Jarmaneeninne Jarmanee haariyo biittatun deꞌiya 35,000 Yihoowa Markkatuppe 1,500 gidiyageeti naaꞌꞌantto alamiya olaa wode hayqqidosona. Hegan amaridaageeta eti worido gaasoy erettenna. Hegaara gayttidaagan eranchchati pilggiiddi deꞌiyo gishshawu, paydotinne hara naqaashati sinttappe laamettana danddayoosona.

•  Eti waani hayqqidonaa?

•  Eta yedetay gakkidoy aybissee?

•  Eti hayqqido sohoy awanee?

•  Woridoogeetuppe amaridaageeta

•   Hayquwa pirddaa: 400 gidiya Yihoowa Markkati Jarmaneeninne Naazee haariyo biittatun hayqqidosona. Etappe dariya baggati pirdda keettay hayquwa pirddin siifettidosona. Harata qassi pirdda keettaa shiishshennan tokkosidi woy sullidi woridosona.

•   Meqetti baynna qashuwa: Naazeti asaa gurddiyo kambbetuuninne qasho keettatun 1,000ppe dariya Yihoowa Markkati hayqqidosona. Eti wolqqaama oosuwa oottiyogan, shochchan, namisan, meeguwan, harggiyan, woy akkamuwa xayiyogan hayqqidosona. Harati qassi eta gakkida meqetti baynna qohuwappe denddidaagan, Naaꞌꞌantto Alamiya Olaa wurssettan birshshettidi gamꞌꞌennan hayqqidosona.

•   Hara gaasota: Issi issi Yihoowa Markkati asaa marzziyan woriyo sohotun, xalee pattiyakko aggiyakko paaccanawu dottoreti eta caddin woy mitissin, woy eta woriya xaliya caddin hayqqidosona.

 Yihoowa Markkata yedetay gakkidoy eti Geeshsha Maxaafay yootiyobaa oosuwan peeshshiyo gishshataassa. Yihoowa Markkati Geeshsha Maxaafan digettidabaa oottanaadan Naaze kawotettay oychchido wode eti hegan maayettennan ixxidosona. Eti “asau azazettanaappe Xoossau azazettanau” dooridosona. (Oosuwaa 5:29) Eti hegaadan doorido naaꞌꞌu ginata beꞌa.

1.   Polotikaaban oossinne exatennan deꞌiyogaa. Ha wodiyan ubba biittatun deꞌiya Yihoowa Markkatuugaadan, Naaze haaruwan deꞌida Yihoowa Markkati polotikaaban oossinne exatibookkona. (Yohaannisa 18:36) Hegaa gishshawu eti kaallidi deꞌiyabata oottennan ixxidosona.

   •   Wotaaddara gidiyogaa woy olan hashetiyogaa.—Isiyaasa 2:4; Maatiyoosa 26:52.

   •   Dooruwa wode dooriyogaa woy Naaze dirijjite yara gidiyogaa.—Yohaannisa 17:16.

   •   Naaze yamiya malaatawu ziggiyogaa woy “Hayil Hitler!” (ashshiyaagee Hitlera) giyogaa.—Maatiyoosa 23:10; 1 Qoronttoosa 10:14.

2.   Eti ammaniyobata oottiyogaa. Eti ammaniyobata oottennaadan kawoy diggiyaba gidikkokka, Yihoowa Markkati

   •   Woosawunne goynuwawu shiiqiyogaa.—Ibraawe 10:24, 25.

   •   Geeshsha Maxaafaa kiitaa sabbakiyogaanne Geeshsha Maxaafaa qofay deꞌiyo xuufeta asawu immiyogaa.—Maatiyoosa 28:19, 20.

   •   Ayhudata gujjin bantta shoorotussi kehatettaa bessiyogaa.—Marqqoosa 12:31.

   •   Eti bantta ammanuwa kaddidoogaa bessiya qitsiyan paramennan ixxiyogan bantta ammanuwa mintti oyqqiyogaa aggibookkona.—Marqqoosa 12:30.

 Robert Gerworzza geetettiya profeeseree “Naaze haaruwan deꞌiya ubba asaa giddon eta ammanuwa gaasuwan yedetay gakkido citay” a Yihoowa Markkatu xalla yaagiis. Asaa gurddiyo kambbiyan Yihoowa Markkatuura qashettidaageeti eti minni eqqidoogaa beꞌidi Yihoowa Markkata nashshidosona. Osttiriya biittaappe qashettida issi bitanee, “eti olawu bookkona. Eti oonanne woriyogaappe banttawu hayqqiyogaa dooroosona” yaagiis.

•   Asaa gurddiyo kambbiya: Yihoowa Markkatuppe daroti asaa gurddiyo kambbiyan hayqqidosona. Eti Awushiwitis, Bukenvald, Daaka, Flosenberg, Mawutasen, Neyungame, Niderhagen, Ravensbrukenne Zaksenhawuzen geetettiya asaa gurddiyo kambbetun qashettidosona. Zaksenhawuzen giyo kambbiya xallan 200 gidiya Yihoowa Markkati hayqqidoogee erettiis.

•   Qasho keettan: Issi issi Yihoowa Markkati qasho keettan shocishin hayqqidosona. Harati qassi eta qoridi oychchiyo wode gakkida qohuwappe denddidaagan hayqqidosona.

•   Hayquwa qixaatee polettido sohota: Yihoowa Markkatuppe daroti hayqqidoy, Berline-Plozensen, Brandenbergeeninne Haale woy Saale qasho keettaana. Hegaa bollikka, Yihoowa Markkata worido hara 70 gidiya sohoti xaafettidosona.

•  Sunttaa: Helen Gotiholdo

   Hayqqido sohuwa: Plozense (Berline)

   Azina machchonne naaꞌꞌu naatu aayo gidida Helena darotoo qashettaasu. Qoriyageeti O keehi qohido gishshawu 1937n A boshettaasu. Tisaase 8, 1944n Berlinen Plozense qasho keettan gilootiine giyoban siifettaasu.

•  Sunttaa: Gerhard Liyebolda

   Hayqqido sohuwa: Brandenberge

   Awu layttay laatamaa gidido Gerhard Uddufune 6, 1943n, naaꞌꞌu layttaappe kase A aaway siifettido qasho keettan siifettiis. I bantta soo asaanne ba giigissido naꞌiyo saro deꞌite gaanawu xaafido dabddaabbiyan, “Goday wolqqaa immennaakko taani hagaa oottana danddayikke” yaagiis.

•  Sunttaa: Rudolf Awuschenera

   Hayqqido sohuwa: Haale woy Saale

   Masqqala 22, 1944n Rudolfi siifettiyo wode awu layttay 17. I ba aayyiyo saro deꞌa gaanawu xaafido dabddaabbiyan, “Daro ishantti hagaadan oottidosona; yaatiyo gishshawu taanikka oottana” yaagiis.