LITIMANA ZA MWA BIBELE ZETALUSIZWE

Genese 1:1—“Kwa Simuluho, Mulimu Naabupile Mahalimu ni Lifasi”

MUBAPALE

“Kwa simuluho, Mulimu naabupile mahalimu ni lifasi.”—Genese 1:1, Bibele ya Toloko ya Lifasi Lelinca.

“Kwa simuluho, Mulimu naabupile lihalimu ni lifasi.”—Genese 1:1, Bibele ya King James Version.

Taluso ya Liñolo la Genese 1:1

Manzwi apili a mwa Bibele a apatulula litaba za niti za butokwa zepeli. Taba yapili ki ya kuli “mahalimu ni lifasi,” kamba lika zefumaneha mwateñi, nelinani makalelo. Taba yabubeli ki ya kuli, lika zeo nelibupilwe ki Mulimu.—Sinulo 4:11.

Bibele haibonisi kuli Mulimu naabupile lili pupo kaufela, mi haibonisi mwanaaezelize cwalo. Kono yatalusa kuli naabupile pupo kaufela ka “maata ahae amatuna hahulu ni maata ahae asabisa.”—Isaya 40:26.

Pulelo ya kuli “naabupile” itolokilwe fa linzwi la Siheberu lelitalusa kezo, ili lelibonisa musebezi okona kuezwa feela ki Mulimu. a Mwa Bibele, ki Jehova b Mulimu feela yatalusizwe kuli ki Mubupi.—Isaya 42:5; 45:18.

Litaba zeñwi zeswalisana ni litaba ze kwa Genese 1:1

Timana yapili mwa buka ya Genese ye, ikala ka kutalusa taba ya pupo yefumaneha kwa Genese kauhanyo 1 ni 2. Kukala ka Genese 1:1 kuisa kauhanyo 2:4, Bibele ibulela ka bukuswani za mo Mulimu naabupezi lifasi ni lika kaufela zepila ze mwateñi, kukopanyeleza cwalo ni muuna ni musali bapili. Hamulaho wa kutalusa ka bukuswani litaba zeo, Bibele cwale ibulela ka butungi za mo Mulimu naabupezi muuna ni musali bapili.—Genese 2:7-25.

Buka ya Genese ibonisa kuli Mulimu naabupile lika mwa “mazazi” a 6. Ao haki mazazi luli a 6, a lihora ze 24, kono ki nako yetelele yesika taluswa foikuma. Mi linzwi la “lizazi” likona kutalusa nako yetelele kwandaa feela lizazi la lihora ze 24. Ka mutala, kwa Genese 2:4, linzwi la “lizazi” liitusisizwe hamoho ni linzwi la “nako,” mi libonisa kuli musebezi wanaaezize Mulimu wa kubupa lika mwa mazazi a 6 neuezizwe mwa “lizazi” lililiñwi feela.

Mibonelo Yefosahezi ka za Liñolo la Genese 1:1

Mubonelo ofosahezi: Mulimu naabupile pupo kaufela mwa lilimo lisikainyana kwamulaho.

Niti ya Taba: Bibele haibonisi kuli pupo kaufela neibupilwe lili. Taba yeñozwi kwa Genese 1:1 hailwanisani ni taba yebalumela ba sayansi ya kuli sekufitile lilimo zeeza ma-bilioni kuzwa nako yeiezwa pupo. c

Mubonelo ofosahezi: Genese 1:1 ibonisa kuli Mulimu ki Silaalu bakeñisa kuli linzwi la Siheberu leliitusisizwe mwa timana ye lelitalusa “Mulimu” haliami feela ku mutu alimuñwi.

Niti ya Taba: Linzwi la “Mulimu” lizwa fa linzwi la Siheberu la ’Elo·himʹ, lelitalusa lika mwa buñata, mi libonisa mayemo kamba situlo isiñi palo ya batu. Hatiso ya New Catholic Encyclopedia ibonisa kuli linzwi la ’Elo·himʹ lelitalusa lika mwa buñata leliitusisizwe kwa Genese 1:1 “kamita liitusiswanga kuama kwa nto iliñwi ... mi liama kwa mayemo isiñi palo ya batu.”—Hatiso Yabubeli, Volyumu 6, likepe 272.

Mubale Genese kauhanyo 1 hamoho ni litaluso ze kwatasi, mi mubone ni mañolo abonisizwe fa litaku zelibisa kwa mañolo amañwi.

a Bibele ya Kuituta ya HCSB ibulela cwana ka za pulelo ya kubupa, ili: “Linzwi la Siheberu lelitalusa kezo la bara’, lelitalusa ‘kubupa,’ nikamuta haliamangi kwa nto yebakona kueza batu. Kacwalo, linzwi la bara’ liama kwa misebezi yekona kuezwa feela ki Mulimu.”—Likepe 7.

b Jehova ki lona libizo la Mulimu.—Samu 83:18.

c Hatiso ya Expositor Commentary ibulela cwana ka za pulelo ya Siheberu yetolokilwe kuli “kwa simuluho,” ili: “Pulelo ye haibonisi butelele bwa nako yefitile.”—Hatiso Yelukisizwe Sinca, Volyumu I, likepe 51.