¿Kʼusi jaʼ li Kʼin Koltaele?
Li kʼusi chal Vivliae
Li Kʼin Koltael o li kʼin kuxele jaʼ sventa svules ta sjolik j˗israeletik kʼalal laj yichʼik lokʼesel ta mosoil ta Ejipto ta sjabilal 1513 kʼalal muʼyuk toʼox talem Jesuse. Li Diose laj yalbe mantal j˗israeletik ti akʼo spasilanik jujun jabil li kʼin koltael li ta skʼakʼalil 14 ta yuilal abib yuʼun judaetike, ta mas tsʼakale nisan la sbiin yuʼunik (Eksodo 12:42; Levitiko 23:5).
¿Kʼu yuʼun ti Kʼin Koltael sbie?
Li Kʼin Koltaele jaʼ chalbe skʼoplal kʼalal la spoj j˗israeletik li Diose ti la smilbe skotol sba xnichʼon li j˗ejiptoetike (Eksodo 12:27; 13:15). Kʼalal skʼan toʼox smilbe sba xnichʼon j˗ejiptoetik li Diose, laj yalbe j˗israeletik ti akʼo smilik jkotuk chij o jkotuk tentsun xchiʼuk ti akʼo sbonbeik ta smarkoal stiʼ snaik li xchʼichʼele (Eksodo 12:21, 22, tsʼib ta yok vun). Mi laj yil Dios ti bonol chʼichʼ ta smarkoal stiʼ snaike, muʼyuk tsmilbe li sba xnichʼonike (Eksodo 12:7, 13).
¿Kʼu toʼox yelan tspasik li Kʼin Koltael ta voʼnee?
Li Diose laj yalbe mantal j˗israeletik ti kʼu yelan skʼan spasik li baʼyel Kʼin Koltaele. a Junantik li kʼusi skʼan spasik chal ta Vivliae jaʼ liʼe:
Li matanale. Li ta 10 ta yuilal abib (nisan), li utsʼ alaliletike ta stʼujik jkotuk chij o jkotuk tentsun ti jun to jabil yichʼoje, vaʼun jaʼ ta smilik li ta skʼakʼalil 14. Kʼalal la spasik li baʼyel Kʼin Koltael li j˗israeletike, la sbonbeik ta yochebal stiʼ snaik li xchʼichʼel chij o tentsune, vaʼun li sbekʼtale la svoik xchiʼuk la slajesik (Eksodo 12:3-9).
Li veʼlile. Kʼalal tspasik Kʼin Koltael li j˗israeletike, maʼuk noʼox tslajesik li chij o tentsune, yuʼun tslajesik li pan ti chʼabal slevaduraile xchiʼuk chʼail itajetik (Eksodo 12:8).
Li kʼine. Kʼalal echʼem xa ox li Kʼin Koltaele, li j˗israeletike ta spasik li Skʼinal Pan ti Muʼyuk Slevadurail ti chjalij vukub kʼakʼale. Ti vaʼ sjalile muʼyuk tslajesik li pan ti yichʼoj slevaduraile (Eksodo 12:17-20; 2 Kronikas 30:21).
Chchanubtasvanik. Kʼalal jaʼo tspasik li Kʼin Koltaele, li totil meʼiletike jaʼo chchanubtasik ta sventa Jeova li yalab xnichʼnabike (Eksodo 12:25-27).
Kʼalal jaʼo chanavik batele. Ta mas tsʼakale, li j˗israeletike lik batikuk ta Jerusalen sventa te x˗echʼ yuʼunik li Kʼin Koltaele (Deuteronomio 16:5-7; Lukas 2:41).
Yan kʼusitik nopem xaʼiik spasel. Li ta skʼakʼalil Jesuse, ta xuchʼik vino xchiʼuk ta xkʼejinik kʼalal jaʼo tspasik li Kʼin Koltaele (Mateo 26:19, 30; Lukas 22:15-18).
Li kʼusi jecheʼ yaʼiojik ta sventa li Kʼin Koltaele
Li kʼusi xchʼunoj yantike: Li j˗israeletike jaʼo tslajesik li matanal sventa Kʼin Koltael li ta 15 yuʼun nisane.
Li kʼusi melele: Li j˗israeletike jaʼo te chlik yuʼunik li Kʼin Koltael kʼalal chʼayem xa ox batel kʼakʼal li ta 14 yuʼun nisane (Levitiko 23:32). Li Diose laj yakʼbe mantal j˗israeletik ti akʼo smilik jkotuk chij kʼalal chʼayem xa ox batel kʼakʼal ti jaʼo chlik li 14 yuʼun nisane xchiʼuk ti slajesbeik sbekʼtal chij li vaʼ akʼobale (Eksodo 12:6, 8). Jaʼ yuʼun, ta smilik li chije xchiʼuk ta slajesik ta 14 yuʼun nisan.
Li kʼusi xchʼunoj yantike: Li yajtsʼaklomtak Kristoe persa skʼan spasik li Kʼin Koltaele.
Li kʼusi melele: Kʼalal laj xa ox spasik li Kʼin Koltael ta 14 yuʼun nisan ta sjabilal 33, li Jesuse la slikes li Veʼlil ta bat kʼakʼal yuʼun Kajvaltike (Lukas 22:19, 20; 1 Korintios 11:20). Li Kʼin Koltaele jaʼ kom ta xkʼexol li Veʼlil ta bat kʼakʼal yuʼun Kajvaltike, yuʼun jaʼ snaʼobil li matanal laj yakʼ Jesuse, ti xkoʼolaj li matanal laj yichʼ akʼel ta Kʼin Koltaele (1 Korintios 5:7). Li matanal laj yakʼ Jesuse mas to tsots skʼoplal kʼuchaʼal li matanal chichʼ toʼox akʼel ta Kʼin Koltaele, yuʼun tspoj lokʼel ta mulil xchiʼuk ta lajelal li krixchanoetike (Mateo 20:28; Ebreos 9:15).
a Ta mas tsʼakale, laj yichʼ jelel ti kʼu yelan chichʼ pasele. Kʼalal la spasik li baʼyel Kʼin Koltael li j˗israeletike, sujom xa veʼik ta skoj ti skʼan xlokʼik batel li ta Ejiptoe (Eksodo 12:11). Pe kʼalal kʼotik ta Albil Balumile, mu xa persauk sujom xveʼik li ta kʼin taje.
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yuʼun li stestigotak Jeova jelel ti kʼu yelan tspasik li Veʼlil ta bat kʼakʼal yuʼun Kajvaltik kʼuchaʼal li yan relijionetike?
Li Veʼlil ta bat kʼakʼal o Snaʼobil slajel Kristoe, jaʼ li tsobajel ti mas tsots skʼoplal chilik li stestigotak Jeovae. Li Vivliae chalbe skʼoplal li tsobajel taje.
JKʼOPLALKUTIK
Snaʼobil slajel Kristo
Li stestigotak Jeovae tstakoxuk ta ikʼel li ta Snaʼobil slajel Kristo ti chichʼ pasel ta 12 yuʼun avril ta 2025.
JKʼOPLALKUTIK
Li tsobajeletik yuʼun stestigotak Jeovae
Naʼo bu ta jtsob jbakutik xchiʼuk ti kʼu yelan chkichʼkutik ta mukʼ li Diose.