A jọ Ebaibol na fodẹ erao nọ a re se daenosọs na ha. Nọ orọnọ Ebaibol na ọ ta nọ Ọghẹnẹ họ ọnọ ọ “ma eware kpobi” na, o rrọ vevẹ nọ erao nana e rrọ usu eware nọ Ọghẹnẹ ọ ma. a (Eviavia 4:11) Dede nọ Ebaibol na ọ fodẹ daenosọs gbiae he, o sae jọ nọ daenosọs e jọ usu erao nọ Ebaibol na ọ ta kpahe, inọ:

•   “Emama ilogbo obọ abade,” hayo “erao imuozọ.”​—Emuhọ 1:21; New American Bible.

•   “Erao kpobi nọ i re si evaọ otọ na.”​—Emuhọ 1:25.

•   “Erao ẹwọ otọakpọ na.”​—Emuhọ 1:25.

Kọ erao nọ a re se daenosọs na i hrerẹ no erao efa ze?

 Igbegbe erao nọ a kiẹ via na i dhesẹ nọ erao nana e rọ ẹmẹrera rro ze he wọhọ ẹsenọ i hrerẹ ze, ukpoye e jọ ruaro notọ avọ otọ ze. Onana o rọwokugbe ẹme nọ Ebaibol na ọ ta inọ Ọghẹnẹ họ ọnọ ọma erao na kpobi. Wọhọ oriruo, a jọ Olezi 146:6 dhesẹ Ọghẹnẹ wọhọ “Ọnọ ọ ma odhiwu gbe otọakpọ na, abade na, gbe eware kpobi nọ e rrọ eva rai.”

Oke vẹ erao nọ a re se daenosọs na e rọ jọ otọakpọ na?

 Ebaibol na ọ ta nọ a ma erao nọ e rrọ abade gbe otọakpọ na evaọ ẹdẹ avọ isoi gbe ẹdẹ avọ ezeza etoke emama na. b (Emuhọ 1:20-25, 31) Onana u dhesẹ nọ erao nọ a re se daenosọs na e rria etoke krẹkri.

Kọ Bẹhimọt gbe Levayatan yọ daenosọs?

 Ijo. Dede nọ a sae nwani dhesẹ oghẹrẹ nọ erao nana nọ a jọ obe Job fodẹ na e jọ gbiae he, ahwo a riẹ Bẹhimọt wọhọ eni-ame jẹ riẹ Levayatan wọhọ edhere. Oghẹrẹ nọ a dhesẹ erao nana o rọwokugbe oghẹrẹ nọ a jọ Ebaibol na dhesẹ ai. (Job 40:15-23; 41:1, 14-17, 31) Oghẹrẹ kpobi nọ o rrọ kẹhẹ, a sae ta nọ “Bẹhimọt” gbe “Levayatan” yọ daenosọs ho. Ọghẹnẹ ọ ta kẹ Job nọ ọ romatotọ rri erao nana, yọ Job ọ gbẹ jọ uzuazọ oke krẹkri okenọ daenosọs na ọvuọvo e gbẹ jọ uzuazọ họ.​—Job 40:16; 41:8.

Eme ọ via kẹ erao nọ a re se daenosọs na?

 Ebaibol na ọ ta kpahe oware nọ o via kẹ erao nana ha, nọ e gbẹ rọ rrọ uzuazọ rite enẹna ha. Rekọ, Ebaibol na ọ ta nọ “fiki oreva” Ọghẹnẹ a rọ ma eware kpobi. Fikiere, o rrọ vevẹ nọ Ọghẹnẹ o wo ẹjiroro nọ ọ rọ ma erao nọ a re se daenosọs na. (Eviavia 4:​11) Nọ ẹjiroro nọ Ọghẹnẹ ọ rọ ma erao nana u rugba no, Ọghẹnẹ ọ tẹ kuvẹ re erao nana i whu no otọakpọ na no.