Muʼyuk. Li Vivliae jamal chal ti Diose la spas krixchanoetik xchiʼuk li jeltos kʼusitik kuxajtike, jech kʼuchaʼal chonbolometik, tsʼiʼleletik o teʼetik (Jenesis 1:12, 21, 25, 27; Apokalipsis 4:11). Jech xtok, chal ti jaʼ snitilulalutik li Adan xchiʼuk Evae (Jenesis 3:20; 4:1). Li Vivliae muʼyuk bu chal ti ta kʼunkʼun kʼataj talel yuʼun Dios li kʼusitike, jech kʼuchaʼal xchʼunojik li yantike. Pe muʼyuk bu tskontrain li kʼusi chal sientifikoetik ti oy ep jeltos ta kʼelel li kʼusitike, manchuk mi ta jtos noʼox stsʼunbal. a

•  ¿Kʼusi tsnop junantik krixchanoetik?

•  ¿Mi jech chal Vivlia ti ta kʼunkʼun kʼataj talel li kʼusitike?

•  Ta skoj ti xuʼ xkuxi ta yan lum li kʼusitike, ¿mi jaʼ van skʼan xal ti te noʼox kʼataj tal stuke?

 Li buchʼutik xchʼunojik ti ta jech noʼox la skʼatajes tal Dios li kʼusitik kuxajtike, jelajtik li kʼusi tsnopik ta sventa taje. Li Encyclopædia Britannica chal ti oy junantik tsnopik ti «li Diose jaʼ la stunes li selección natural b sventa oyuk kʼusitik kuxajtik liʼ ta balumile».

 Xuʼ van tsnopik liʼ xtoke:

•   Skotol li kʼusitik kuxajtike, jmoj stsʼunbal likemik tal (antepasados comunes).

•   Li kʼusitik kuxajtike xuʼ xkʼataj ta yan kuxlejaletik ti jelel tajeke, taje ojtikinbil kʼuchaʼal (macroevolución).

•   Jaʼ onoʼox jech chakʼ kʼotuk ta pasel li Dios taje.

 Ti mi ta jech noʼox kʼataj batel li kʼusitike, maʼuk van melel jechuk li kʼusi chal ta Jenesis ti lik spas kʼusitik li Diose. Pe li Jesuse laj yal ti oy kʼusitik la spas ta slikebal li Diose (Jenesis 1:26, 27; 2:18-24; Mateo 19:4-6). Li Vivliae chal ti kʼalal skʼan toʼox xtal ta balumil li Jesuse, la skolta Dios ta pasel skotol li kʼusitik x-ayane (Juan 1:3). Jaʼ yuʼun, li Vivliae chal ti mu jechuk la spas Dios ti ta kʼunkʼun chkʼataj batel li kʼusitik kuxajtike.

 Li Vivliae chʼabal bu chchapbe smelolal bu to kʼalal xuʼ xjel li kʼusitike o li kʼusitik kuxajtike. Jech xtok, ta skoj ti chjel batel yavil o slumal li chonbolometik o yan kʼusitike, xuʼ xjel ti kʼu yelanike, pe muʼyuk bu chjel li stsʼunbalike xchiʼuk muʼyuk bu ch-ayan yan achʼ kuxlejal. Ta skoj ti chjel batel jutuk li kʼusitik kuxajtike, junantike tsnopik ti ta kʼunkʼun kʼataj batel li kʼusitik oye.