ASOO AWIE A YƐLE A?
Kɛzi Nrɛzenra Mɔɔ Bɛtɛnla Mbakama Nwo Kakyihakyi Bɛ Nwo Wɔ Anwomanyunlu La
Awie biala mɔɔ ɛbɔ mɔdenle kɛ ɔbɔ nrɛzenra wɔ anwomanyunlu la balie ado nu kɛ ɛhye ɛyɛlɛ ɛnla aze. Fane dɔɔnwo ne ala ɛkabɔ ɛ nye wɔade la ɛnee bɛnriandi.
Abɔdeɛ nwo nrɛlɛbɛvolɛma ɛnwu kɛ, nrɛzenra bie mɔɔ ɔtɛnla mbakama nwo la kola kakyihakyi ɔ nwo kɛ mɔɔ alopile mɔɔ bɛfa bɛkɔ konle yɛ la, na yemɔ ɔyɛ zɔ wɔ mekɛ mɔɔ ɛndwu kɛkɛ ko la anu. Abɔlɔba Michael Dickinson ka kɛ, “bɛwo bɛ ɛkɛ ne ala bɔbɔ a, bɛkola bɛtu ndɛndɛ kpalɛ. Ɔle kɛ asɛɛ wɔva adɔma mɔɔ bɛwo ye fofolɛ wɔdɛnla sogyama alopile nyunlu na yehola yedu ɔ bo la.”
Menli mɔɔ yɛ neɛnleanu la hyele kɛzi nrɛzenra ɛhye kakyihakyi ɔ nwo la vidio, na bɛnwunle kɛ, wɔ kɛkɛ ko biala anu, ɔbɔ ɔ ndɛba anu fane 200. Noko saa ɔbɔ ɔ ndɛba anu ko biala a, ɔkola ɔmaa ɔtu ɔ bo na ɔnriandi esiane.
Eza neɛnleanuma ɛnwu kɛ, saa esiane ɛlɛbarado nrɛzenra ɛhye a, sonla kabɔ ɔ nye ade la ɛnee yehɔ dɛbadɛba. Dickinson hilele nu kɛ, “Nrɛzenra ne kola bu ninyɛne nwo mgbonda wɔ mekɛ ezinraa bie anu, na ɛhye maa ɔnwu esiane mɔɔ ɛlɛba nee kɛzi ɔbanriandi la.”
Kɛzi nrɛzenra ɛhye mɔɔ tɛnla mbakama nwo adwenle nretee ne yɛ gyima la si menli mɔɔ yɛ neɛnleanu la anwo.
Nrɛzenra ɛhye mɔɔ tɛnla mbakama nwo la kakyi ɔ nwo nriandi esiane wɔ kɛkɛ mɔɔ ɛndwu ko la anu
Kɛzi ɛdwenle nwo ɛ? Asoo kɛzi nrɛzenra ɛhye kakyihakyi ɔ nwo la luale ngakyihakyililɛ zo a rale a? Anzɛɛ awie a yɛle a?