Neyana ngà ta siudad na Calgary ta Alberta, Canada. Nassina i magana ku turi ta beybi ngà pagalaman, tapus naddiakkami ngana na yenà ta balay na kakay anna kako ku. Iddukaddakami ni yenà, anna kuruga magayayya ngà ta kabbikku. Ari ku makattaman yatun nga memammo nga tiempo ta kabbikku.

 Ngem turi ta pitu i dagukku, nanguli i situasiokku. Nakkasal uli si yenà anna si yamà tapus nagali kami ta St. Louis, Missouri ta United States. Maporay balo si yamà. Angngarigan na, na-bully ngà ta ollu nga aggaw ku ta bagu nga eskuelà, ngem ari ngà nga nabbali. Tapus ta pallabbe ku, nakannammuan yatun na yamà. Nappoporay yayya tapus sinuntu nà! Mas mataki paga yatun anne ta kingngua niakan na kaeskuelà. Megafu tatun, nagigiammù i makissuntu maski nu pitu pagalaman i dagukku.

 Minappata-patu si yamà, yayya nga makaporay gapa si yenà anna ari yayya nga magayayya. Tapus kanayun ira nga makkinna-kulle. Turi ta 11 anios ngà, naddroga ngà anna nagillellaw. Nabbalin ngà nga mas agresibo anna kanayun ngà nga makissuntu. Tapus turi naggradua ngà ta haiskul, vayolente ngà ngana.

 Turi ta 18 i dagukku, nat-training ngà ta U.S. Marine Corps. Nagigiammù tatun nu kunnasi i mamatay. Tapus kabalin na lima ragun, nanaw ngà tatun tapenu maggigiammu tu psychology. Kayà ku gare i mattrabahu ta Federal Bureau of Investigation. Naggigiammu ngà ta tadday nga unibersidad ta United States tapus nituloy ku i paggigiammù ta panolì ta Canada.

 Mas nadismaya ngà ta totolay megafu ta nagigiammù. Makasarili ira, awan tu sesserbi na ngamin ta mundo, anna gitta na awan ngana tu solusion na problema na totolay. Ari ngà ngana mangurug nga mapakasta paga na totolay i mundo.

 Gitta na awan tu direksion na pattolè. I kayà ku ngana laman ay binarayang, droga, kuartu, anna sex. Kanayun ngà nga maki-party anna maki-sex ngà ta nadduruma nga babbay. Masikan i nono ku megafu ta training ku bilang suddalu. Yayya nga kanayun ngà nga makissuntu. Komfruntakku i maski sinni nga ari nga patas i pattratu na ta tanakuan. Abbo ku nu fustu yatun nga kukukuakku. Ngem mas nabbalin ngà lallagu tu aripan na kinavayolente.

 Mittan, naka-high kami ta drugs na kofukku ta basement na balè. Iprepara mi i ilegal nga shipment na marijuana nga melaku, tapus niyavu na kofukku nu mangurug ngà ta Dios. Nakagì sa, “Nu Dios i makalliwa ta pazziga-riga ta mundo, manaki ku nga mammammu yayya!” Ta kommanan na, ta ollu nga aggaw ku ta bagu nga trabahù, niyavu niakan na katrabahù nga Saksi ni Jehova, “Para nikaw, Dios kari i makalliwa ta pazziga-riga ta mundo?” Nakaddag ngà tatun. Yatun mismu i kinagì turi tadday nga aggaw anna kayà ku nga mas mammuan i meyannung tatun. Ta tumunug nga annam nga vulan, aru i nabbidammi anna nipasingan na niakan i tabbag na Biblia ta karuan nga mariga nga pakkiavu ku meyannung ta pattolay.

 Mal-live in kami ngana na nobià tatun nga tiempo. Ngem manaki na nga iyistorià nisa i magiggigiammù. Tapus tadday nga Liggu, kinagì nisa nga inimbità i Saksi ira ta balemi tapenu i-Bible study da kami. Ngem ta tumunug nga aggaw pallabbe ku maggafu ta trabahu, awan ngana i ngamin nga gamit mi ta balay. Pinanawan nà na nobià. Nallawan ngà anna siminangi ngà. Nakimemallo ngà gapa ta Dios nga uffunan nà nakuan. Tatun i ollu nga pinangusà ta personal nga ngagan na Dios nga Jehova ta pakimallo ku.—Salmo 83:18.

 Kabalin na dua nga aggaw, nappa-Bible study ngà ta magatawa nga Saksi. Ta panaw da, nitulu-tuloy ku nga bibbigan i libru nga You Can Live Forever in Paradise on Earth. Tapus binala-balikku yatun adde ta gabi. a Talaga nagustuakku i nagigiammù meyannung kani Jehova nga Dios anna ta Ana na nga si Jesu-Cristo. Nammuakku nga minangngikabbi si Jehova anna matakitan yayya nu mazziga-riga ittam. (Isaias 63:9) Talaga naappresià i aya na Dios ta niakan anna i sakrifisio nga kingngua na Ana na. (1 Juan 4:10) Napakurug ku nga pasa-pasensian nà ni Jehova ta “arian na nga ikaya tu egga i madaral, ngem ikaya na tu pallikuran na ngamin nga totolay i katagaruliad-da.” (2 Pedro 3:9) Natageno ku nga kayà ni Jehova nga makikkofun niakan.—Juan 6:44.

 Tatun mismu nga ligguan, namegafu ngà ngana nga makistudy. Apaddu i vu ku, agga-aritu ngà, tapus kappaganassing i itchurà. Ngem grabe i sippo na Saksi ira. Trinatu dà nga gitta na kafamilia da nga nabayag da ngana nga ari nasingan. Masingan ta kondukta da nga kurug ira nga Cristiano. Gitta na nakalabbe ngà uli ta balay ni kakay anna kako ku, ngem mas paga nga makasta.

 Ari nabbayag, sisinu nga nanguli i pattolè megafu ta magiggigiammù ta Biblia. Nakiyosi ngà, niyemmakku i imoral ira nga kukukuakku, i paddroga, anna i pagillellaw. (1 Corinto 6:9, 10; 11:14) Kayà ku nga mapagayayya si Jehova. Yayya nga nu magigiammù nga ikalussaw ni Jehova i kukukuakku, ari ku nga irasonan yatun. Matageno ku lallagu nga gitta na madudduddug i futù. Kukku ta baggì, ‘Mawag tu iyemmakku ngana yaw.’ Talaga ikagumakku nga ulian i appana-panono anna i konduktà. Megafu tatun, natageno ku nga nakkasta i pattolè turi ta kingnguà i ipakua ira ni Jehova niakan. Tapus turi Hulio 29, 1989, annam nga vulan kabalin na ollu nga pinab-Bible studỳ, nabawtisowan ngà bilang tadday ta Saksi ira ni Jehova.

 Inuli na Biblia i personalidad ku. Dati bi nga vayolente ngà nu komfruntan nà na marake nga tolay. Ngem ikagumakku ngana sangawe nga mabbalin tu “memammo ta ngamin nga totolay.” (Roma 12:18) Mappappabalo ngà kani Jehova ta nanguli ngà megafu ta Uvovug na anna ta masanto nga espiritu na.—Galacia 5:22, 23; Hebreo 4:12.

 Ari ngà ngana nga aripan na droga, kinavayolente, anna imoral ira nga pakkaraga. Ikakkagumakku ngana sangawe nga pagayayyatan si Jehova nga Dios anna iyayawa ku i kapianakku nisa. Nelagum ngana tatun i panguffukku ta tanakuan tapenu makannammuadda yayya. Piga dagun kabalikku nga nabawtisowan, nagali ngà ta tanakuan nga lugar tapenu manguffun ta pallayyagayya turi ira ta mas dakal i pakawagan. Ta pappasa na aru nga dagun, magayayya ngà ta sinudduakku i aru nga totolay anna masingakku nu kunnasi gapa nga pinakasta na Biblia i pattoleda. Magayayya ngà ta Saksi ni Jehova ngana gapa i yenà. Awayya na nga nakoffun nisa i nasingan na nga makasta nga panguli ta ugalì anna konduktà.

 Turi ta 1999, ta El Salvador, naggradua ngà ta eskuela nga magalan ngana sangawe tu School for Kingdom Evangelizers. Nasanay anna natudduan ngà tatun nu kunnasi nga irollu i trabahu nga pallayyagayya anna nu kunnasi nga tudduan anna ipastoran i kongregasion. Tapus tatun gabbalaman nga dagun, inatawà i masippo nga sister nga si Eugenia. Makkavulu kami ngana nga mallayyagayya tu full time ta Guatemala.

 Sangawe, ari ngà ngana nga dismayadu ta pattolay. Kuruga magayayya ngà ngana. Megafu ta iyap-aplikà i ituttuddu na Biblia, ari ngà ngana nga aripan na seksual nga imoralidad anna kinavayolente. Aru ngana i kurug nga mangiddu niakan anna memammo i pattolè.