TUPANGO TWAMU BBAIBBELE TWAPANDULULWA
Myeelwe 6:24-26—“Mwami Leza Amuleleke Akumubamba”
“Jehova amulongezye akumubamba. Jehova amunisye busyu bwakwe alindinywe akumufwida lubomba. Jehova amufwide luzyalo akumupa luumuno.”—Myeelwe 6:24-26, Bbaibbele lya Busanduluzi Bwanyika Mpya.
“Mwami Leza amuleleke akumubamba. Mwami Leza amulange muluyando akumubeda aaluse. Mwami Leza amulange muluyando akumupa luumuno.”—Myeelwe 6:24-26, The Bible in Tonga Lyamu 1996.
Bupanduluzi bwa Myeelwe 6:24-26
Majwi aaya aitwa kuti cilongezyo camupaizi naa kuti cilongezyo ca Aroni, mupaizi mupati wakusaanguna mu Israyeli. (Kulonga 28:1) Pele majwi aaya azwa kuli Leza. (Myeelwe 6:22, 23) Wakaambila Musa kuti: “Koambila Aroni abana bakwe kuti, ‘Oobu mbomweelede kulongezya bana Israyeli,’” mpoonya wakamwaambila majwi aali ku Myeelwe 6:24-26. Bapaizi basyomeka bakautobela mulawo ooyu uuzwa kuli Leza. Kunze lyaboobo, bakalilemeka zina lya Leza lyakuti Jehova. a Mukapango 27 tubala kuti: “Alimwi beelede [bapaizi] kubelesya zina lyangu nobalongezya bana Israyeli, kutegwa ndibalongezye.”
“Jehova amulongezye akumubamba.” Jehova ulabalongezya bakombi bakwe kwiinda mukubakwabilila, kubasololela akubapa kuzwidilila mubuumi. (Tusimpi 10:22) Ku Myeelwe 6:24-26, kweelana amabala aakabelesyegwa, muci Hebrayo mabala aaya atondezya kuti Leza uyakulongezya kutali buyo cisi ca Israyeli, pele amuna Israyeli umwi aumwi kumugama.
“Jehova amunisye busyu bwakwe alindinywe akumufwida lubomba.” Kulomba kuti Leza “amunisye busyu bwakwe” amuntu umwi caamba kulomba kuti Leza atondezye kuti wamukkomanina muntu ooyo. b Jehova ulatondezya kuti wabakkomanina bantu bakwe kwiinda mukubafwida luzyalo, luse alimwi akubeetelela.—Isaya 30:18.
“Jehova c amufwide luzyalo akumupa luumuno.” Majwi aaya atondezya kuti Jehova ulabafwida luzyalo bakombi bakwe akubapa luumuno. Kweelana abbuku limwi lyakuvwuntauzya, “ibbala lyaci Hebrayo lyakuti luumuno (salomu) talyaambi buyo kuti muntu tazwangani abantu bamwi, pele lyaamba kuti ulimvwa kabotu kumubili akumuuya.”
Kutegwa bana Israyeli bagwasyigwe azilongezyo eezyi, bakeelede kumumvwida Jehova. (Levitiko 26:3-6, 9) Ciindi nobakali kucita oobo, Jehova wakali kwaazuzikizya majwi aakwe. Eeci cakalibonya ciindi nobakali kulela bamwi, mbuli Solomoni alimwi a Hezekiya.—1 Bami 4:20, 25; 2 Makani 31:9, 10.
Nokuba kuti Banakristo tabeelede kwainduluka bbala abbala majwi aaya aakulongezya, balakonzya kwaamba majwi aakozyenye ayaaya ciindi nobapailila bamwi naa nobakulwaizya Banakristonyina. (1 Batesalonika 5:11, 25) Jehova tacinci pe. Lyoonse ulayanda kubalongezya akubakwabilila bakombi bakwe basyomeka. Aboobo Banakristo bakasimpe balakonzya kukkalwa moyo kuzyiba kuti “busyu” bwa Jehova bulamunika aalimbabo.
Makani aayengelede lugwalo lwa Myeelwe 6:24-26
Zyaandaano zyakusaanguna zili kkumi mubbuku lya Myeelwe zitondezya malailile Leza ngaakapa bana Israyeli ciindi nobakali afwaafwi a Cilundu ca Sinai nobakali kuunka ku Nyika Yakasyomezyedwe. Ciindi nobakali muzilawo, mwalo mobakakkala kwaciindi citandila kumwaka, Jehova wakababunganya bantu kuba cisi akubapa milawo yakali kwiitwa kuti cizuminano ca Mulawo.
Kuyungizya waawo, Jehova wakaambila Musa kujatikizya Aroni abana bakwe—balo ibakasalidwe kuba bapaizi—mbobakeelede kulongezya bana Israyeli. (Myeelwe 6:22, 23) Kumane, Aroni abaluzubo lwakwe bakaabelesya majwi aali ku Myeelwe 6:24-26 kulongezya cisi. Mukuya kwaciindi, cakazyi kuba cilengwa kubapaizi kwaamba majwi aakulongezya aaya nobakali kutuula cituuzyo camamanino buzuba abuzuba kutempele.
Amweebelele kavidiyo aaka mubone mubufwaafwi izili mubbuku lya Myeelwe.
a Izina lyakuti Jehova ndezina lidumide limugeme Leza muci Hebrayo. Kutegwa muzyibe kaambo ma Bbaibbele manji ncabelesya zina lyabulemu lyakuti Mwami muciindi cazina lya Leza limugeme, amubone cibalo cakuti “Ino Jehova Nguni?”
b Mukwiimpana, Bbaibbele lyaamba kuti Jehova wakasisa busyu bwakwe kuli bana Israyeli akaambo kamicito yabo mibyaabi.—Isaya 59:2; Mika 3:4.
c Kweelana a Bbaibbele litegwa NIV Study Bible, kwiindulukwa kwazina lya Leza mutupango ootu “nkukankaizya kaambo kali mukapango 27.” Nokuba boobo, bamwi baamba kuti kulembwa ziindi zyotatwe kwazina lya Leza kusumpula njiisyo yakuti Leza Mbutatu. Pele oobu tabusyi mbocibede pe. Basikulemba zyamu Bbaibbele ibasumpula njiisyo ya Butatu baamba kuti kuliinduluka ziindi zyotatwe zina lya Leza “tiikwakali kukonzya kupa muzeezo wakuti Leza mbutatu kumupaizi wakali kwaamba majwi aaya aakulongezya naa kubantu bakali kulongezyegwa. Kulimbabo kulyaamba ziindi zyotatwe zina lya Leza kwakali kulemya mulumbe uuli mumajwi aakulongezya.” (The Pulpit Commentary, Volume 2, peeji 52) Kutegwa muzyibe zinji, amubone cibalo cakuti “Sena Leza Mbutatu?”
Andiza Inga Mwaakkomanina Ayaaya
TUPANGO TWAMU BBAIBBELE TWAPANDULULWA
Lugwalo lwa Intembauzyo 23:4 Lwapandululwa—“Nokuba Kuti Ndeenda Mukkuti Lisiya Mbi”
Nomuba mubukkale bukatazya mubuumi bwabo, mbuti Leza mbwabakwabilila bakombi bakwe?
NJIISYO ZYAMU BBAIBBELE ZIYANDIKA
Sena Leza Ulijisi Zina?
Leza ulijisi mazina aabulemu manji, kubikkilizya aakuti Singuzuzyoonse, Mulengi, alimwi a Mwami. Pele zina lya Leza limugeme lilajanika mu Bbaibbele ziindi ziinda ku 7,000.
MIBUZYO YAMU BBAIBBELE YAINGULWA
Sena Leza Ulandigwasya Kuti naa Ndapaila?
Sena ncobeni Leza ulatulanganya kujatikizya mapenzi eesu?
TUPANGO TWAMU BBAIBBELE TWAPANDULULWA
Lugwalo lwa Johane 14:27 Lwapandululwa—“Ndamusiila Luumuno”
Ino nduumuno luli buti Jesu ndwaakasiila basikumutobela bakwe beni-beni? Mbuti mbotukonzya kuba andulo?
NJIISYO ZYAMU BBAIBBELE
Zibelesyo Izigwasya Kwiiya Bbaibbele
Amusale zibelesyo zyakwiiya Bbaibbele izikonzya kumugwasya kuzwidilila alimwi akujana mpindu.
NJIISYO ZYAMU BBAIBBELE
Amulembe Foomu Kuti Kamuyanda Kwiiya
Amwiiye Bbaibbele amwiiyi kakunyina kubbadela.
