Oho, wɔrennsɛɛ hɛn asaase yi, wɔrennhyew no, eso wɔremmbɔ fofor nnhyɛ ananmu. Bible no kyerɛkyerɛ dɛ wɔbɔɔ hɛn asaase yi dɛ yɛntsena do afebɔɔ.

•   “Atseneneefo benya asaase no edzi, na wɔaatsena mu daa.”​—Ndwom 37:29.

•   ‘Nyankopɔn dze asaase fapem etsim hɔ, dɛ onnhim dabiarada.’​—Ndwom 104:5.

•   “Asaase tsim hɔ daa.”​—Ɔsɛnkafo 1:4.

•   “Nyia ɔhyehyɛɛ asaase na ɔyɛe; ɔno na ɔdze tsiim hɔ, ɔammbɔ ne pan, ɔhyehyɛe ma wɔaatsena mu.”​—Isaiah 45:18.

 Nyankopɔn remma nyimpa mmfa fi, akodzi anaa biribi fofor biara nnsɛɛ asaase yi korakora. Na mbom, ‘ɔbɛsɛɛ hɔn a wɔsɛɛ asaase no.’ (Nyikyerɛ 11:18) Obesi dɛn ayɛ eyi?

 Nyankopɔn dze no sor Ahendzi a ɔyɛ tumdzi papa no bɛhyɛ nyimpa aban a woenntum ammbɔ asaase yi ho ban no ananmu. (Daniel 2:​44; Matthew 6:​9, 10) Nyankopɔn ne Ba Jesus Christ na obedzi dɛm Ahendzi no do tum. (Isaiah 9:​6, 7) Aber a nna Jesus wɔ asaase yi do no, ɔyɛɛ anwanwadze dze kyerɛɛ dɛ ɔwɔ tum wɔ abɔdze ahorow do. (Mark 4:​35-​41) Jesus a ɔyɛ Nyankopɔn n’Ahendzi no do hen no benya tum wɔ asaase yi nye biribiara a ɔwɔ mu no do. Ɔbɛyɛ ndzɛmba a ɔwɔ asaase do no fofor ma wɔaayɛ tse dɛ mbrɛ nna ɔtse wɔ Eden ture no mu no.​—Matthew 19:28; Luke 23:43.

 Oho, ɔnnka dɛm. Asɛm a ɔwɔ 2 Peter 3:7 a binom nntse ase yie ntsi na ɔma wɔka dɛ wɔdze gya bɛhyew asaase no. Hɔ ka dɛ: ‘Na sor a ɔwɔ hɔ sesei, nye asaase no wɔakora do ama ogya.’ Ma yensusu nsɛm ebien bi a no ho hia a ɔma yɛtse dɛm asɛm yi ase.

1.   Bible no mu no kasafua “sor,” “asaase,” nye “ogya kyerɛ ndzɛmba ahorow pii. Dɛ nhwɛdo no, Genesis 11:1 ka dɛ: “Na asaase nyinara hɔn kasaa kor, na hɔn asɛm kor.” “Asaase” a wɔaka ho asɛm hɔ ha no gyina hɔ ma nyimpa.

2.   Nsɛm a ɔwɔ 2 Peter tsir 3 no ma yehu dza sor, asaase nye ogya wɔaka ho asɛm wɔ nyiyimu 7 no kyerɛ. Wɔdze dza wɔaka ho asɛm wɔ nyiyimu 5 na 6 no mu no totoo Noah n’aber do Nsuyirii no ho. Dɛm aber no, wɔsɛɛ tsetse wiadze no, naaso hɛn asaase yi ankasa dze wɔannsɛɛ no. Na mbom, Nsuyirii no sɛɛ nyimpa a wɔyɛ basabasa no a wɔdze hɔn gyina hɔ ma “asaase” no. (Genesis 6:​11) Wɔsan so sɛɛ “sor” bi; na dɛm sor no nye nyimpa a nna wodzi tum wɔ asaase no do dɛm aber no. Ntsi wɔsɛɛ nyimpa emumuyɛfo no na nnyɛ hɛn asaase yi. Noah nye n’ebusua nyaa nkwa aber a wɔsɛɛ dɛm wiadze no, na wɔsan tsenaa asaase no do bio wɔ Nsuyirii no ekyir.​—Genesis 8:​15-​18.

 Dɛm ntsi, tse dɛ Nsuyirii no, ɔsɛɛ anaa “ogya” a 2 Peter 3:7 ka ho asɛm no dze dɛm emumuyɛ wiadze yi bɛba ewiei na nnyɛ asaase a yɛtse do yi. Nyankpɔn abɔ “sor fofor nye asaase fofor a tsenenee tse mu” ho anohoba. (2 Peter 3:​13) “Sor fofor” anaa tumdzi fofor a ɔyɛ Nyankopɔn n’Ahendzi no bedzi tum wɔ “asaase fofor” anaa adasamba ebusua fofor no do. Wɔ dɛm Ahendzi no tumdzi ase no, asaase no bɛdan paradise, na asomdwee bɛtsena mu.​—Nyikyerɛ 21:​1-4.