Tho cu zeitluk in dah tlaih an har ti kha nan hngalh ko lai. Tlaih kan timh hna paohah khulrang in an i phet i an zuang lengmang.

 Scientist pawl nih thingthei a eimi tho cu raldohnak vanlawng bantukin second pakhat ah a duhnaklei paohah i let in a zuang kho tiah an ti. Professor Michael Dickinson nih hitin a ti: “An keuh cangka in ṭha tein an zuang kho colh. Vanlawng mawngh ning a hngalmi, a chuakkami ngakchia kha raldohnak vanlawng mawngtu ṭhutdan ah ṭhutter bantuk a si.”

 Hlathlaitu pawl nih tho a zuan ning kha video an thlak i an zoh tikah second pakhat ah voi 200 a thla a zahmi kha an hmuh. A thla voikhat a zahnak in a pum aa let kho i ṭihnungmi thil hna kha a hrial khawh.

 Lehrulhnak a caan kong ah tah zeitin? Mi pakhat nih voikhat a mit a ṭhepmi nakin a let 50 rang deuh in lehrulh khawhnak an ngei tiah hlathlaitu hna nih an ti. Dickinson nih “khoika ah dah ṭih a nungmi thil a um ti le an luat nakhnga zeitindah kan zuan lai ti kha caan tawite chungah an tuak khawh” tiah a ti.

 Hlathlaitu hna nih thingthei a eimi tho a thluak fate i khuaruahhar a sining kha hlathlainak an tuah.

 Zeitindah na ruah? Thingthei a eimi tho i zuan khawhnak cu amah tein a si kho hnga maw? Asiloah design suaitu pakhatkhat a um hnga maw?