Dede nẹ adjan mrorẹ vwẹ ason, jẹ ayen sa vwọ riẹn obo re riariẹ ayen phiyọ, buebun rayen ke reyọ oka rẹ ẹgba re se echolocation vwo ruiruo, ọnana mudiaphiyọ nẹ ayen se vughe oborẹ erọnvwọn sheri te womarẹ edo ro nẹ asan na cha vẹ uchọke edo na vwo te asan rẹ ayen hepha. Kerẹ udje, adjan evo sa riẹn ofẹnẹ rọhẹ uvwre rẹ inwen vẹ ofe womarẹ oborẹ ayen ọvuọvo teyen ibekpe rayen kpata wan.

 Roro: Adjan evo womarẹ upho rayen do, ọ me wan unu yẹrẹ uwen rayen phia. Ayen vwẹ erhọn ọrhuarho rayen na vwọ kerhọ rẹ edo rẹ ayen siobọnu, rọ teyen orọnvwọn ji rhivwin bru ayen rhe. Edo nana yen vwẹ ukẹcha vwọ kẹ adjan na sa vwọ vwẹ ẹwẹn roro erọnvwọn re riarierẹ phiyọ. Eriyin na, adjan na kọ sa riẹn asan erọnvwọn na hepha dẹn, obo ri kpenu te vẹ asan ri sheri te ọ da tobọ dianẹ ọ hẹ uvwre rẹ adjan efa ri do.

 Ofori nẹ adjan mu asan edo rọyen nẹ cha na gba, kidie o de muo chọ ọ sa nẹrhẹ obo rọ guọnọ muẹ na va abọ. Ihwo evo ri ruẹ ehiahiẹ tare nẹ adjan vwo mu asan edo rọyen nẹ cha gba vwẹ millisecond ọvo “dia obo re sa phia-a.” Ẹkẹvuọvo, edavwini re ruru djerephia nẹ ọ pha lọlọhọ adjan vwo mu asan edo rọyen nẹ cha gbagba, ọtiọyena, ko se muẹ obo rọ guọnọ muẹ na!

 Ihwo ri ruẹ ehiahiẹ ru ọkpọ rẹ ẹlẹtriki rọ sa vwẹ edo vwo vughe asan erọnvwọn hepha, ọkpọ nana vwẹ ukẹcha vwọ kẹ irhuẹro vwo vughe obo re riariẹ ayen phiyọ rere ayen sa vwọ vrabọ rẹ emu rọ sa kprọ ayen awọ, tobọ te i ri kpenu te uyovwin rayen dede kerẹ oghọn urhe ro yoro phia. Brian Hoyle vẹ Dean Waters ri ru ọkpọ rẹ ẹlẹtriki re se batcane na tare nẹ, “orọnvwọn ọvo kiriguo ro mu avwanre vwo ru ọkpọ na, yen erianriẹn avwanre vwo kpahen ẹgba rẹ adjan sa vwọ vwẹ edo vwo vughe asan erọnvwọn hepha.”

 Die wo rori? Ẹgba rẹ adjan sa vwọ vwẹ edo vwo vughe asan erọnvwọn hepha mamarhe? Gbanẹ a marọ?