneeti.” (Isayaasi 42:8, Haaro Alame Tiro) Kuni suꞌmi angatenni galchinoonnite hundite Qullaawu Maxaafi borro giddo 7,000 meddi yaanno bayicho no; Qullaawu Maxaafi giddo kageeshshi bayicho noohu wolu suꞌmi horo dino. b

Yihowara wolu suꞌmi noosi?

Qullaawu Maxaafi Maganoho umisihu mittu suꞌmi calla noosita kulannoha ikkirono, batinye suusu (maaragete) suꞌmuwa noositano kulanno. Aante nooti mitte mittenti suusu suꞌmuwa Yihowa akata woy ayimma huwatate kaaꞌlitannonke gara wodanchi.

Suusu Suꞌma	Qummeeshsha	Tirosi
Allahi	(Dino)	“Allahi” yaanno qaali Arawete qaaleeti; kuni suusu suꞌmi “Magano” yaate. Arawetenna wolu afiinni tirroonnihu Qullaawu Maxaafi “Magano” yaanno qaale tirate “Allahi” yaanno.
Woꞌmankare Dandaannoha	Kalaqama 17:1	Taalle nookki wolqa noosi yaate. “Woꞌmanka Dandaanno Magano” yine tirroonnihu Elshadayi yaannohu Ibiraawootu qaali Qullaawu Maxaafi giddo lamala bayicho no.
Alfanna Omeega	Yohaannisi Ajuuja 1:8; 21:6; 22:13	“Umihunna goofimarchunnihu” woy “Albihunna Gedensihu” yaate; hatto yaa Yihowara albaanni Woꞌmanka Dandaannohu wolu Magani dino, isi gedensaannino togoo Magani dino yaate. (Isayaasi 43:10) Alfanna omeega Giriikete fidalla giddo umitenna jeefonnite.
Hegere Hegerera Heeꞌrannohu	Daanieeli 7:9, 13, 22	Hanafo dinosi; wolu ayino woy mayino heeꞌrara albaanni gawalo nookki diro heeꞌrino.—Faarso 90:2.
Kalaqaancho	Isayaasi 40:28	Baalankare kalaqinohu isooti.—Yohaannisi Ajuuja 4:11.
Anna	Maatewoosi 6:9	Heeshsho aannoho.
Magano	Kalaqama 1:1	Magansiꞌnanniho; Jawaho. Elohiimi yaannohu Ibiraawootu qaali lowo kiiro kulannoho; tini Yihowa lowimma, ayirrinyenna gaacheenasi leellishshannote.
Magannate Magano	Marro 10:17	Yihowa, mitootu magansidhannote tidhitinokki maganna gede ikkikkinni, woꞌmunkura aliidi Maganooti.—Isayaasi 2:8.
Bayira Rosiisaancho	Isayaasi 30:20, 21	Kaaꞌlanno rosonna biddishsha aannoho.—Isayaasi 48:17, 18.
Hagiirraamo Magano	1 Ximootewoosi 1:11, Haaro Alame Tiro	Hagiidhannohonna tashshi yaannosiho.—Faarso 104:31.
Huuccatto Macciishshanno Magano	Faarso 65:2, 3	Ammanatenni huucciꞌnanni huuccatto baalanta isi umisi macciishshanno.
Ani Aneeti	Fulo 3:14	Hedosi wonshate ikka hasiissannosire baalankare ikkanno. Tenne yaatto “Ikka Hagiirsiissannoere Baala Ikkeemmo” woy “Ikka Hasiꞌreemmore Ikkeemmo” yineno tirroonni. (J. B. Roozerhaami qixxeessinoha Ze Emfasayizidi Bayibili; Haaro Alame Tiro) Tini yaatto, aante noo kiirora kulloonnihu Yihowa yinanni suꞌmi afiꞌrino tiro huwatate kaaꞌlitannonke.—Fulo 3:15.
Hinaasaancho	Fulo 34:14	Iso calla magansiꞌnasira hasiꞌranno Maganooti. Konne qaale “hettisantannore cincannokkiho” hattono “iso calla magansiꞌnasira hasiꞌrannoha ikkasinni egennaminoho” yineno tirroonni.—Goodis Wordi Bayibili; Haaro Alame Tiro.
Hegere Moote	Yohaannisi Ajuuja 15:3, Haaro Alame Tiro	Gashshootisira hanafono gumulono dino.
Mooticha	Faarso 136:3	Annimma noosiho woy aliidiho; Ibiraawootu afiinni Adoonayi hattono Adoniyimi yinanni.
Olantote Mootichi	Isayaasi 1:9; Roomu Sokka 9:29	Lowota sokkaasinete olanto hajajannoho. Konne qaale “Olantote Mootichi Yihowa” hattono “gordu olanto Mooticha” yineno tirroonni.—Roomu Sokka 9:29, Haaro Alame Tiro; NET Bayibili, lekkaalliidi qaagiishsha.
Woꞌmunkura Aliidihu	Faarso 47:2	Woꞌmunkura aliidi roorre noosiho.
Qullaawa Magano	Lawishsha 9:10	Wolu baalunkunni roore (amanyootunni xalalahonna keeraanchoho) woy qullaawaho.
Seekkannoho (Dora Gannannihu Gede)	Isayaasi 64:8	Dora gananno manchira doru aana silxaane noosinte gede, Yihowarano mittu mittunku manchi aanano ikko dagate aana silxaane noosi.—Roomu Sokka 9:20, 21.
Wode Gatisannoho	Isayaasi 41:14	Yesuusi Kiristoosite wodote kakkalo widoonni mannu ooso cubbunninna reyotenni wodanno woy gatisanno.—Yohaannisi 3:16.
Goꞌlinanni Kincho	Faarso 18:2, 46	Golonkeetinna gatisannonke Maganooti.
Gatisaancho	Isayaasi 45:21	Danotenni woy baotenni gatisanno.
Allaalaancho	Faarso 23:1	Magansidhannosire towaaxxannoho.
Woꞌmunkura Aliidi Mooticha	Kalaqama 15:2	Woꞌmunkura aliidi roorre noosiho; Ibiraawootu afiinni Adoonayi yinanni.
Woꞌmunkura Aliidi Magano	Daanieeli 7:18, 27	Woꞌmunkura aliidiho.

Ibiraawootu Afiite Qullaawa Borro Giddo Kulloonnita Bayichu Suꞌmuwa

Qullaawu Maxaafi giddo kulloonniti mite bayichu suꞌmuwa giddonsaanni Maganu suꞌma amaddinote; hatto yaa kayinni kuri Maganu suꞌmuwaati yaa diꞌꞌikkino.

Bayichu Suꞌma	Qummeeshsha	Tirosi
Yaahiwe Yirie	Kalaqama 22:13, 14	“Yihowa Qixxeessanno”
Yihowa Niisii	Fulo 17:15	Yihowa “Malaateꞌyaati.” Yihowa, soqqamaasinesi agarooshshenna kaaꞌlo afiꞌrate dukkissanno Maganooti.—Fulo 17:13-16.
Yihowa Shaaloomi	Ejjeetto 6:23, 24	“Yihowa Keereho”
Yihowa Shaamahi	Hiziqeeli 48:35	“Yihowa Hakkiicho No”

Maganu suꞌma afanna woshsha hasiissanno. Mayira?

Maganu, mannu Yihowa yinanni suꞌmasi afara hasiꞌranno. Suꞌmisi Qullaawu Maxaafi giddo lowo kume ikkanno bayicho heeꞌranno gede assasi tenne leellishshanno.—Milkiyaasi 1:11.
Maganu Beetti Yesuusi, Maganu suꞌmi lowore ikkinota duucha hige rosiisino. Lawishshaho isi “Suꞌmikki qullaawa ikko” yee Yihowa huucciꞌrino.—Maatewoosi 6:9; Yohaannisi 17:6.
Yihowa ledo jaalooma kalaqiꞌrate assa hasiissannonkehu umi coyi, Maganu suꞌma afatenna woshshate. (Faarso 9:10; Milkiyaasi 3:16) Maganu ledo togoo jaaloomi heeꞌrinkero, isi uyinoti aante noo hexxo woꞌmitannonke: “Isi ane baxanno daafira agareemmosi; suꞌmaꞌya ayirrisanno [“afino,” Haaro Alame Tiro] daafira goleemmosi.”—Faarso 91:14.
Qullaawu Maxaafi togo yaanno: “Lowoti kaphu magannanna mootoolla noota egenninoommo. Gordohonna baattote “Magannate” yinanni maganna [no].” (1 Qorontoosi 8:5, 6) Ikkirono, Qullaawu Maxaafi mitto halaalaancho Magano, Yihowa yinanni suꞌmisinni bade kulanno.—Faarso 83:18.

a Mite Ibiraawootu Afii fullahaano Maganu suꞌma “Yahiwe” yaa woyyitanno yitanno.

b Maganu suꞌma haransine woshshinanni woyite “Ya” woy “Yahi” yinanni. Kuni haranchu suꞌmi Qullaawu Maxaafi giddo mito 50 ikkanno bayicho no; lawishshaho kuni suꞌmi “Halleeluya” yaanno qaali giddo no; hatto yaa “Yahi guwisse” yaate.—Yohaannisi Ajuuja 19:1.