Na maga 35,000 Testigo de Jehova quien ta queda na Germany y na maga nacion que bajo na control del Nazi, tiene maga 1,500 kanila quien ya muri durante el tiempo de Holocaust. Nuay detalle si cosa el causa del muerte del cuanto kanila. Ciendo ta continua pa el investigacion, posible que hay cambia pa el numero si cuanto el ya muri y hay tiene pa otro maga detalle.

•  Cosa el causa del diila muerte?

•  Porque ya persigui kanila?

•  Onde sila ya muri?

•  El cuanto de aquellos quien ya muri

•   Ya mata kanila: Cerca llega 400 maga Testigo de Jehova el ya muri na Germany y na maga nacion que bajo na contro del Nazi. Ya lleva na corte con el mayoria del maga victima, ya sentencia kanila muerte y ya curta el cabeza. Mientras con el otro, nuay mas lleva na corte, sino ya tira o ya hace bitay kanila.

•   Grabe situacion na preso: Mas de 1,000 Testigo de Jehova el ya muri na maga concentration camp y preso del Nazi. Ya forza kanila manda trabaja hasta muri sila. El otro ya muri por causa na torture, hambre, sobra frieldad, enfermedad o gendeh ta puede dale el diila medical necesidad. Por causa na brutal tratamiento que ya experiencia sila, el otro ya muri nuay lang dura despues kanila larga.

•   Otro maga causa: El cuanto maga Testigo de Jehova ya muri na maga gas chamber, na maga experimento que tiene que hace na medicina o na lethal injection.

 Ya persigui con el maga Testigo de Jehova cay ta sigui sila con el maga enseñanza na Biblia. Cuando el Nazi ya manda kanila hace cosas que ta prohibi na Biblia, nuay sila conforma. Ya iscuji sila “obedece con el Dios, y gendeh con el maga gente.” (Maga Actividad 5:29) Considera el dos ejemplo de este.

1.   Ta esta neutral na politica. Igual na maga Testigo de Jehova na maskin cosa nacion ahora, el maga Witness que bajo na rulanza del Nazi ya esta neutral na maga cosas que tiene que hace na politica. (Juan 18:36) Por causa con ese, nuay sila

   •   Sirvi na militar o suporta na maga guerra.​—Isaias 2:4; Mateo 26:52.

   •   Vota na eleccion o queda parte del organizacion del Nazi.​—Juan 17:16.

   •   Saluda con el swastika o habla “Heil Hitler!”​—Mateo 23:10; 1 Corinto 10:14.

2.   Ta demonstra diila fe. Maskin pa ya prohibi con el maga Testigo de Jehova que demonstra el diila fe, ya continua siempre sila

   •   Man junto para reza y adora con Jehova.​—Maga Hebreo 10:24, 25.

   •   Predica con el mensaje del Biblia y distribui maga publicacion que base na Biblia.​—Mateo 28:19, 20.

   •   Dale mira pagka-bueno con el diila projimo, incluido el maga Judio.​—Marcos 12:31.

   •   Para duro na diila fe; nuay sila conforma firma con el documento que ta indica que ta abandona sila con el diila creencia.​—Marcos 12:30.

 Si Professor Robert Gerwarth ya habla que el maga Testigo de Jehova amo “el solamente grupo na Third Reich con quien ya persigui por causa lang na diila creencia.” a Aquellos igual kanila preso na concentration-camp yan bilib con el maga Testigo de Jehova por causa na diila fuerte fe. El un preso de Austria ya habla: “Gendeh sila ta participa na guerra. Mas iscuji pa sila que kanila mata contra tiene sila con quien mata.”

•   Na maga concentration camp: Mayoria na maga Testigo de Jehova ya muri na maga concentration camp. Ya hace kanila preso na maga campo igual na Auschwitz, Buchenwald, Dachau, Flossenbürg, Mauthausen, Neuengamme, Niederhagen, Ravensbrück y Sachsenhausen. Na Sachsenhausen pa lang, ya puede confirma que cerca 200 Testigo de Jehova el ya muri.

•   Na preso: Yan torture con el cuanto maga Witness na preso hasta muri sila. Ya muri el otro cay ya gulpia kanila durante el interogacion.

•   Na maga lugar donde kanila ya mata: Manada maga Testigo de Jehova con quien ya mata na maga preso na Berlin-Plötzensee, Brandenburg y Halle/Saale. Puera con ese, asegun na record, tiene pa otro 70 locacion donde ya mata con el maga Witness.

•  Nombre: Helene Gotthold

   Lugar onde ya mata: Plötzensee (Berlin)

   Manada beses ya arresta con Helene, un mujer quien tiene dos anak. Del 1937, ya maltrata gayot con ele durante el un interogacion y por causa con ese, ya malpari le. Del Deciembre 8, 1944, ya curta con el de suyu cabeza por medio de guillotine na preso na Plötzensee, Berlin.

•  Nombre: Gerhard Liebold

   Lugar onde ya mata: Brandenburg

   Del Mayo 6, 1943, ya curta el cabeza de Gerhard, 22 año el edad. Ya sucede este dos año despues curta el cabeza de suyu tata na mismo preso. Ya escribi le na carta para na de suyu familia y fiancée: “Si nuay el ayuda del Señor, gendeh yo este puede aguanta.”

•  Nombre: Rudolf Auschner

   Lugar onde ya mata: Halle/Saale

   Diez y siete año pa lang si Rudolf cuando ya curta con el de suyu cabeza del Septiembre 22, 1944. Na de suyu carta para na de suyu nana, ya escribi le: “Manada maga hermano quien ya hace igual decision y este tambien el cosa yo iscuji.”