Kiro kighuma eky’embeho nene n’erihunga omo muyi we Alberta, omo Canada, Bob abya inyabiritibitya omutoka wiwe wo kutsibu (100km/hr) neryo epine y’enyuma oko luhande lw’amalembe l’oko mutoka wiwe muyatulika. Oko mwanzo Bob mwataminya ekyamabya nga niki, neryo mwalola embere erighendya; kundi ihakisiya bilometere itano inyahika eka wiwe.

 Omo baruha yiwe eyahandikira Abimiri ba Yehova ab’omo kiharo kiwe, Bob mwabugha ekyakwama ati: “Abalwana batano mubasa bamakyimya ebiyo by’oko mutoka wabo n’erinibwira bati ninemughendera oko pine eyitulikire. Mutwimana aho lutambi bamanibulya nga bangananiwatikya erihira oko mutoka wayi kw’eyindi pine. Nabya isinasi nibya nga ninawite oko yindi pine n’ekyuma ekikasumba omutoka batoke erihirako epine. Munakima omo mutoka n’amikala oko kitumbi kyaghe ky’ebirema, neryo abalwana abo mubingira emwisi sy’omutaka, bamalangira epine n’ekyuma ky’erisumba omutoka, balamusyako epine eyitobokire n’erinihirirako eyindi. Embeho yabya nene n’esyonzururu isinemutoghonga. Babya ibabirimbala ndeke, aliwe ekyo mukitakakiryabo eriniwatikya nilole embere n’olughendo lwaghe. Sinenditoka erikola omubírí oyo ingyuwene.

 “Ngasima kutsibu abalwana batano Abimiri abo abaniwatikaya. Babya bakalenderera abandu b’omo kiharo ekyo eritulirabo. Ni kwenene abalwana abo bakakolesaya ebyo bakatulira abandu. Mubaniwatikya oko mubírí owakalire ow’endinilira endambi nene kutsibu, ngabasima kutsibu okw’ekyo. Oko kwenene, abalwana abo babya ng’abamalaika abo Mungu atuma eriniwatikya ekiro ekyo.”