Maʼuk. Te Biblia ya yal ta jamal te Dios la spas te ants winiketik sok spisil ta chajp te bintik kuxajtik a jich bitʼil te chambalametik o te jaʼmal teʼetik (Génesis 1:12, 21, 25, 27; Apocalipsis 4:11). Te Biblia ya yal te spisil te ants winiketik talemik ta stsʼumbal te Adán sok te Eva (Génesis 3:20; 4:1). Te Dios maba ta swentauk evolución la schiknajtes tal spisil te bintik kuxajtike, melel ma jichuk ya yal te Biblia. Jaʼukmeto, maba ya skontrain te bin staoj ta ilel te ciencia ta swenta te ay ya xjelon te jujunchajp bintik kuxajtike. b

•  ¿Bin schʼuunejik chaʼoxtul ants winiketik?

•  ¿Pajalbal te bin ya yal te Biblia sok te bin ya yichʼ alel ta swenta te evolucione?

•  Te bitʼil ya xkʼayik ta kuxinel te banti ayik te jaʼmaletik sok te chambalametik ¿jaʼbal ya skʼan ya yal te ya xkʼatpʼujike?

 Te kʼalal ya yalik te ta swenta evolución te Dios la schiknajtes tal spisil te bintik aye bayal bin ya skʼan ya yal. Te Encyclopædia Britannica jich ya yal ta swenta-abi: «Te bitʼil ya xkʼayik ta kuxinel te banti ayik te chambalametik sok te jaʼmaletik, jaʼ ya stuuntes te Dios yuʼun ya skʼatpʼun bael te stsʼumbalike».

 Te kʼalal ya yalik te ta swenta evolución te Dios la schiknajtes tal spisil te bintik aye jaʼnix jich smakojbey skʼoplal ini:

•   Spisil te bintik kuxajtik ta ora ini jun-nax stsʼumbal banti lokʼik tal.

•   Spisil te bintik kuxajtik ya xjuʼ ya xkʼatpʼujik. Jich bitʼil te ya yakʼik ta nopel te kʼatpʼuj ta winik te maxe.

•   Te bintik ya xkʼatpʼuj, jaʼ ya spas te Diose.

 Teme melel te ta swenta evolución te Dios la schiknajtes tal spisil te bintik aye, te bin ya yal te Génesis ta swenta te bintik la yichʼtiklan pasel maba melel yaʼiyel. Pero te Jesús la yalbey skʼoplal te bin ay ta Génesis, jich la yakʼ ta naʼel te yuʼun-nix melel-ae (Génesis 1:26, 27; 2:18-24; Mateo 19:4-6). Te Biblia ya yal te kʼalal mato xtal ta Balumilal-a te Jesuse, kuxul sok Dios ta chʼulchan-a sok te la skoltay ta spasel spisil te bintik aye (Juan 1:3). Jich yuʼun te Biblia maba ya yakʼ ta nopel te ta swenta te evolución te Dios la schiknajtes tal spisil te bintik kuxajtike.

 Te Biblia ma xyal bantito kʼalal ya xjuʼ ya xjelon stsʼumbal te bintik kuxajtike, sok ma xyal jayeb buelta jich ya xkʼot ta pasel. Te Biblia jaʼnix jich ma xyal te jkʼaxel maba ya xjelon te chambalametik sok te jaʼmal teʼetik te kʼalal ya spʼoltes sbaik o te kʼalal ya xjelon te banti ya xchʼiike. Kʼalal ya xjelon jtebuk te stsʼumbalike, ay machʼatik ya yalik te yakʼ ta kʼatpʼujel, pero te bin ya xyanaj jtebuke ma yuʼunuk ya schiknajtes tal yachʼil kuxlejalil.