Mẹdepope he ko tẹnpọn nado fẹ́ supọ̀ de sẹ̀ pọ́n na yigbe dọ e ma nọ fá bọ alọ do nọ jẹ e go. Bleun wẹ supọ̀ nọ họnyi po awuyiya abì tọn nkọ po.

Lẹnunnuyọnẹntọ lẹ ko doayi e go dọ supọ̀ wunmẹ de he nọ yin yiylọdọ drosophile, tindo nugopipe lọ nado lilẹ́ plaun do ede ji dile agahun awhànfuntọ lẹ tọn nọ wà do, amọ́ ewọ nọ wàmọ to nuhe ma pé nukunwhiwhe dopo mẹ. Tlolo he yé yin jiji, “yé gán zlọn po azọ́nyinyọnẹn daho po,” wẹ Mẹplọntọ Michael Dickinson dọ. “E nọ taidi yè ni ze viyẹyẹ de do agahun awhànfuntọ lẹ tọn de mẹ bọ e na ko yọ́n lehe e na kùn in gbọn hadopo lọ.”

Dodinnanutọ lẹ basi video supọ̀ wunmẹ ehelẹ tọn dile yé to lilẹ́ bo mọdọ yé nọ hò awà whla 200 to seconde dopo gblamẹ. Etomọṣo, awà hihò dopo gee ko nọ pé na yé nido lilẹ́ pànta fidevo nado họnyi.

Podọ etẹwẹ dogbọn lehe yé nọ yawu yinuwa do dali? Dodinnanutọ lẹ mọdọ whẹpo gbẹtọ nado whènukun whladopo, supọ̀ ehelẹ sọgan ko yinuwa whla 50 to owù nukọn. “Supọ̀ lọ lẹ nọ kàn ayiha gigẹdẹ susu to ojlẹ kleun de gblamẹ, nado mọ owù hlan bo yọ́n fihe yé na họ̀n gbọn bọ e na pà yé,” wẹ Dickinson dọ.

Lehe apọ̀n tiuntiun supọ̀ wunmẹ ehe tọn sọgan wà ehe gbọn taun gbẹ́ pò to pipaṣa dodinnanutọ lẹ kakajẹ din.

Etẹ a lẹn? Be nugopipe supọ̀ ehe tọn nado nọ lilẹdo ede ji wá aimẹ na ede poun wẹ ya? Kavi e yin didá?