Julio ca agosto cüyen mu, com pu peñi ca lamngen huall Mapu mu quiñeucülen peafingün chi fütra trahun video mu. Turpu femngechi femngequelafui. Feimu ti fütra trahun rulpadungungei doi 500 quehun dungu mu. Femngechi fütra cüdau alüñmayafui doi quiñe tripantu chi. Huelu mülen mu chi coronavirus, mülefui ñi com rulpadungungeal meli cüyen mu müten.

 Fütra cüdau tati, feimu ti Troquiñche Quelluquelu ti Rulpadungun Cüdau raquiduami chumngechi ñi quelluafiel tati pu rulpadunguquelu. Tüfa engün duamniefuingün cümeque microfono ca itrofillem ñi cüme deumayal tañi cüdau. Feimu pu peñi adniequelu ti ngillacan dungu ngillaingün 1.000 microfono ca huercüfingün epe 200 lof mu.

 Ñi doi faratu tripayal, trür ngillangei com tati microfono, fei hula huercülelngei pu rulpadunguquelu huall Mapu püle. Femngechi caque quiñeque microfono tripai epe 135.000 pesos chilenos. Ngillanquepingefule tati microfono, doi fentren plata tripayafui.

 Abril ca mayo cüyen mu, ngillangei ca huercüngei com tüfachi microfono. Mülen mu chi pandemia, feichi cüyen mu cüdaungefui ta ngillacan dungu. Huelu aflu mayo cüyen, epe com pu rulpadunguquelu niefuingün chem ñi duamnieel tañi cüdahual.

 Quiñe peñi adniequelu ti ngillacan dungu Jay Swinney pingelu, feipi: “Pu peñi mülelu ta Betel ca pu fendequelu rume cüme adcünuhuingün ñi cüme tripayal chi cüdau. Matu tripai ti ngillan dungu ca ngünamcangelai plata. ¡Quimfali mai Jehová taiñ quellunieteu!”.

 Quiñe peñi Nicholas Ahladis pingelu, cüdauquei ti Troquiñche Quelluquelu ti Rulpadungun Cüdau, feipi: “Pu rulpadunguquelu rume ayühuingün ñi lloufiel com tañi duamnieel ñi femal tañi cüdau. Huichuquelelu engün rume, com quelluhuingün ñi rulpadungual ca ñi grabayal ti fillque hueupin, video ca ülcantun doi 500 quehun dungu mu”.

 Ñi cüme tripayal ti fütra trahun 2020, ca femngequei fillque cüdau. Tüfachi microfono ngillangei eimün tamün hulqueelchi plata mu. Fentren eimün hulqueimün plata taiñ pagina donate.pr418.com internet mu.