Tho man tumtute chuan chu chu thil harsa tak a ni tih an hria a. He ran nung hian a man tumtute chu kâwlphê ang maia rangin a lo pumpelh ṭhîn a ni.

 Scientist-te chuan tho chi khat thopui chu indona Jets thlawhna angin a inher vat thei a, chu chu second khat aia rei lovah a ti thei tih an hmu chhuak a. Professor Michael Dickinson-a chuan an pian tirh aṭangin, “thiam takin an thlâwk thei nghâl a. Chu chu nau piang hlim fighter thlawhna khalhna chhûnga ṭhuttîr a, a khalh dân thiam nghâl ang hi a ni,” tiin a sawi.

 Mi thiamte chuan tho thlâwk lai video an lâkna aṭangin second khatah vawi 200 an thla an zâp tih an hmu chhuak a. An vawi khat thla zâp pawh hi an taksa pum her kual nân leh hlauhawm pumpelh nân a tâwk a ni.

 An thil hriat an chhân lêtna chungchâng hi eng nge ni ve? Mi thiamte chuan mihring vawi khat mit khap aia a lêt 50-a rangin thote hian an thil hriat an chhâng lêt thei tih an hmu chhuak a. Dickinson-a chuan, “Thote hian hlauhawm awmna leh a pumpelh theih dân ṭha ber chu mit khap kâr lek chhûngin an chhût chhuak thei,” tiin a sawi a ni.

 Thopui thluak te tak têin hetiang thil mak ropui tak a tih dân hi mi thiamte chuan an zir mêk a ni.

 Engtin nge i ngaih? Thopui thlawh thiamzia hi amaha lo awm nge ni a, siam a ni zâwk?