FAKAMATALAʻI ʻO E NGAAHI KONGA TOHI TAPÚ

Mātiu 6:33—“Fuofua Kumi ae Buleaga oe Otua”

PLAY

“Ko ia leva, hanganaki fuofua kumi ki he Puleʻangá mo e māʻoniʻoni ʻa e ʻOtuá, pea ʻe tānaki atu kiate kimoutolu ʻa e ngaahi meʻá ni kotoa.”—Mātiu 6:33, Liliu Tohi Tapu Māmani Foʻoú.

“Ka mou fuofua kumi ae buleaga oe Otua, mo ene maonioni; bea e fakalahi aki ae gaahi mea ni kotoabe kiate kimoutolu.”—Mātiu 6:33, Paaki Motuʻa.

ʻUhinga ʻo e Mātiu 6:33

Ko e Puleʻanga ʻo e ʻOtuá ko ha founga pule fakahēvani ia te ne fakahoko ʻa e finangalo ʻo e ʻOtuá ʻi he māmaní. (Mātiu 6:9, 10) Ko ha tokotaha ʻokú ne fuofua kumi ki he Puleʻangá ʻokú ne ʻai ko e meʻa mahuʻinga tahá ia ʻi heʻene moʻuí. a ʻOku kau ki ai ʻa e vēkeveke ke ako fekauʻaki mo e Puleʻanga ʻo e ʻOtuá kae pehē ki hono tala ki he niʻihi kehé ʻa e ngaahi meʻa lelei te ne fakahokó. (Mātiu 24:14) Ko ha tokotaha ʻokú ne fuofua kumi ki he Puleʻangá te ne lotu foki ke hoko mai ia.—Luke 11:2.

Ko e māʻoniʻoni ʻa e ʻOtuá ʻoku kau ki ai ʻa ʻene ngaahi tuʻunga fakaeʻulungaanga ki he tonú mo e halá. (Saame 119:172) Ko ia ai, ko ha tokotaha ʻoku kumi ki he māʻoniʻoni ʻa e ʻOtuá ʻokú ne moʻui ʻo fakatatau ki he ngaahi lao fakaeʻulungaanga ʻa e ʻOtuá, ʻa ia ʻoku ʻaonga maʻu pē.—ʻAisea 48:17.

Ko e kupuʻi lea pea ʻe tānaki atu kiate kimoutolu ʻa e ngaahi meʻá ni kotoa ko ha talaʻofa ia ʻa e ʻOtuá ki he faʻahinga ʻoku nau fakamuʻomuʻa ʻa e Puleʻangá mo ʻene ngaahi tuʻungá ʻi heʻenau moʻuí te ne tokonaki maʻa kinautolu.—Mātiu 6:31, 32.

Puipuituʻa ʻo e Mātiu 6:33

Ko e konga eni ʻo e meʻa naʻe leaʻaki ʻe Sīsū ʻi heʻene Malanga ʻi he Moʻungá, ʻa ia ʻoku hiki ʻi he Mātiu vahe 5-7. ʻOku ʻikai ha veiveiua ko e tokolahi naʻa nau fanongo kia Sīsuú naʻa nau masiva. Naʻa nau ongoʻi nai koe meʻa tefitó ko e kumi ha maʻuʻanga moʻui, ʻo siʻisiʻi ai e taimi ke fuofua kumi ki he Puleʻangá. Ka naʻe fakalototoʻaʻi kinautolu ʻe Sīsū ke sivisiviʻi ʻa e anga hono tokangaʻi ʻe he ʻOtuá ʻa e fanga manú mo e ʻuluʻakaú. ʻOku talaʻofa ʻe he ʻOtuá te ne fai ʻa e meʻa tatau ki he faʻahinga ʻoku nau fuofua kumi ki hono Puleʻangá.—Mātiu 6:25-30.

Maʻuhala fekauʻaki mo e Mātiu 6:33

Maʻuhala: Ko ha taha ʻoku fuofua kumi ki he Puleʻangá te ne tuʻumālie.

Moʻoni: Naʻe pehē ʻe Sīsū ko kinautolu te nau fakamuʻomuʻa ʻa e Puleʻanga ʻo e ʻOtuá te nau maʻu ʻa e meʻa ʻoku nau fiemaʻú, hangē ko e meʻakai mo e vala. (Mātiu 6:25, 31, 32) Kae kehe, naʻe ʻikai te ne talaʻofa ke tuʻumālie pe fakahaaʻi ko e ngaahi tāpuaki ʻa e ʻOtuá ʻoku makatuʻunga ia ʻi he lahi ʻa e koloa ʻoku tau maʻú. Ko e moʻoni, naʻe fakatokanga ʻa Sīsū ki heʻene kau fanongó ko e tuli ki he tuʻumālié, ʻe faingataʻa ange ai ke fuofua kumi ki he Puleʻangá. (Mātiu 6:19, 20, 24) Naʻe ngāue taʻemālōlō ʻa e ʻapositolo ko Paulá maʻá e Puleʻanga ʻo e ʻOtuá, neongo ia naʻe ʻi ai ʻa e taimi ʻe niʻihi naʻá ne feʻamokaki fakamatelie ai. ʻI he hangē ko Sīsuú, naʻá ne fakatokanga ki he niʻihi kehé fekauʻaki mo e fakatuʻutāmaki ʻo e feinga ke tuʻumālié.—Filipai 4:11, 12; 1 Tīmote 6:6-10.

Maʻuhala: ʻOku ʻikai fiemaʻu ki he kau Kalisitiané ke nau ngāue ke maʻu ha moʻui.

Moʻoni: ʻOku pehē ʻe he Tohi Tapú ʻoku totonu ki he kau Kalisitiané ke nau ngāue ke tokoniʻi kinautolu mo honau ngaahi fāmilí. (1 Tesalonaika 4:11, 12; 2 Tesalonaika 3:10; 1 Tīmote 5:8) Naʻe ʻikai ke pehē ʻe Sīsū ki hono kau muimuí ʻoku totonu ke nau kumi pē ki he Puleʻangá; ʻi hono kehé, naʻá ne pehē ʻoku totonu ke nau fuofua kumi ki he Puleʻangá.

Ko e faʻahinga ʻoku nau fuofua kumi ki he Puleʻanga ʻo e ʻOtuá pea loto-lelei ke ngāué ʻe lava ke nau fakapapauʻi ʻe tokoniʻi kinautolu ʻe he ʻOtuá ke maʻu ʻenau ngaahi fiemaʻú.—1 Tīmote 6:17-19.

a Ko e “hanganaki . . . fuofua kumi” naʻe liliu ia mei he veape faka-Kalisi ʻoku fakahaaʻi ai ʻa e ngāue hokohoko, ʻe lava foki ke toe liliu ʻa e kupuʻi leá koe “kumi hokohoko.” Ko ia ai, ko e Puleʻangá ʻoku totonu ko e meʻa ia ke fakamuʻomuʻá ka ʻoku ʻikai ko ha mahuʻingaʻia fakataimi pē.