«Li Kʼope te onoʼox oy ta slikebal, te onoʼox oy xchiʼuk Dios li Kʼope xchiʼuk oy sjuʼel kʼuchaʼal Dios li Kʼope» (Juan 1:1, Xchʼul Kʼop Dios sventa Achʼ Balumil).

 «Ta sliquebal banamile, te onoʼox oy o li Cʼope. Li Cʼope te xchiʼinoj sbaic xchiʼuc li Diose. Jaʼ onoʼox Dios stuc» (Juan 1:1, Xchʼul Cʼop Jtotic Dios ta skʼop Chenalhó).

 Li teksto liʼe, chalbutik skʼoplal ti kʼu toʼox yelan xkuxlejal Jesus kʼalal skʼan toʼox xtal ta balumil kʼuchaʼal krixchanoe (Juan1:14-17). Li ta versikulo 14 tstunes kʼuchaʼal biil li jpʼel kʼop «li Kʼope» o (ho lógos li ta griegoe). Yileluke, li biil taje jaʼ chakʼ ta ilel li yabtel akʼbil Jesus kʼuchaʼal jelubtasej mantal yuʼun Diose, taje jaʼ li kʼusi la spas kʼalal ay xchol mantal ta balumile xchiʼuk kʼalal sut batel ta vinajele (Juan 7:16, Apokalipsis 1:1).

 Kʼalal «ta slikebal» xie, jaʼ skʼan xal kalal lik spas kʼusitik li Diose xchiʼuk kʼalal la smeltsan li Kʼope, vaʼun jmoj xa abtejik xchiʼuk Dios sventa spasik li kʼusitik yan oye (Juan1:2, 3). Li Vivliae xi chal ta sventa li Jesuse: «Jaʼ baʼyel laj yichʼ pasel ta skotol li kʼusitike, jaʼ ta stojolal ti laj yichʼ pasel skotol li kʼusitik yantik ta vinajele» (Kolosenses1:15,16).

 Li jpʼel kʼop, jaʼ «kʼuchaʼal Dios li Kʼope» xie. Jaʼ chalbe skʼoplal, li kʼu yelan toʼox xkuxlejal Jesus kʼalal skʼan toʼox xtal ta balumile, jaʼ xkaltik, chakʼ ta aʼiel ti xkoʼolaj kʼuchaʼal Diose. ¿Kʼu yuʼun jech chkaltik? Yuʼun jaʼ yajkʼopojel Dios kʼuchaʼal li baʼyel Xnichʼon Diose. Toj tsots skʼoplal li yabtel akʼbil kʼuchaʼal li baʼyel Xnichʼon Diose ti jaʼ jmoj abtejik sventa spasik li kʼusitik yan oye.

 Akʼo mi li slivroal Juane jaʼ chalbe skʼoplal li xkuxlejal Jesuse xchiʼuk li cholmantal la spas kʼalal ay ta balumile, li baʼyel versikuloetik li ta kapitulo 1 jaʼ chalbe skʼoplal ti kʼu yelan toʼox xkuxlejal Jesus kʼalal skʼan toʼox xtal ta balumile, ti kʼu yelan lek tajek xil sbaik xchiʼuk li Diose xchiʼuk li kʼusi laj spas sventa lekuk xil sbaik xchiʼuk Dios li krixchanoetike (Juan 1:1-18). Skotol li kʼusi chalbe skʼoplal taje, tskoltautik sventa xkaʼibetik smelolal li kʼusitik la spas xchiʼuk li kʼusitik laj yal Jesus kʼalal la xchol mantal liʼ ta balumile (Juan 3:16; 6:38; 12:49, 50; 14:28; 17:5).

 Li kʼusi xchʼunoj yantike: Kʼalal «dios» xkutik li Kʼope xkoʼolaj kʼuchaʼal lek chkiltik li yichʼel ta mukʼ yan diosetike.

 Li kʼusi melele: Li jpʼel kʼop theós ta griegoe, chichʼ jelubtasel kʼuchaʼal «Dios» o «dios» jaʼ xkoʼolaj kʼuchaʼal li jpʼel kʼop ta ebreo elohím, ti chichʼ tunesel ta Pokoʼ Testamentoe. Yileluke, li jpʼel kʼop ta ebreo taje, jaʼ skʼan xal oy «sjuʼel» o «tsots yip», chichʼ tunesel kʼalal chichʼ albel skʼoplal li Dios skotol xuʼ yuʼune, li yan diosetike o li krixchanoetike (Salmo 82:6; Juan 10:34). Jamal xvinaj ti jaʼ jun kuxlejal ti oy sjuʼel li Kʼope, yuʼun jaʼ tunesat yuʼun Dios sventa spas li kʼusitik oye (Juan 1:3). Ti dios chichʼ albel li Kʼope, xkoʼolaj li ta albil kʼop ta Isaias 9:6, ti bu chal ti jaʼ tʼujbil yuʼun Diose, jaʼ xkaltik, li Mesias o Kristoe chichʼ biiltasel «Dios ti xuʼ yuʼune», (li ta ebreoe, ʼEl Gibbóhr), pe maʼuk chal «Dios ti skotol xuʼ yuʼune» (ʼEl Shaddái, jech kʼuchaʼal chal ta Jenesis 17:1; 35:11; Eksodo 6:3; Esekiel 10:5).

 Li Vivliae chal ti mu xuʼ xkichʼtik ta mukʼ yan diosetike. Yuʼun li Jesuse xi chale: «Jaʼ noʼox skʼan xavichʼ ta mukʼ li Jeova Dios avuʼune xchiʼuk jaʼ noʼox stuk skʼan xapasbe xchʼul abtel» (Mateo 4:10). Xi to chal xtok li Vivliae: «Akʼo mi oy buchʼutik ti diosetik chichʼik albel ta alele, mi ta vinajel o mi ta sba balumil, jech kʼuchaʼal ep diosetik xchiʼuk ajvaliletik ta alele, ta melel, jun noʼox Dios oy kuʼuntik, jaʼ li Totile, jaʼ li buchʼu yakʼoj skotol li kʼusitik oye xchiʼuk ti jaʼ yuʼunutike; jun noʼox Kajvaltik oy xtok, jaʼ li Jesukristoe, jaʼ ta sventa ti meltsaj skotol li kʼusitik oye xchiʼuk jaʼ ta sventa ti oyutike» (1 Korintios 8: 5, 6).