“Yẹn wẹ Jehovah. Yinkọ ṣie niyẹn; Yẹn ma na jo gigo ṣie na mẹdevo depope, Mọ yẹn ma na jo pipà ṣie na boṣiọ pipà lẹ.”—Isaia 42:8, Lẹdogbedevomẹ Aihọn Yọyọ Tọn.

 “Yẹn wẹ OKLUNỌ; ehe wẹ oyín ṣie: gigo ṣie wẹ yẹn ma na jo na mẹdevo, mọ yẹn ma na jo pipà ṣie na boṣiọ pipà lẹ.—Isaia 42:8, Biblu Wiwe lọ—Gun Alada.

 Jiwheyẹwhe dọ yinkọ etọn titi na mí bosọ yidogọ dọ emi ma nọ má pipà kavi gigo emitọn hẹ boṣiọ lẹ.

  Jiwheyẹwhe na yinkọ mẹdetiti tọn enẹ ede, ehe nọ saba yin lilẹdo “Jehovah” to Gungbe mẹ. a (Eksọdusi 3:14, 15) Dile etlẹ yindọ yinkọ lọ sọawuhia diblayi whla 7 000 to Alẹnu Hoho mẹ (Owe-wiwe Heblu tọn lẹ to Alamaikigbe mẹ), lẹdogbedevomẹ susu yí tẹnmẹ-yinkọ lọ “OKLUNỌ” do diọtẹnna ẹn (bo nọ kàn ẹn po wekun daho po). Apajlẹ dopo tin to Salmu 110:1 mẹ, fie dọho gando Jehovah po Jesu po go to dọdai-liho. To Biblu Wiwe lọ—Gun Alada mẹ, mí hia dọ: “OKLUNỌ [Jehovah] dọ hlan Oklunọ ṣie [Jesu].” (Owalọ lẹ 2:34-36) Lẹdogbedevomẹ Aihọn Yọyọ Tọn de bẹwlu he gán tin to “Oklunọ” awe lẹ ṣẹnṣẹn sẹ̀ bo gọ̀ yinkọ Jiwheyẹwhe tọn do otẹn he jẹna ẹn mẹ. E dọmọ: “Jehovah dọna Oklunọ ṣie dọmọ: ‘Sinai to adusilọ ṣie mẹ kaka yẹn nado yí kẹntọ towe lẹ do basi tokloafọligbe afọ towe lẹ tọn.’”

 Weyọnẹntọ Biblu tọn susu yise dọ yinkọ Jiwheyẹwhe tọn zẹẹmẹdo “E Nọ Hẹn Nado Lẹzun.” Jiwheyẹwhe nugbo dopo gee lọ wẹ gán do yinkọ enẹ, na ewọ kẹdẹ wẹ gán hẹn ede kavi nudida etọn nado lẹzun nudepope he e biọ nado hẹn lẹndai etọn di.

  Na Jehovah wẹ Mẹdatọ mítọn po Jiwheyẹwhe nugbo dopo kẹdẹ lọ po wutu, e jẹ nado mọ mẹdezejo mlẹnmlẹn mítọn yí. Mẹdevo de kavi nudida devo depope ma jẹna sinsẹ̀n-bibasi mítọn kakajẹ boṣiọ po yẹdide lẹ po ji.—Eksọdusi 20:2-6; 34:14; 1 Johanu 5:21.

 To wefọ bẹjẹeji Isaia weta 42 tọn lẹ mẹ, Jehovah dọ dọdai gando azọ́n “mẹdide” etọn tọn go. Jiwheyẹwhe dọ gando devizọnwatọ he yin alọkẹyi ehe go dọ, e na “hẹn whẹdida dodo wá na akọta lẹ.” (Isaia 42:1) Sọgbe hẹ dọdai enẹ, Jiwheyẹwhe dọmọ: “Onú yọyọ lẹ lá wẹ n’te todin. Whẹpo yé nado sọawuhia, yẹn ko dọ yé na mì.” (Isaia 42:9) Dọdai he gando “mẹdide” lọ go wá sọawuhia kavi mọ hẹndi to owhe kanweko lẹ godo, whenue Mẹsia lọ kavi Klisti wá bo bẹ lizọnyizọn aigba ji tọn etọn jẹeji.—Matiu 3:16, 17; 12:15-21.