Nna Jesus No Bɔbea Tse Dɛn?
Mbuae a Bible no dze ma
Obiara nnyim Jesus no bɔbea ankasa, osiandɛ Bible no nnka no bɔbea ho asɛm. Iyi ma yehu dɛ Jesus no bɔbea ho nnhia. Naaso, Bible no ma yehu biribi kakra fa mbrɛ nna no bɔbea si tse ho.
No bɔbea: Nna Jesus yɛ Jewnyi, ntsi nna ɔrennyɛ nwanwa dɛ ɔnye ne maame bedzi nsɛ wɔ kasa na ndzeyɛɛ mu. (Hebrewfo 7:14) Orunntum mmba no dɛ nna Jesus yɛ soronko koraa fi Jewfo nkaa no ho. Da bi, Jesus fii Galilee kɔr Jerusalem a obiara ennhu no. (John 7:10, 11) Sɛ nna Jesus nye n’esuafo a nna wɔbɛn no papaapa no gyina fakor a, nna ɔnnda famu dɛ amonmu hɔ ara obi bohu no. Kaa dɛ aber bi a nna nyimpadodow bi a wokitsa nkrantsee nye mpɔtsibaa rebɛkyer Jesus no, Judas Iscariot na ɔboaa hɔn maa wohun no.—Matthew 26:47-49.
Ne tsinhwi ne tsentsen: Orunntum mmba no dɛ nna Jesus ne tsinhwi yɛ tsentsen, osiandɛ Bible no ka dɛ “sɛ ɔbarimba sie tsir kusuww a, ɔyɛ ahorohoraa ma no.”—1 Corinthfo 11:14.
N’abɔdwesa: Nna Jesus wɔ abɔdwesa. Nna otsia Jewfo mbra dɛ mbarimba ‘bɛsɛɛ hɔn abɔdwesa ano’ anaa wobotwitwa hɔn abɔdwesa. Jesus dzii dɛm mbra no do. (Leviticus 19:27; Galatiafo 4:4) Afei so, aber a nna Bible no rehyɛ amandze a Jesus bohu ho nkɔm no, ɔkaa n’abɔdwesa ho asɛm.—Isaiah 50:6.
Ne nyimpadua: Nna biribiara kyerɛ dɛ Jesus wɔ ahoɔdzen. Aber a nna ɔreyɛ n’asɛnka edwuma no, otutuu akwan pii. (Matthew 9:35) Jesus kɔr asɔrfi a nna Jerusalem no mu mpɛn ebien kobutubutuuw sikasesafo no hɔn apon. No mu kor mpo dze, ɔdze mpire paam mbowa a nna wɔwɔ asɔrfi hɔ no. Ɔyɛɛ iyi dze tseew asɔrfi no ho. (Luke 19:45, 46; John 2:14, 15) Nwoma bi ka dɛ: “Nsɛmpa ahorow nyina a wɔkyerɛɛw faa [Jesus] ho no ma yehu dɛ nna ɔwɔ ahoɔdzen papaapa.” (McClintock and Strong’s Cyclopedia, Ɔfa IV, krataafa 884)
N’enyim yɛbea: Ekyingye biara nnyi ho dɛ nna Jesus n’enyim yɛbea ma afofor hu dɛ ɔwɔ ɔdɔ na ehumbɔbɔr. (Matthew 11:28, 29) Nkorɔfo fifi mbeambea baa ne nkyɛn bɛpɛɛ awerɛkyekyer na mboa. (Luke 5:12, 13; 7:37, 38) Nna mbofra mpo tum bɛn no.—Matthew 19:13-15; Mark 9:35-37.
Atorsɛm a nkorɔfo keka fa Jesus no bɔbea ho
Atorsɛm: Afofor ka dɛ bi a nna Jesus yɛ Afrikanyi osiandɛ Nyikyerɛ nwoma no dze ne tsinhwi totoo nguanhwi ho na ɔdze ne nan totoo “ayewa a wɔapɔw ho a adɔ” ho.—Nyikyerɛ 1:14, 15.
Nokwasɛm: Nsɛm ahorow a ɔwɔ Nyikyerɛ nwoma no mu no, wɔnam asɛnkyerɛdze do na wɔdze mae. (Nyikyerɛ 1:1) Jesus ne tsinhwi nye ne nan a wɔkaa ho asɛm no gyina hɔ ma no bɔbea wɔ no wunyan ekyir, na ɔnnyɛ no bɔbea aber a nna ɔwɔ asaase yi do no. Aber a nna Nyikyerɛ 1:14 reka Jesus no ho asɛm dɛ ne “tsir na ne tsinhwi hoa dɛ nguanhwi fitaa, ɔtse dɛ esukwankyɛba” no, ɔdze kɔla na ɔdze yɛɛ ntotoho no na ɔnnyɛ mbrɛ nna ne tsinhwi si tse ankasa. Nna ne tsir na ne tsinhwi kɔla no kyerɛ dɛ ɔwɔ nyansa osian onyin ntsi. (Nyikyerɛ 3:14) Sɛ yɛhwɛ dɛm nkyekyɛmu yi a, yebohu dɛ nna wɔremmfa Jesus ne tsinhwi nntoto mbrɛ nguanhwi si tse ankasa anaa mbrɛ esukwankyɛba si tse ankasa ho.
Nna Jesus n’anan “tse dɛ ayewa a wɔapɔw ho a adɔ wɔ fononoo mu.” (Nyikyerɛ 1:15) Afei so nna n’enyim “tse dɛ ewia rehyerɛn wɔ n’ahoɔdzen mu.” (Nyikyerɛ 1:16) Nyimpa biara nnyi hɔ a ne honandua tse dɛ dza yɛaka ho asɛm yi, ntsi yebotum aka dɛ dza wɔkaa faa noho no gyina hɔ ma biribi fofor. Ɔma yehu dɛ Jesus a oenyan no no yɛ obi a “ɔtse kan a wopinkyɛn ho a ɔnnyɛ mu.”—1 Timothy 6:16.
Atorsɛm: Nna Jesus yɛ mberɛw na nna noho nnyɛ dzen.
Nokwasɛm: Nna Jesus wɔ akokodur. Dɛ nhwɛdo no, aber a nyimpadodow bi a wokitsa nkrantsee nye mpɔtsibaa rebɛkyer no no, ofi akokodur mu daa noho edzi. (John 18:4-8) Jesus ne ber do, nna ɔgye ahoɔdzen ana obi eetum ayɛ kapenta edwuma. Ntsi yebotum aka dɛ nna Jesus wɔ ahoɔdzen osiandɛ nna ɔyɛ kapentanyi.—Mark 6:3.
Sɛ dɛm dze a, ebɛnadze ntsi na Jesus enntum annsoa n’asɛndua no? Na ebɛnadze ntsi na owui ana hɔn a wɔbɔɔ hɔn asɛndua mu kaa noho no ruwu? (Luke 23:26; John 19:31-33) Aber a nna aka ber tsiabaa ma woekum Jesus no, nna ɔayɛ mberɛw papaapa. Jesus n’enyi guu do anago mu no nyina osiandɛ nna ɔahaw na nna biribi fofor so haw no. (Luke 22:42-44) Anago no, Jewfo no yɛɛ no adze gyangyan, na aber a adze kyee no, Romefo no so yɛɛ no ayaayaadze. (Matthew 26:67, 68; John 19:1-3) Obotum aba dɛ osian iyinom ntsi na Jesus wuu ntsɛm no.
Atorsɛm: Aber nyina nna Jesus no werɛ ahow.
Nokwasɛm: Jesus daa no sor Egya Jehovah no suban ahorow no edzi pɛpɛɛpɛr, na Bible no so ka Jehovah ho asɛm dɛ ɔyɛ ‘enyigye Nyankopɔn.’ (1 Timothy 1:11; John 14:9) Nokwasɛm nye dɛ, Jesus kyerɛɛ nkorɔfo dza wɔyɛ a ɔbɛma woenya enyigye. (Matthew 5:3-9; Luke 11:28) Dɛm nokwasɛm ahorow yi ma yehu dɛ, nna Jesus n’enyim yɛbea ma nkorɔfo hu dɛ n’enyi agye.
Bi A W'enyi Bɛgye Iyi So Ho
ESSENTIAL BIBLE TEACHINGS
Yebesi Dɛn Ehu Dɛ Bible No Yɛ Nokwar?
Sɛ Nyankopɔn nye Bible no kyerɛwfo dze a, ɔnodze ɔnnsɛ dɛ nwoma biara a nyimpa akyerɛw nye no dzi nsɛ da.
HƐNHO NSƐM
Ma Obi Nye Wo Nsua Bible
Ma wɔnye wo mbɔ Bible mu asɛmbisa bi a ɔkyer w’adwen no ho nkɔmbɔ, anaa sua Jehovah Adasefo ho nsɛm pii.