Bas bulan Juli ras Agustus 2020, enda me tangtangna kerina turang senina i sebelang doni nonton acara kebaktin regional si seri, janah bas waktu si seri ka. Emaka, rekamen acara e perlu iterjemahken ku lebih 500 bahasa. Biasana iperluken waktu silang-langna sada tahun guna ngerencanaken ras ndahiken proyek si bage belinna. Tapi perban lit virus corona, waktu man penerjemah guna nerjemahken Kebaktin Regional 2020 “Teruslah Ermeriah Ukur”! la seh empat bulan dekahna.

 Proyek si luar biasa enda banci ilakoken perban isampati Layanen Penerjemahen bage pe Departemen Pembelian Global arah Kantor Pusat Saksi-Saksi Jahwe Sebelang Doni. Iteh Layanen Penerjemahen maka melala tim penerjemah merluken peralaten tambahen, khususna mikrofon si mejile kualitasna. Emaka itukur Departemen Pembelian Global me 1.000 mikrofon janah aturkenna gelah e ikirim ku menam 200 ingan si merlukenca.

 Gelah hemat biayana, melala kel itukur mikrofon e janah ikirim ku sada ingan saja, kenca si e maka ikirim kerina e ku penerjemah i sebelang doni. Perban melala si itukur, enggo reh murahna erga sada mikrofon, eme kira-kira 2,5 juta rupiah janah e enggo termasuk ongkos kirimna. Emaka banci sihemat lebih 20 persen.

 Arus iatur Departemen Pembelian Global guna nukur ras ngirim barang-barang e bas bulan April ras Mei 2020. Padahal sanga si e melala perusahan la banci erdahin bagi biasana perban lit virus corona. Aminna pe bage, bas akhir bulan Mei, peralaten si iperluken enggo ialoken menam kerina tim penerjemah, bas kantor penerjemahen, kantor cabang, ras ingan-ingan si debanna.

 Nina turang seninata Jay Swinney, si ngawasi Departemen Pembelian Global, “Mejile kel kerja sama antara piga-piga departemen i Betel ras perusahan-perusahan si terlibat bas proyek enda. Perban penampat kesah si badia Jahwe maka banci meter sisampati turang seninata janah la perlu melala biayana.”

 Nina turang seninata Nicholas Ahladis, si erdahin bas Layanen Penerjemahen, “Kerina penerjemah si sangana lockdown meriah kel kapna ngaloken peralaten enda. Amin pe kalak e la banci pulung selaku sada tim, tapi tetap kalak e banci kerja sama alu mehuli. Hasilna, khotbah-khotbah, drama, bage pe lagu banci iterjemahken ras irekam bas lebih 500 bahasa.”

 Proyek enda eme salah sada arah melala proyek si idahiken gelah turang seninata i sebelang doni banci ngikuti Kebaktin Regional 2020 “Teruslah Ermeriah Ukur”! Kerina peralaten e ndai banci itukur perban enggo ibereken turang senina sumbangen alu ermeriah ukur arah donate.pr418.com bage pe alu cara-cara si debanna.