Any person wey don try to kill fly before go know say no be easy thing. This insects de sabi dodge well-well when person want catch them, and them dey fast no be small.

 Scientists don find out say one type of fly wey the name na fruit fly, sabi turn well-well the way fighter jets de turn, but na with small time. The amount of time wey the fly de use turn no even reach one second. Professor Michael Dickinson talk say “they fit fly like expert” from when they born them. According to the professor, this one “just be like when person put newborn baby for where pilot de sit-down for inside fighter jet and the baby go know wetin to do” to make the jet fly.

 Researchers video this fly as them de turn and fly. They come find out say for every one second, this flies de move their feather up and down 200 times. But even with that one, only one time wey they go move-am up and down dey enough for them to fit turn their body or change their direction, and then, start to escape.

 And how much time this fly need for-am to fit notice danger and escape? Researchers find out say na just small time the fly need. E use 50 times fast pass the time wey person need to fit blink e eye. Professor Dickinson explain say, “The fly de know where the danger dey and the exact direction wey e need to fly go to fit escape well. Na serious calculation this fly de do for-am to fit do this one, and na only small amount of time e need.”

 Researchers want find out how this fruit fly fit de use e tiny brain do this wonderful thing.

 Wetin you think? The sense wey the fruit fly get to fit de turn like that, just appear by e self? Or they make-am?