Mi born lo Ciudad Obregón lo north Mexico. Mami bornem naenfala pikinini and mi nao mek-faev pikinini. Mifala stap klosap lo taon wea dadi blo mi lukaftarem wanfala smol farm. Hem naes ples for stap and famili blo mi stap gud and hapi lo there. Bat sorre nao, taem mi faev year nomoa, wanfala big cyclone kam and barava spoelem datfala farm and mifala mas muv go lo nara taon.

 Gogo dadi blo mi kasem staka selen. Bat lo semtaem hem savve drink tumas. Diswan spoelem marit blo hem and mifala olketa pikinini. Mi and tufala brata blo mi start smoke and stealim olketa cigarette from dadi. Firstaem mi drunk hem taem mi six year old nomoa. No longtaem bihaen, mami and dadi separate and olketa wei blo mi kamap moa worse.

 Mami tekem mi and olketa brata and sista blo mi witim hem taem hem go stap witim nara man. Datfala man no givim eni selen lo mami and mifala no kasem inaf selen from waka wea mami hem duim. So mifala pikinini duim samfala waka, bat mifala no kasem inaf selen fitim need blo mifala. Mi savve polishim olketa shoe and salem bred, gum, and olketa nara samting. And mi savve wakabaot lo taon and luk insaed olketa rabis bin blo olketa rich pipol for faendem eni kaikai.

 Taem mi ten year, wanfala man askem mi for waka witim hem lo ples wea pipol torowem rabis. Mi willing for waka witim hem so mi finis skul and lusim famili. Hem peim mi klosap wan dollar each day and givim mi kaikai wea hem faendem lo rabis. Mi sleep lo ples wea mi wakem from olketa material wea mi faendem lo rabis. Pipol lo there savve tok swear and durong. Plande lo olketa savve tekem olketa drug and drink tumas. Hem barava nogud and evri naet mi savve krae bikos mi fraet. From mi poor and no skul gud mi savve feel barava iusles. Mi stap lo datfala ples for torowem rabis for samting olsem thrifala year, and then mi muv go lo nara province lo Mexico. Lo there mi savve waka lo planteison for pikim olketa flaoa and cotton, hipimap sugarcane, and harvestim olketa potato.

 Fofala year bihaen, mi muv go bak lo Ciudad Obregón. Wanfala aunty blo mi wea hem wanfala kastom doctor letem mi stap lo wanfala rum lo haos blo hem. Mi start for garem olketa nogud dream lo naet and mi feel wikdaon and laek for suisaed. Wanfala naet mi prea olsem lo God: “Lord, sapos iu stap, mi laek savve lo iu and worshipim iu for olowe. Sapos wanfala tru religion stap mi laek for savve lo hem.”

 Mi evritaem laek for savve abaotem God. Nomata mi smol pikinini, mi go lo plande difren church bat mi no hapi lo eniwan lo olketa. No eniwan lo olketa story staka abaotem Bible or helpem mi for savve moa abaotem God. Samfala church hia mekhae lo selen nomoa, and pipol wea go lo olketa nara church savve durong.

 Taem mi 19, wanfala brata-in-law blo mi talem mi hao Olketa Jehovah’s Witness showim hem wanem Bible talem abaotem wei for iusim olketa idol lo worship. Hem readim Eksodas 20:4, 5 lo mi. Datfala scripture sei iumi mas no wakem olketa idol. Verse 5 hem sei: “Yufala mas no bendaon long eni tambu kaving olsem fo wosipim, bikos mi [Jehovah], God blong yufala, mi barava les fo yufala tinghevi long eni narafala god moa.” Then brata-in-law blo mi askem mi, “Sapos God iusim olketa idol for duim olketa mirakol and hem laekem iumi for iusim olketa idol for worshipim hem, why nao hem tambuim wei for iusim olketa idol?” Datfala kwestin mekem mi laek savve lo ansa. Bihaen, mitufala savve storyim staka samting abaotem Bible. Mi barava enjoyim datwan.

 Gogo hem tekem mi lo wanfala meeting blo Olketa Jehovah’s Witness. Mi tinghae lo wanem mi herem and lukim lo there. Olketa young wan tu tekpart lo meeting and givim olketa gudfala tok lo stage! Mi ting olsem, ‘Olketa kasem barava gudfala education lo hia!’ Olketa Witness barava welkamim mi nomata mi garem long hair and mi no luk klin. Bihaen meeting wanfala famili invaetem mi for go kaikai lo haos blo olketa tu!

 Taem mi studyim Bible witim olketa Witness, mi lanem hao Jehovah God hem wanfala Dadi wea lovem iumi nomata sapos iumi poor, no skul gud, or wanem kantri iumi kam from or living wea iumi garem. Hem no favorim eniwan. (Acts 10:34, 35) Bifor mi no savve feel hapi and hem olsem mi no kasem wanfala important samting lo laef, bat distaem mi hapi tumas bikos mi savve gud lo God.

 Evri samting lo laef blo mi hem kamap moabeta! Mi stop smoke, mi no drink tumas, and mi no savve tok swear nao. From taem mi smol, mi feel nogud lo wanem hem happen lo mi, bat datfala feeling hem start for lus and olketa nogud dream tu hem stop. And for longfala taem mi feel iusles bikos mi no skul gud and bikos lo olketa nogud samting wea happen lo mi taem mi smol. Bat distaem mi no feel olsem.

 Mi marit and waef blo mi lovem Jehovah and barava sapotim mi. Distaem mi wanfala traveling overseer blo Olketa Jehovah’s Witness, and mitufala visitim olketa kongregeson for encouragem and teachim olketa spiritual brata and sista blo mi. From nambawan education wea God givim lo iumi and wei wea Bible barava helpem mi, mi no feel iusles distaem.