“Ukuyoba munjobelo isingi” kyabupe iki Abakristu bamo ababwandilo bapeliwe kangi fyatulile ukuti bayobe injobelo yakihesya iyi bakayobapo. (Imbombo sya Batumiwa 10:46) Linga bikuyoba injobelo yakihesya, bene aba bayimanyagha injobelo iyo bo aba bapilikagha. (Imbombo sya Batumiwa 2:4-8) Ukuyoba injobelo isingi kyali kimo mwa kyabupe kya mbepo mwikemo iki Kyala abapele Abakristu ababwandilo.—Bahiburi 2:4; 1 Bakorinti 12:4, 30.

•  Ngimba ukuyobela munjobelo isingi kwalyandile kughu, kangi ndili?

•  Ngimba ubwighane ubwakuyobela munjobelo isingi bwali bwakuti fiki?

•  Ngimba ukuyobela munjobelo isingi kwalondiwagha ukukindilila?

•  Ngimba ukuyobela munjobelo isingi kwamalike ndili?

•  Ngimba amasiku agha pope tukulondiwa ukuyobela munjobelo isingi?

•  Ngimba Abakristu babwanaloli babaghile ukumanyiwa bulebule?

 Ikyakuswighisya iki kyalandile ku Yerusalemu pa Pentekositi mu 33 C.E. Abamanyili abakufwana pabupipi 120 babungene “kangi bosa balinkwisula na mbepo mwikemo nu kwanda ukuyobela munjobelo isyakukindanakindana.” (Imbombo sya Batumiwa 1:15; 2:1-4) Abandu bingi aba “bafumile mfikolo fyosa fya nkisu kya pasi” balinkubungana, kangi “umundu aliwesa alinkubapilika abitiki bikuyobela munjobelo yake.”—Imbombo sya Batumiwa 2:5, 6.

1.   Fyanangisyagha ukuti Kyala abatulagha Abakristu. Iyolo Kyala abombagha ifyakuswighisya linga ikulonda ukubatula ababombi bake abasubiliwa, bo muno abombile na Mose. (Ukusoka 4:1-9, 29-31; Ukubaliwa 17:10) Mwakufwana itolo, nkabalilo ka Bakristu babwandilo ukuyobelo munjobelo isingi kwanangisyagha ukuti Kyala ikukitula ikipanga kya Bukristu iki kyali ukuti kyandile itolo. Untumiwa Pauli alembile ukuti: “Ukuyobela munjobelo imbya kimanyilo itolo, komma kubitiki, loli kubasitabitiki.”—1 Bakorinti 14:22.

2.   Fyatulile ukuti Abakristu bafumusye mwakufwana. Abandu aba bapilikagha isi abamanyili ba Yesu bayobagha pisiku lya Pentekositi, batile: “Tukubapilika bo bikuyobela munjobelo syitu imbombo ingulumba isya Kyala.” (Imbombo sya Batumiwa 2:11) Polelo ikifukwa ikingi ikinywamu iki Abakristu bayobelagha munjobelo isingi kyali kyakuti, ‘basisimikisye mwakufwana’ kangi ukuti “bakabapeleghe bafundiwa abandu ifikolo fyosa ukuya bamanyili. (Imbombo sya Batumiwa 10:42; Matai 28:19) Abandu pabupipi 3,000 aba baketile ikyakuswighisya iki kangi bapilikisye ubuketi ubu bwabikiwe, balinkuya bamanyili.—Imbombo sya Batumiwa 2:41.

 Hayi. Ifyabupe ifingi ifya mbepo mwikemo, bo ukuyobela munjobela isingi, fyali fya kabalilo itolo. Ibaibolo lyayobile ngani ukuti: “Kali fiyepo ifyabupe ifya busololi, fisakuyongagha, nalinga buyobela njobelo imbya, bwisakumalikagha.”—1 Bakorinti 13:8.

 Nkabalilo ka Bakristu ababwandilo, abafundiwa babayabilangako ifyabupe fya mbepo mwikemo mwakubika amaboko pa Bakristu abangi. (Imbombo sya Batumiwa 8:18; 10:44-46) Sikuboneka ukuti aba balyambilile ifyabupe fya mbepo mwikemo ukufuma ku bafundiwa, bakabayabilagha abangi. (Imbombo sya Batumiwa 8:5-7, 14-17) Ukuti tupilikisye kanunu, isagha tufwanikisye ukuti iboma limpele dalayivala ilayisensi yakwendesyela igalimoto, ngimba dalayivala uyu ali namaka ghakupanga ilayisensi nu kumpa umundu uyungi? Hayi. Mwakufwana itolo, ukuyobela munjobelo isingi kwamalike apa abafundiwa na bandu abangi aba bapeliwe ikyabupe iki bafwile.

 Ikyabupe ikyakuyobela munjobelo isingi kyamalike nkabalilo ka Bakristu babwandilo. Pakabalilo aka, nayumo umundu uyu abaghile ukuyoba ukuti mbepo mwikemo wa Kyala yo uyu ikuntula ukuti ayobeleghe munjobelo isingi. a

 Yesu ayobile ukuti abamanyili bake bisakumanyiwa nu lughano. (Yohani 13:34, 35) Yope untumiwa Pauli, ayobile ukuti Abakristu babwanaloli bisakumanyiwa nu lughano. (1 Bakorinti 13:1, 8) Pauli ayobile ukuti mbepo mwikemo wisakubatulagha Abakristu ukuti baye nutuyilo utununu, utu tukumanyiwa ukuti “iseke sya mbepo.” Ikyakwanda pa seke isi lo lughano.—Bagalatia 5:22, 23.