OLHOGHONHAẠN AḌIGHAẠGH OLỌ ARUGHUNOTU
Ipẹ Nạ Kaḍeenhaan Ghan Bọ Ephomoghiạn Amatir
Idiphọ asiạ phọ rekị bọ, abuniin abudị m’aalhạn ro/kạr ghan mun koḍeenaan ephomoghiạn amatir siphẹ igbo phọ abidị. Eḍighi maạr dị iphẹn phọ kụ remite siphẹ apinien phọ anyina, pọ nạ kaḍighi ika?
Idị ewạ mọ legheri
Ephomoghiạn amatir eḍighi ni iyaạr dị emhạn maạr iboom, oḍighi idị apinien phọ kakpạr. Idiphọ ewạ bọ ni eḍien r’amuụm oḍighi idị yira komoọgh omhoon aloor, iniin phọ kẹn ni kụ edị ewạ ephomoghiạn amatir okparamị apinien phọ. Ghalamọ r’amem dị apinien phọ m’abia ni, ewạ ni dị olom mọ r’anhịr phọ kogbor ologhoma ghan m’opọ r’odị aalhạn bọ apomoghiạn ni aḅilhẹ rapogh nyinọ.
Egey ephomoghiạn re/wạ ghan ilọ aloor. Rewạ ghan oḅaạl olhoghi ophorị phọ oye phọ. Kụ iḍighi kụ, kparipẹ roḍeenaan ghan ephomoghiạn amatir ogina amem dị oye phọ aloghoma, olom obobọ anhịr dị amhoọgh ogbolomaam ratọph ghan ni kamiịn mem dị rewạ esi ophorị phọ oye phọ, kụ aḍighi angọ.
Anmariịr kụ rogbor ghan k’owạ ephomoghiạn amatir opu burulom. Olom mọ atue ni apomoghiạn anhịr phọ odị k’epẹ ekpom mọ. Kuolọ, eḍighi maạr dị odị aḍeenaan ghan ephomoghiạn emhiighom obobọ eekuna aḍio phọ bịn, obobọ mem dị bidị rowạ orolạn esi, ketue ni eḍighi idị anhịr phọ ka/kạr aloghoma mọ olom mọ akạr ri amoọgh ogbolomaam akị esi odị. Enighẹ ghụn oḍeenaan ghan ephomoghiạn torobọ aḍio r’amem.
Idị nạ kaḍighi
Ḍeenhaan ghan ephomoghiạn amatir esi ikpo onhụ. Iyạl ikpo ikpo-onhụ idiphọ “Mị aphomoghiạn ni nyinạ” obobọ “Nạ amạn agey maạr esi amị” ketue ni eḍighi iyaạr dị olom obobọ anhịr phọ anạ kaloghoma mọ nạ amaghamị ni nyinọ maạr.
Aḍinị olhogh dị odi siphẹ aBaibul phọ: “Ipẹ edi bọ ologhi phọ oye kụ edị odị rakaạph ghan kamiteom.”—Matiu 12:34.
Oroma: Ka/ḍeenaan ghan ephomoghiạn amatir esi oghaaphọm onhụ bịn. Gẹ ghan—alhọgh olhoghi aḍinyạ, olhoghi akomputa, obobọ olhoghi afon.
Ḍeenhaan ghan ephomoghiạn amatir esi oḍighi oḍeenhaan. Otọ ghan amem oḅol, okpụn, obobọ ookpaphaghạn araghaạgh, keḍeenaan mọ nạ ragbạ ghan ni agey mem dị nạ aḅẹm mọ “Mị aphomoghiạn ni nyinạ.” Kotue kẹn ni oḍeenhaan ogey ogbolomaam esi omhaạr ghan oopholiọn, oyịgh ophogh, obobọ otọ ghan amem oghoonaan iyaạr. Kokaạph aani ika ilọ ologhonaạn ghan aḍighaạgh anhịr phọ anạ—eeni ophamanaạn okuru, oghughuronaan eghuugh, ootolonaan ghan asigbagbạ, ootolonaan arukpe, obobọ osạ eḍien? Esi ibadị anmariịr, iphẹn phọ i/ḍighi oopho ologhonaạn aḍighaạgh bịn—eḍighi oḍighi oḍeenaan ephomoghiạn amatir!
Aḍinị olhogh dị odi siphẹ aBaibul phọ: “ku/pomoghiạn ghan ephomoghiạn onhụ r’onhụ; eḍighi ghụn egey ephomoghiạn dị komiịn ghan siphẹ eḍighinom iyaạr phọ ayira!”—1 Jọn 3:18.
Oroma: Zoọm ghan anhịr obobọ olom mọ anạ eten phọ epẹ nạ azoọm ghan bọ eḅẹl amem mọ nyina elhegherian bọ.
Imoọgh ghan mem dị nyina kekaaphạn. Nyina egbor ghan elhọgh mem eghaạph ghan, kekparamị pinien phọ anyina, eḅilẹ eḍeenaan olom obobọ anhịr phọ anạ mọ nạ rakelọm ghan ni orọl r’odị. Okạr oghaạph, rekpạr ghan ni omhoọgh amem oḍighi iduọn phọ, eḍighi maạr dị nyina emoọgh ibạm anmụny obobọ ibadị araraạr oḍighi. Eḍighi maạr dị eḍighi idiphọ, pọ ghalamọ orelhe oogboronụ aani bịn ketue ni elọgh ḍighaạgh—iyạl phọ anyina bịn.
Aḍinị olhogh dị odi siphẹ aBaibul phọ: “obọ nyina esọn ghan ipẹ esooran bọ kụ esighẹ.”—Filipai 1:10.
Oroma: Abuniin aburulom r’anmariịr dị ro/moọgh ghan eepoogh rogbor ghan kophighi mem dị bidị komite aani idiphọ olom r’anhịr, “ḍughul” obobọ “eekuna awiki” phọ.
Legheri olom obobọ anhịr phọ anạ. Eten phọ epẹ olom mọ obobọ anhịr phọ raloghoma ghan bọ ephomoghiạn egbatanaạn ni. Puru olom obobọ anhịr phọ anạ mughumọ eten phọ epẹ nạ raḍeenaan ghan bọ ephomoghiạn phọ ekasiạn ni obobọ i/kasiạn. Nạ ropuru olegheri, kụ akparaghạ oḍighi ipẹ dị rawạ bọ. Legheri mọ, ephomoghiạn amatir emạn ni maạr agey, oḍighi idị apinien phọ kamiigh.
Aḍinị olhogh dị odi siphẹ aBaibul phọ: “Ephomoghiạn . . . re/wạ ghan ilọ aloor bịn.”—1 Korịnt 13:4, 5.
Oroma: Kparipẹ dị nạ kụ kaatughianạm ghan nyodị, puruan loor anạ mọ, ‘Mị kaḍighi eeghe iyaạr dị keḍạ anhịr obobọ olom mọ amị oḍeenaan amị ephomoghiạn amatir?’