Mu mweshi wa July na August mu 2020, Inte sha kwa Yehova mwi sonde lyonse bakatamba programu imo ine iya Kulongana kwa Citungu pa nshita imo ine. Ica musango uyu tacabala acicitikapo. Pa kuti aba bwananyina batambe Ukulongana kwa Citungu pa nshita imo ine mwi sonde lyonse, uku kulongana kwalingile ukupilibulwa mu ndimi ukucila pali 500. Ilingi line umulimo wa kupilibula programu ya musango uyu kuti wasenda umwaka umo no kucilapo. Nomba pa mulandu wa bulwele bwa Korona, abalepilibula Ukulongana kwa Citungu ukwa mu 2020 ukuleti ’Mulesekelela Lyonse’! bakwete fye imyeshi 4 iya kupwisha ukubomba uyu mulimo.

 Dipartimenti ya Translation Services na dipartimenti ya Global Purchasing iya ku maofeshi yakalamba aya Nte sha kwa Yehova yalitungilile uyu umulimo uukalamba nga nshi. Aba mu dipartimenti ya Translation Services basangile ukuti bakapilibula abengi balekabila ifibombelo fya kubomfya pa kupilibula na fimbi, maka maka ifisoselo ifisuma sana. Dipartimenti ya Global Purchasing yalipekenye ukushita ifisoselo 1,000 no kufituma ku ncende nalimo 200.

 Pa kuti twibomfya indalama ishingi, twaleshita ifisoselo ifingi pa muku umo no kufituma ku cifulo cimo. Lyena twaletuma ifi ifisoselo kuli bakapilibula mwi sonde lyonse. Apo twaleshita ifisoselo ifingi pa muku umo, indalama twalebomfya pa kushita no kutuma icisoselo cimo shaleba fye nalimo amadola ya ku America 170 (K3,145). Nomba nga twaleshita icisoselo cimo cimo, nga twalibomfeshe indalama ishingi ukucila pali ishi.

 Dipartimenti ya Global Purchasing yalingile ukushita ifi ifisoselo no kufituma mu mweshi wa April na May mu 2020. Muli iyi myeshi, aba makwebo abengi tabalebomba nge fyo babomba lyonse pa mulandu wa bulwele bwa Korona. Na lyo line, ilyo umweshi wa May walepwa, ninshi natutuma ifisoselo fyalekabilwa ku maofeshi ya bakapilibula, ku maofeshi ya misambo aya Nte sha kwa Yehova, na ku ncende uko bakapilibula babombela.

 Ba Jay Swinney abangalila dipartimenti ya Global Purchasing batile: “Pa kuti tushite ifisoselo fyalekabilwa, ama dipartimenti ya pa Bethel yalebombela pamo na ba makwebo. Mupashi wa kwa Yehova fye e walengele ukuti tubombe uyu mulimo mu nshita iinono sana, kabili tubomfye bwino imisangulo ku kutungilila imilimo ya Bufumu.”

 Ba Nicholas Ahladis, ababombela mu dipartimenti ya Translation Services, batile: “Bakapilibula abashalefuma pa cifulo babombela pa mulandu wa bulwele bwa Korona, balitemenwe ilyo bapokelele ifi ifisoselo. Nangu ca kuti tabaleba pa cifulo cimo cine na bakapilibula abo babomba nabo, balebombela pamo umulimo wa kupilibula no kukopa amalyashi, ifyangalo ne nyimbo mu ndimi ukucila pali 500.”

 Umulimo wa kushita ifisoselo wali pa milimo iingi iyabombelwe pa kukopa programu ya Kulongana kwa Citungu ukwa mu 2020 ukuleti ’Mulesekelela Lyonse’! pa kuti Inte sha kwa Yehova mwi sonde lyonse batambe uku kulongana. Imisangulo mwasangwile ukubomfya donate.pr418.com nelyo inshila shimbi e yo twabomfeshe pa kushitamo ifi ifyalekabilwa pa kupilibula uku Ukulongana kwa Citungu.