AMAHUGÛLO G’AMANDIKO G’EBIBLIYA

Izaya 42:8—“Nie NYAKASANE”

YEREKANA

“Nie Yehova. Elyo lyo izino lyani; irenge lyani ntakalihâ omuntu yeshi-yeshi, n’obukuze bunkwanine ntakabulekera enshushano!”—Izaya 42:8, Biblia—Tafsiri ya Ulimwengu Mupya.

“Nie NYAKASANE: elyo lyo izino lyani: n’irenge lyani ntakalihâ owundi, n’obukuze bunkwanine ntakabulekera enshushano.”—Izaya 42:8, King James Version.

Amahugûlo g’Olwandiko lwa Izaya 42:8

Nnâmahanga arhubwizire izino lyage anadesire oku irenge lyage erhi obukuze bwage arhabushangîra n’enshushano.

Nnâmahanga yene wacihâga er’izino, lihindulwa kanji-kanji “Yehova” omu Mashi. * (Olubungo 3:14, 15) Ciru akaba izino lya Nnâmahanga liba kali hofi 7 000 omu Ndagano ya Mîra (Mandiko g’Ecihabraniya n’Eciaramu), bantu banji bahindûlaga Ebibliya omu zindi ndimi bahizire izino ly’eceyo “NYAKASANE” aha lyali (omu herufi nnenene). Kwa lwiganyo omu Ennanga 110:1, muli obulêbi buganirire Yehova na Yezu. Omu King James Version, rhusomiremwo ntya: “NYAKASANE [Yehova, NWT] abwira Nyakasane wani [Yezu].” (Ebijiro by’Entumwa 2:34-36) E Biblia—Tafsiri ya Ulimwengu Mupya eyerekine n’obwalagale olubero luhali egarhi k’abo ba “Nyakasane” babirhi omu kuhira izino lya Nnâmahanga aha lishinganine. Edesire ntya: “Yehova abwira Nnawirhu: ‘Tamala ekulyo kwani kuhika mpire abashombanyi bawe babe nka cirhi cawe cakuhirako amagulu gawe.’”

Basomi baguma na baguma b’Ebibliya banaderhe oku izino lya Nnâmahanga lihugwîre “Anajire Kube.” Nnâmahanga w’okuli yene oshinganine er’izino, bulya yene anacijire erhi anajire obulemi bwage bube ngasi kantu kali k’obulagirire ly’ahikiriza omuhigo gwage.

Rhushinganine rhucishwekere kuli Yehova bulya ye Mulemi na Nnâmahanga muguma w’okuli. Nta muntu na nta kantu koshi-koshi rhushinganine rhuhe enterekêro yirhu, rhurhashinganini rhuharamye, ciru n’ensanamu n’enshushano.—Olubungo 20:2-6; 34:14; 1 Yowane 5:21.

Akanga Ebinwa Biri omu Izaya 42:8 Byaderhagwamwo

Omu milongo mirhangiriza ya Izaya cigabi ca 42, Yehova alêbire omukolo gw’“omwishogwa” wage. Nnâmahanga adesire oku oyo murhumisi wage, “amanyisa amashanja obuciranuzi [obushinganyanya].” (Izaya 42:1) Okubiyerekire eco ciragane, Nnâmahanga aderha ntya: “Nkolaga nammumanyisa ebihyahya. Mmubwizirebyo embere birhangire okubâ.” (Izaya 42:9) Obulêbi buyerekire “omwishogwa” bwahikirire, enyuma z’amagana g’emyaka erhi Masiya, erhi Kristu, abonekana n’okuhikiriza omukolo gwage hanw’igulu.—Mateyo 3:16, 17; 12:15-21.

Olwandiko lwa Izaya 42:8 omu Zindi Mpindûlo z’Ebibliya

“Nie Yehova, elyo lyo izino lyani! Irenge lyani ntakalihâ wundi, n’obukuze bunkwanine ntakabulekera enshushano!”—The ‘Holy Scriptures,’ by J. N. Darby.

“Nie Yehova; elyo Lyo izino lyani! Irenge Lyani ntakalihâ wundi, N’obukuze bunkwanine ntakabulekera enshushano.”—A Literal Translation of the Bible.

^ Izino lya Nnâmahanga omu Cihabraniya linayandikwe na konsone ini, zilug’iyandikwa YHWH omu Mashi. Hali mpindûlo nguma na nguma z’Ebibliya zihindwire izino lya Nnâmahanga na “Yahweh.” Ly’omanya binji, olole “Jina la Mungu Katika Maandiko ya Kiebrania” omu Nyongeza A4 omu Biblia—Tafsiri ya Ulimwengu Mupya.