Ẹjo. Baibol na djere phephẹn nẹ Ọghẹnẹ ma ihworakpọ vẹ “dohwo doka” rẹ eranvwẹ kugbe ekankọn. a (Jẹnẹsis 1:12, 21, 25, 27; Ẹvwọphia 4:11) Baibol na tare nẹ ihworakpọ eje emọ rẹ Adam vẹ Ivi, ayen ọsẹ vẹ oni avwanre rẹsosuọ. (Jẹnẹsis 3:20; 4:1) Baibol na rhọnvwephiyọ uyono re se Ọghẹnẹ reyọ erọnvwọn re mamarhe vwọ ma arhọ sansa-an. Vwọrẹ uyota, Baibol na rhọnvwephiyọ oborẹ egbaerianriẹn tare nẹ oka rẹ arhọ sansan yehẹ evunrẹ ẹko rẹ emama vuọvo.

•  Ọghẹnẹ mama erọnvwọn?

•  Baibol na rhọnvwephiyọ uyono rẹ erọnvwọn re mamarhe na?

•  Ẹgba rẹ ekankọn vẹ eranvwe vwo wene ọyen udje rẹ erọnvwọn re mamarhe?

 Ihwo ri segbuyota nẹ Ọghẹnẹ reyọ erọnvwọn re mamarhe vwọ ma erọnvwọn sansan vwo iroro rọ fẹnẹ oboresorọ o vwo ru ọnana. Kirobo rẹ Encyclopædia Britannica tare, “ihwo evo segbuyota nẹ obo ra rhuẹrẹ emama na phiyọ ẹko sansan wan ọyen idjerhe ọvo rẹ Ọghẹnẹ vwo suẹn ayen.”

 Uyono rẹ Theistic evolution ji churobọ si erọnvwọn nana:

•   Emama eje nẹ oma rẹ orọnvwọn ọvo rọ herọ nẹ awanre rhe.

•   Oka rẹ arhọ ọvo se ghwe wene kpo orọnvwọn ọfa dibi dibi, ọke evo e se uyono nana macroevolution.

•   O muẹro nẹ obọ rẹ Ọghẹnẹ yen enana ejobi nurhe

 Uyono rẹ theistic evolution djerephia nẹ ikuegbe rẹ emama rọhẹ Jẹnẹsis ghwa dia gbagba-a. Ẹkẹvuọvo, Jesu tare nẹ ikuegbe rẹ Jẹnẹsis na pha gbagba. (Jẹnẹsis 1:26, 27; 2:18-24; Matiu 19:4-6) Baibol na tare nẹ Jesu ke rhe otọrakpọ na, ọ vẹ Ọghẹnẹ dia obo odjuvwu, ọ je vwẹ ukẹcha kẹ vwọ “mama imu na ejobi”. (Jọn 1:3) Ọtiọyena, uyono rọ tare nẹ Ọghẹnẹ womarẹ erọnvwọn re mamarhe vwọ ma arhọ sansan na rhọnvwephiyọ iyono rehẹ Baibol na-a.

 Baibol na ghwe djunute oborẹ ẹko rẹ emama se wene wa-an. Ọ je vwọso uyono rọ tare nẹ oka rẹ eranvwe vẹ ekankọn rẹ Ọghẹnẹ mare se wene rẹ ayen vwo vwiẹ emọ yẹrẹ dia asan kpokpọ-ọ. Dede nẹ ihwo evo rorori nẹ oka rẹ ewene tiọyena mudiaphiyọ nẹ erọnvwọn na mamarhe, jẹ ọyena dia uyota-a kidie oka rẹ emama ro vwo arhọ kpokpọ ọfa vwomaphia-a.