“Vasa ehambu enene mu Siovaa, Ngwe mekekwavela etyi omutima wove wahanda.” — Oviimbo 37:4, Ombimbiliya Ikola Yaava Ekevelelo Liouye Omupe.

 “Tupu hambukilwa mu Tatekulu, Ngwe mekekwavela etyi omutima wove wahanda.” — Oviimbo 37:4, Ombimbiliya imwe itiwa Versão padrão em inglês.

 Omwiimbi ou ukahi nokupa ondundo ovafendi va Siovaa okuvasa ehambu mokukala noupanga wapama Nae. Aveho vena oupanga wapama nae vapondola okukala nonthumbi yokuti Siovaa a meveavela ovipuka vesuka navio.

 “Vasa ehambu enene mu Siovaa.” Ombimbiliya imwe yapitiya onondaka ombu okuti, “hambukwa mukufenda TATEKULU,” ine “hambukilwa mweetyi TATEKULU ekulaa.” Monondaka ononkhwavo okuti, tuna ‘okuvasa ehambu’ mokufenda Huku yotyotyili. (Oviimbo 37:4, okatoi) Omokonda yatyi tupopila ngootyo?

 Vana vafenda Siovaa velilongesa Ombimbiliya avatale ovipuka ngeetyi ngwe evitala. Vetyii okuti okunoñgonoka vala Huku katyituuka, tupu vena okumutavela. Tyina valinga ngootyo, vatula omutima avahalingi ovipuka vipondola okuveetela. (Omihe 3:5, 6) Tyimwe valinga, okwahayeke onyengo nonkhi ivepole ombembwa nokupeleya omwenyo wovanthu vahafende Huku. (Oviimbo 37:1, 7-9) Mokonda ovanthu va Huku vetyii okuti apa katutu Huku meya okumanako ovivi nokwavela ovipuka oviwa ava vakakatela mwe, otyo tyivepa ehambu. (Oviimbo 37:34) Tupu vena ehambu mokonda vetyii okuti vekahi nokuhambukiswa tate yavo wokeulu Siovaa. — Oviimbo 5:12; Omihe 27:11.

 “Ngwe mekekwavela etyi omutima wove wahanda.” Onondaka ombu tupu mbupondola okupopiwa okuti, “ngwe makumbulula omalikwambelo ove,” ine okuti “ngwe mekwavela etyi wesuka natyo.” Otyo hakuti atyiho wiita Huku mekupe-tyo. Nga he yovana, Siovaa wii etyi tyipondola okukwatesako ovana vae. Tupu evi twiita noomu twendekela omwenyo wetu, vina okulikwata neetyi Huku ahanda, novitumino viae. (Omihe 28:9; Tiaku 4:3; 1 Swau 5:14) Ine otyo tulinga otyo, matutyivili okufwena ‘komuteheleli womalikwambelo,’ tyityi okuti metutehelela umwe. — Oviimbo 65:2; Mateusi 21:22.

 Omukanda Oviimbo 37 wahonekwa na Ndaviti , Ohamba yo Isilayeli. Wahoneka omukanda oo, okulandula omu onoletela mbo Hembeleu mbulilandulila. b

 Ndaviti wakondyele nokulingwa onya. Wakahombokele ohamba Saulu novanthu ovakwavo ankho vahanda okumwiipa. (2 Samuwele 22:1) Mahi, nongootyo Ndaviti ankho uyumba onthumbi mu Siovaa. Ankho utyii umwe okuti Siovaa mahanyeko onondingavivi momuvo waviuka. (Oviimbo 37:10, 11) Namphila tyina utala ñgana onondingavivi ngoti vena omwenyo omuwa, mahi apa katutu kamavakakalako vali, “mavakakukuta liwa-liwa ngeholi.” — Oviimbo 37:2, 20, 35, 36.

 Omukanda Oviimbo 37 upopia etyi matyikamoneka nonondingavivi, neetyi matyikamoneka navana vafenda Huku. (Oviimbo 37:16, 17, 21, 22, 27, 28) Naina omukanda ou, utukwatesako okukala ovanongo, atukala ovanthu vahambukiswa Siovaa.

 Tala ovindiu ei unoñgonoke etyi tyipopia omukanda Oviimbo.