O vai te Nephilimi?
Te pahonoraa a te Bibilia
E mau aito rarahi te Nephilimi e mea ino atoa ratou. E mau tamarii tamaroa tei fanauhia mai i to te mau melahi ino i taoto ai i te mau vahine a te taata i te tau o Noa. a
Te parau ra te Bibilia: “Ite maira te mau tamaiti a te Atua mau e mea haviti te mau tamahine a te taata.” (Genese 6:2) Teie “mau tamaiti a te Atua,” o te mau melahi ïa tei orure hau i te Atua e o tei “faarue . . . i to ratou iho nohoraa” i te raˈi. Ua rave ratou i te tino taata e “rave aˈera . . . ratou ei vahine faaipoipo na ratou i te mau vahine atoa ta ratou i maiti.”—Iuda 6; Genese 6:2.
E ere ratou mai te mau tamarii ta tatou e matau aˈenei, e afa taata e e afa melahi ratou. (Genese 6:4) E mau aito rarahi e te ino mau te Nephilimi tei hamani ino i te taata e ua î roa te fenua i ta ratou haavîraa uˈana. (Genese 6:13) Te parau ra te Bibilia “o ratou te mau aito i tahito ra, te mau tane tuiroo.” (Genese 6:4) I muri iho, ua pee te taata i to ratou haerea ino mau.—Genese 6:5; Numera 13:33. b
Te mau manaˈo hape no nia i te Nephilimi
Manaˈo hape: Te ora noa ra te Nephilimi i te fenua nei.
Tupuraa mau: Ua haamou Iehova i te ao ino i tahito ra na roto i te hoê diluvi. Ua haamouhia te Nephilimi e te mau taata ino atoa. Area râ o Noa e to ˈna utuafare, no to ratou faarooraa ia Iehova ua faaorahia ratou.—Genese 6:9; 7:12, 13, 23; Petero 2, 2:5.
Manaˈo hape: O te taata te metua tane a te Nephilimi.
Tupuraa mau: To ratou metua tane o “te mau tamaiti a te Atua mau” ïa. (Genese 6:2) Te faaohipa ra te Bibilia i teie parau no te mau melahi. (Ioba 1:6; 2:1; 38:7) Ua nehenehe ta te mau melahi e rave i te tino taata. (Genese 19:1-5; Iosua 5:13-15) Ua faahiti te aposetolo Petero i “te mau varua i roto i te tapearaa, o tei faaroo ore i mutaa ihora a tiai ai te Atua ma te faaoromai i te tau o Noa.” (Petero 1, 3:19, 20) Oia atoa, ua faahiti te papai Bibilia Iuda i te mau melahi “tei ore i mau i to ratou tiaraa matamua, ua faarue râ i to ratou iho nohoraa.”—Iuda 6.
Manaˈo hape: Te Nephilimi, o te mau melahi ïa o tei rave i te hara.
Tupuraa mau: Te faataa ra te mau irava tapiri o te Genese 6:4, e ere te Nephilimi i te mau melahi. Ua taoto te mau melahi e te vahine a fanauhia ˈi te mau tamarii tamaroa afa taata e afa melahi. I muri aˈe i to te mau melahi raveraa “ei vahine faaipoipo na ratou i te mau vahine atoa ta ratou i maiti,” ua faaoti Iehova i te haamou i te ao ino i tera râ tau i roto 120 matahiti. (Genese 6:1-3) Te parau ra te Bibilia “i taua mau mahana ra . . . te taoto noa ra te mau tamaiti a te Atua mau i te mau tamahine a te taata, e fanau maira ratou i te mau tamarii tamaroa. O ratou te mau aito i tahito ra,” te Nephilimi ïa.—Genese 6:4.
a Te auraa o te taˈo Hebera hurihia “Nephilimi” oia hoi “feia haamarua.” Te parau ra te hoê buka e faaohipahia teie taˈo no te feia “tei haamarua i te taata na roto i te haavîraa uˈana e te haruraa taoˈa.”—Wilson’s Old Testament Word Studies.
b I roto i te Numera 13:33, ua ite te mau mata huna Iseraela i te mau taata rarahi, haamanaˈo atura ratou i te aamu o te Nephilimi tei pohe tau hanere matahiti na mua ˈtu.—Genese 7:21-23.
E au atoa outou . . .
TE PARE TIAIRAA
“Ua au to Noa haerea i te Atua”
Eaha te haapii mai i te hiˈoraa o Noa, ta ˈna vahine e to ˈna utuafare?
NO NIA IA MATOU
A ani i te hoê farereiraa
Aparauraa no nia i te Bibilia aore ra no te ite atu â no nia i te mau Ite no Iehova.