O na gũtuĩka huhu nĩ cionaga, kaingĩ kũrĩ na nduma ihũthagĩra ũhoti wacio wa kũmenya harĩa kĩndũ kĩrĩ kũgerera ihinda rĩrĩa thauti ĩroya gũthiĩ kuuma harĩa kĩndũ kĩu kĩrĩ nginya harĩa rũhuhu rũrĩ. Kwa ngerekano, huhu imwe no ihote kũmenya ngũrani ya rwagĩ na nding’oing’o kũgerera thibindi ĩrĩa cierĩ ihũũraga mathagu ma cio nayo.

 Ta wĩcirie: Huhu nyingĩ ithondekagĩra thauti mũmero-inĩ igacoka ikamĩruta kũgerera kanua kana maniũrũ-inĩ ma cio. Ciaruta thauti ĩyo, icokaga ikahũthĩra matũ ma cio manene gũthikĩrĩria ũrĩa mĩrũri ya thauti ĩyo ĩgũcoka ĩhaana thutha wa kũringa indo iria irĩ hakuhĩ naruo. Mĩrũri ĩyo nĩ ĩteithagia rũhuhu kũmenya ũrĩa indo iria irũthiũrũrũkĩirie ihaana mĩena yothe ĩtatũ. Na njĩra ĩyo, rũhuhu rũkahota kũmenya harĩa kĩndũ kĩna kĩrĩ, ũrĩa harĩa kĩndũ kĩu kĩrĩ hahaana, na ũraihu wa kuuma harĩa kĩndũ kĩu kĩrĩ nginya harĩa rũhuhu rũrĩ. Rũhuhu rũhotaga gwĩka ũguo o na kwĩ na inegene rĩingĩ kuuma kũrĩ huhu iria ingĩ.

 Ũhoti ũcio wa rũhuhu nĩ ũrũteithagia kũnyita tũtambi. Nĩgetha rũhote gwĩka ũguo, rũbataraga kũhũthĩra ũhoti ũcio wa gũthima ũraihu wa harĩa kĩndũ kĩrĩ rũtekũhĩtia o na hanini, na athuthuria amwe nĩ maugaga atĩ rũhuhu rũtingĩhota gwĩka ũguo. O na kũrĩ ũguo, ũthuthuria nĩ wonanĩtie atĩ huhu nĩ ihotaga gũthima ũraihu na njĩra hũthũ kũgerera mĩrũri ya thauti, na kwoguo ikahota kũnyita tũtambi.

 Athuthuria nĩ megerekanĩtie na ũhoti ũcio wa rũhuhu, magathondeka kamũtĩ karahũthĩra hinya wa thitima karĩa kangĩteithia andũ arĩa matonaga kũmenya ũrĩa indo iria imathiũrũrũkĩirie ihaana nĩguo itikamahĩnge, nginya iria ingĩmaguraria mũtwe ta rũhonge rwa mũtĩ. Brian Hoyle na Dean Waters arĩa maathondekire kamũtĩ kau ga gũteithia andũ arĩa matonaga maaugire ũũ: “Kĩrĩa gĩatũmire tũhote gũthondeka kamũtĩ gaka, nĩ maũndũ marĩa tũĩ megiĩ ũhoti wa rũhuhu wa gũthima ũraihu wa indo iria irũthiũrũrũkĩirie.”

 Ũgwĩciria atĩa? Hihi ũhoti ũcio wa mwanya wa rũhuhu wa gũthima ũraihu wa indo iria irũthiũrũrũkĩirie nĩ kwĩyumĩria weyumĩririe-ĩ, kana nĩ kũũmbwo?