¿Kʼusi chal Vivlia ta sventa li dinosaurioetike?
Li kʼusi chal Vivliae
Muʼyuk bu jamal chalbe skʼoplal dinosaurioetik li Vivliae. Akʼo mi jech, chal ti jaʼ ‹la spas skotol kʼusitik› li Diose. Jech oxal, chakʼ ta aʼiel ti jaʼ la spas li mukʼtikil chonbolometik taje (Apokalipsis 4:11). a Kʼuchaʼal laj kaltike, muʼyuk bu jamal chalbe skʼoplal li Vivliae, pe xuʼ van jaʼ te skʼoplal li ta jaytos chonbolometik liʼe:
«Mucʼtiquil chanul nabetic» (Génesis 1:21).
Li chonbolometik ti «xquilet ta banamil chanovique» (Génesis 1:24).
Li teʼtikal chonbolometik ti «mu stacʼ tsʼunele» (Génesis 1:24).
¿Mi ta kʼunkʼun kʼatajik tal li dinosaurioetike?
Li voʼneal sbakiltak dinosaurioetik tabile chakʼ ta ilel ti koʼol-o yelanil ti kʼu sjalil kuxiike, maʼuk ti kʼunkʼun kʼatajik talele. Taje snit-o sba xchiʼuk li kʼusi chal Vivlia ti jaʼ la spas skotol chonbolometik li Diose. Jech kʼuchaʼal li ta Salmo 146:6 xi chal ta sventa li Diose: «Jaʼ li bochʼo la spas vinajel banamile, xchiʼuc li nabetique xchiʼuc scotol li cʼusitic te oye».
¿Kʼusi ora kuxiik li dinosaurioetike?
Li Vivliae chal ti laj yichʼ pasel ta svoʼobal xchiʼuk ta svakibal kʼakʼal o yorail li xchanul nabe xchiʼuk li chonbolometik ta balumile (Génesis 1:20-25, 31). b Jech oxal, li Vivliae chakʼ ta aʼiel ti oy kʼuuk sjalil kuxiike.
¿Mi jaʼik dinosaurioetik li Beemot xchiʼuk Leviatan chalbe skʼoplal Vivliae?
Moʼoj. Akʼo mi mu jnaʼtik lek kʼusi chonbolomal li Beemot xchiʼuk Leviatan chal ta slivroal Jobe, chalik ti jaʼ skʼoplal ipopotamo li Beemote, yan li Leviatane jaʼ la li kokodriloe. Taje xkʼot-o xchiʼuk ti kʼu yelan chalbe skʼoplal Vivlia li chaʼkot chonbolom taje (Job 40:15-23; 41:1, 14-17, 31). Jaʼ yuʼun xuʼ jchʼuntik ti mu jaʼuk skʼoplal dinosaurioetike. Jech xtok, li Diose laj yalbe Job ti akʼo skʼel kʼu yelan li chonbolometik taje, pe li Jobe jaʼo kuxi kʼalal voʼne xa ox xchʼayel stsʼunubal li dinosaurioetike (Job 40:16; 41:8).
¿Kʼusi kʼot ta pasel ta stojolal li dinosaurioetike?
Mi jsetʼuk bu chalbe skʼoplal li Vivliae. Jnaʼojtik lek ti oy lek stu yuʼun Dios ti la spas li dinosaurioetike, yuʼun skotol li kʼusitik oye jaʼ ta skoj ti jech la skʼan yoʼontone (Apokalipsis 4:11). Kʼalal laj yil Dios ti kʼot ta pasel li kʼusi oy ta yoʼonton une, laj yakʼ ti akʼo xtupʼ stsʼunubale.
a Li voʼneal sbakiltak chonbolometik tabil ti mukajtike chakʼ ta ilel ti ayan onoʼox li dinosaurioetike. Chakʼ ta ilel xtok ti jeltos ta jmek yelanike xchiʼuk smukʼtikilike.
b Kʼalal «kʼakʼal» xi li Vivliae, bakʼintike jaʼ skʼan xal ti oy jaymiluk jabil smakoje (Génesis 1:31; 2:1-4; Evreos 4:4, 11).
Xuʼ van chakʼupin skʼelel xtok liʼe
KʼUSITIK TSJAKʼIK TA SVENTA VIVLIA
¿Mi koʼol kʼusi chal Vivlia xchiʼuk li kʼusi chal sientifikoetike?
¿Mi melel li kʼusi chalik ta sventa siensia ti mu jechuk la kʼusi chal li Vivliae?
CHANUBTASELETIK TA VIVLIA TI TSOTS SKʼOPLALE
¿Mi oy buchʼu la spas li vinajel balumile?
Li kʼusi chal Vivlia ta sventa li vinajel balumile mu xa jechuk chichʼ aʼibel smelolal xchiʼuk chalik ti jaʼ noʼox jecheʼ loʼile. ¿Mi stakʼ chʼunel li kʼusi chal Vivlia ti kʼuxi lik talel li balumile?
VOʼOB SJAKʼOBIL TA SVENTA TI KʼUXI LIK TALEL LI KUXLEJALE
¿Kʼuxi lik tal li kuxlejale?
Mi laj kaʼibetik smelolale xuʼ mas to jkʼuxubintik li kuxlejale
LI KʼUSI BAʼYEL SKʼAN JCHANTIK TA VIVLIAE
¿Kʼu yuʼun la spas Balumil li Diose?
Li balumile jaʼ jun planeta ti toj kʼupil sbae. Lek noʼox tajek ti kʼu snamal xil li kʼakʼale, ti kʼu stsatsal chbalalije xchiʼuk ti kʼu yelan tstsʼeʼan sba ta jujujote. ¿Kʼu yuʼun laj yakʼ tajek yoʼonton Dios ti lekuk smeltsane?
