Uzye Leza Wawomvizye Ukupiluka pa Kwelewula Ivya Wumi?
E Baibolo yasuko lyo-o iwuzyo ukuti
Awe. Ikalanda ukwasowa nu kupita mu mbali ukuti e Leza welewuzile awantu, ivinyamana ni vimelwa a “ivya misango na misango.” (Intaliko 1:12, 21, 25, 27; Ukuwumbulika 4:11) Yikalanda nu kuti swensinye twafuma ku wakwasi witu awakutalicilapo e Adamu ne Eva. (Intaliko 3:20; 4:1) E Baibolo isitunjilila icisambilizyo ca kuti e Leza wawomvizye ukupiluka kwa vintu pa kwelewula ivya wumi. Swinya isikanya wo-o vino wasayansi wakalanda ukuti ica wumi icili consinye capusana ni ciwuye mukasi. b
Uzye e Leza Wawomvizye Ukupiluka?
“Awantu wano wasuwila ukuti e Leza wawomvizye ukupiluka pa kupanga ivintu, wamanya ivipusane pusane pe vino wacisile.” Ibuku lye Encyclopædia Britannica, lyalanda ukuti: “awantu wamwi wasuwila” ukuti “wo-o vino ivintu vyawa mumawumba mawumba, anzila yonga yino Leza wawonvizye pa kwelewula ivintu munsi.”
Mucisambilizyo cino awantu wakalanda ukuti ivintu vyapilusilevye mwasazyamo na vyo-o:
Ivyawumi vyosinye vyafumile kuvyelewulwa ivyakali nkaninye vino vyakolana navyolivyo.
Wamwi wazumila ukuti icintu conga cingapilucila mucintu cinji icipusaneko, kucakulolelako wakasambilizya ukuti e kolwe angapilucila mu muntu.
E Leza awino walenga ukuti kuwe vyosinyene vyo-o.
Uzye icisambilizyo ca kuti ivintu vyapilusile vye cikakwivwana ne Baibolo?
Icisambilizyo ca kupiluka, cikalanjizya ukuti vino Baibolo yikalanda mwi buku lya Intaliko avya wufi. Lelo nanti ciwe wo-o e Yesu walanzile ukuti vino vyawa mwi buku lya ntaliko avyacisinka. (Intaliko 1:26, 27; 2:18-24; Mateyu 19:4-6) E Baibolo yikalanda ukuti, pano e Yesu atani ayize mu nsi walinji kwi yulu ne Leza. Swinya wamwavwizyeko nu kwelewula “ivintu vyonsi.” (Yohani 1:3) Fwandi ukwasowa nu kuvwilika, icisambilizyo cakuti e Leza wawomvizye ukupiluka pa kwelewula ivintu vyonsinye, cisikwivwana na vino Baibolo yikalanda.
Uzye wo-o vino ivimelwa ni vinyama vikafuma muno vyawela nukuya mu cintu cinji pa kuti vitwalilile ukuwako, acilanjililo ca kupiluka kwa vintu?
E Baibolo yitalondololapo pe vino ivyelewulwa vikapiluka ukufuma muno vyawela nu kuya mu vintu vinji. Swinya yisipilikana nicisinka ca kuti e Leza welewuzile ivimelwa ni vinyama pakuti viwafuma muno vyawela nukuya mu cintu cinji pa kuti vitwalilile ukuwako. Nanti acakuti awantu wakalola wo-o vino ivintu vikafuma muno vyawela ukuti akupiluka, pasiwa umusango wunji uwacawumi wuno wukapangwa.
Mungakunda na vyoo
AMASAMBILIZYO YA MU BAIBOLO AMACINDAME
Uzye Iyulu ni Nsi Vyelewuzilwe?
Awavule wakapotwa ukwivwicisya ilyasi lya mu Baibolo lino likalanda pa kwelewulwa ne wamwi wakalola vye ngati akiili. Uzye kweni tungasuwila vino e Baibolo ikalanda pe vino calinji pakuti iyulu ni nsi viweko?
PAMWI WAYIKOLOWOZYAPO UKUTI
Uzye Ivintu Vyelewuzilwevye Nanti Vyapilusilevye?—Uluwali 3: Amulandu ci Wuno Nazumilila Ukuti Ivintu Vyelewuzilwevye?
Uzye nga wazumila ukuti ivintu vyelewuzilwe vye lyo uzipizile ukusula vino sayasi yikalanda?
AMAWUZYO YANO AWANTU WAKAWUZYAPO SANA
Uzye Inte zya kwe Yehova Wazumila Mukuti Leza Wapanzile Insi mu Manda 6 aya Maawazi 24?
Uzye mwamanya kuno vimwi vino wakasambilizya pakuti insi yapanzilwe mu manda 6 aya amaawazi vyapusana na vino Baibolo ikasambilizya?
PA NTE ZYA KWE YEHOVA
Lengani uwa Kumitandalila
Lanzyani pi wuzyo lino mwakwata pe Baibolo, nanti sambililani na vinji pa Nte zya kwe Yehova.