E taté wô’ô na bobejañe ya si se ba yene bevidéo ya beta étôkan, be bese éyoñe jia, ve mbu 2020, ataté Ngone zangbwale akekui Ngone mwomô. Asu na jam ete e boban, e nga sili na be kôñelane bevidéo ya minkañete ya beta étôkan ate minkobô a lôte 500. Aval ésaé éte ki e wô’ô nyoñe bia ngume mbu, nge lôte lôt. Ve étome coronavirus, bobejañe ba kôñelane bekalate be nga bili ve ngon éla asu na be mane kôñelane beta étôkan ate.

 Bewofise ba wulu ésaé nkôñelane bekalate, a ba ba kuse biôme bia sili asu ékôane Yéhôva, be nga su’u beta ésaé ate angôndô. Bewofise ba wulu ésaé nkôñelane bekalate be nga yene na e ne mfi na bobejañe ba kôñelane bekalate be bi biôm biziñ bi ne ve be ésaé tyi’ibi, e dañe dañe benya bemicro. Ane bobejañe be be’e mbe’e ya kuse biôm asu ékôane Yéhôva be nga kuse bemicro 1000 a lôme be bevôme 200.

 Asu na te ba ndamane moné, bobejañe bete be nga kuse abui bemicro éyoñe jia a taté lôme bese vôme wua; mvuse ya valé, be nga ke ba kabe be asu na be lôme be bobejañe ba kôñelane bekalate si se. Mbôle bi nga kus abui bemicro nalé, be nga sé’é bia tañ, be nga kuane bia micro wua bebé dollar 170, moné nlôman atôm a too fe tañ éte éte. Be nji ye kuane bia be mbamba tañ nalé nge bi nji ye kus abui éyoñe jia.

 Bobejañ be mbe be yiane’e kuse biôm bite a lôme bie Ngone nyini a Ngone tane ya mbu 2020; ayaé ajô, amu valé ôkon ô nga’ane nseñ. Ve to’o nalé, éyoñe Ngone tane é kele’e man, bobejañe ya menda ba kôñelane bekalate, ba ya bebéthel, a ba ba kôñelane bekalate bevôm befe, be mbe be biya mam mese ma sili be.

 Jay Swinney a ne mojañ a tebele ésaé ya kuse biôm. A kate bia na: “Bewofise ya Béthel a bebo makit be nga kôme kui tyiñ. Nsisime Yéhôva étame ñwô ô nga volô na avale jam ete e boban, na bi kôme kui na bi lôm a kus biôm bia sili asu ésaé Yéhôva avale mbia biyoñ ete.”

 Nicholas Ahladis nye a saé Wofise wo wulu ésaé nkôñelane bekalate; a jô na: “Bi nga lebe bekôñelane bekalate be nji be ngule ya beta sulan a bôte bevok asu ésaé na be jeñe na be bi biôm bite. Jam ete e nga volô na ba be bekôñelane bekalate bevok be bo ngule ya kôñelane minkañete, bedrame, a bia minkobô a lôte 500.”

 Nyili a ne ve ésaé jia ya bi bi nga boban asu na bia be bobejañe ya si se bi bu’ubane beta étôkane ya mbu 2020: “Va’ane kom ése”! Mimveane mienan, mi mi nga bo a zene ya donate.pr418.com, nge ke a mezene mefe, mi nga volô na bi kuse biôme bise bi nga sili.