GINSAYSAY AN MGA BERSIKULO HAN BIBLIA

Genesis 1:1—“Ha Tinikangan Ginlarang han Dios an Langit Ngan an Tuna”

I-PLAY

“Ha tinikangan ginlarang han Dios an langit ngan an tuna.”—Genesis 1:1, Bag-o nga Kalibotan nga Hubad.

“Ha tinikangan an Dios naghimo han mga langit ngan han tuna.”—Genesis 1:1, An Baraan nga Kasuratan.

Kahulogan han Genesis 1:1

Inin tinikangan nga mga pulong han Biblia nagsusumat han duha nga importante nga kamatuoran. Una, an “langit ngan an tuna,” o an pisikal nga uniberso, may tinikangan. Ikaduha, ginlarang ito han Dios.—Pahayag 4:11.

Waray isumat han Biblia kon kakan-o ngan kon paonan-o ginlarang han Dios an uniberso. Pero iginsusumat hito nga iya ginlarang an uniberso gamit an iya “hura nga dinamiko nga kusog ngan han iya urusahon gud nga gahum.”—Isaias 40:26.

An pulong nga “ginlarang” usa nga hubad han Hebreo nga pulong nga ginagamit la ha pagsumat hin buruhaton nga ginbuhat han Dios. * Ha Biblia, hi Jehova * nga Dios gud la an gin-uunabi sugad nga Maglalarang.—Isaias 42:5; 45:18.

Konteksto han Genesis 1:1

An siyahan nga bersikulo ha libro han Genesis nagsusumat han rekord han paglarang nga mababasa ha Genesis kapitulo 1 ngan 2. Tikang ha Genesis 1:1 tubtob 2:4, ginsaysay han Biblia ha simple nga paagi an mga ginbuhat han Dios han ginlarang niya an tuna ngan an ngatanan nga buhi nga linarang dida hito, upod na an siyahan nga lalaki ngan babaye. Katapos hito, an Biblia naghatag hin mas detalyado nga pagsaysay han paglarang han lalaki ngan babaye.—Genesis 2:7-25.

Ginsusumat han Genesis nga an paglarang han Dios nahitabo ha sulod hin unom ka “adlaw.” Diri ini literal nga mga adlaw nga may 24 ka oras, kondi mga peryodo han panahon nga waray espisipiko nga kahilawigon. Ha pagkamatuod, an pulong nga “adlaw” mahimo gamiton ha mga peryodo han panahon labot han 24 ka oras. Makikita ito ha Genesis 2:4, diin an “adlaw” iginpariho ha “panahon” ngan gin-urosa an naglabay nga unom ka adlaw nga paglarang han Dios sugad nga nahitabo ha usa ka “adlaw.”

Sayop nga Pagsabot ha Genesis 1:1

Sayop nga Pagsabot: Ginlarang han Dios an pisikal nga uniberso pipira ka yukot ka tuig an naglabay.

An kamatuoran: Waray unabiha han Biblia kon kakan-o ginlarang an uniberso. An mga pulong ha Genesis 1:1 diri nakontra ha gintotoohan yana han mga syentipiko nga binilyon na ka tuig an edad han uniberso. *

Sayop nga Pagsabot: Iginpapakita han Genesis 1:1 nga an Dios Trinidad tungod kay an Hebreo nga pulong nga gin-gamit hini nga bersikulo para “Dios” naka-plural.

An kamatuoran: An titulo nga “Dios” nga hubad han Hebreo nga pulong nga ’Elo·himʹ, nga naka-plural, nagpapasabot hin pagkaharangdon o pagin gamhanan, diri han kadamuon han persona. An New Catholic Encyclopedia nagsiring nga an plural nga ’Elo·himʹ sugad han gin-gamit ha Genesis 1:1 “pirme naka-singular verb, nga nagpapakita nga pariho han ginsisiring han mga hadi nga kami [An mga hadi hadto nagamit hin “kami” imbes nga “ako” ha pag-unabi han ira kalugaringon], an plural han pagkaharangdon an iginpapasabot, diri an kadamuon.”—Second Edition, Volume 6, pahina 272.

Basaha an Genesis kapitulo 1 ngan kitaa liwat an mga footnote ngan mga cross-reference.

^ par. 5 May kalabotan hini nga pulong, an HCSB Study Bible nagsiring: “An aktibo nga porma han Hebreo nga pulong nga bara’, nga nangangahulogan hin ‘maglarang,’ diri gud ginagamit ha pagsumat hin buruhaton nga ginbuhat han tawo. Salit an bara’ nagtutudlok hin buruhaton nga an Dios gud la an nagbuhat.”—Pahina 7.

^ par. 5 Jehova an personal nga ngaran han Dios.—Salmo 83:18.

^ par. 9 May kalabotan ha peryodo nga gin-unabi han Hebreo nga termino nga ginhubad nga “ha tinikangan,” an The Expositor’s Bible Commentary nagsiring: “An kahilawigon o kaihaon han peryodo diri klaro nga gin-uunabi han termino.”—Revised Edition, Volume I, pahina 51.