Anihánba furumiñeti wéiyaasu harihini gefentiña luagu Heowá ha lídanbaña sun ubóu adamurini wéiriti le lánina irumu 2020 lidan ligiaméme dan: lidan sedü-hati luma widü-hati. Lun gayara lan ladügǘniwa katei le, mosu meha lásügürawagüdün programa lánina adamurini ani gürawárua ligía lidan lóugiñe 500 iñeñein. Mégeiwabei hamuga aban irumu lun ladügǘn wadagimanu le. Keiti aba lan laburuchagun sandi le gíribei coronavirus, mosu buga hásügüragüdüni íbirigu programa lánina adamurini wéiriti irumu 2020 “Gunda humá súnwandan”! lidan kéiburi gádürü-hati.

 Ídehati Sétanu le Arihibei lau Agañeihani lidan sun Ubóu luma Departamentu lánina Lásügüragüdüniwa lidoun amu Iñeñein lidan óunwenbu dasi le. Rútiña ha eseriwidubaña lidan ásügüragüdüni lidan sun ubóu fe luagu megei hamá ásügüragüdütiña tulu lun gayara lan ladügǘniwa wadagimanu le, mikürófonutima le wéiriti lubuidun. Aba lubeiti ladügün Sétanu le Arihibei lau Agañeihani lidan sun Ubóu aransehani lun lagañeihóun 1,000 mikürófonu lun lounahóun lidoun 200 ámuñegueinarügü fulasu.

 Lun mibe lan seinsu agastarúti, agañeihóuati saragu mikürófonu lidan aban ani ounahóuati lidoun ligiaméme fulasu le ñein lubéi lapakühóua lun lounahóun lidoun ámuñegueinarügü fulasu ubouagu. Kei gibe lan agañeihóuti, ibihúati luagu kéiburi 170 dólarü kada aban lau sun lebegi lounahóun. Weinñein lídangiñe san dólarü areidúti.

 Agañeiha lumuti Sétanu le Arihibei lau Agañeihani mikürófonu burí le ani óunahalei lidan gádürü-hati luma seingü-hati irumu 2020, aban dan le ídanbei hénrengu lan lagañeihóuniwa ladüga laburuchagun sandi le. Lau sun lira, lidan lagumuchagüle seingü-hati, anuheinharu meha tulu burí tótima hemegeiruboun ásügüragüdütiña hama tidan tiibe-agei áfisi lánina ásügüragüdüni, sukursáli luma amu burí fulasu.

 Jay Swinney, íbiri le arihibei lau Sétanu le Arihibei lau Agañeihani lidan sun Ubóu, ariñagati: “Lidan sun dasi le, ídehaali ámuñegueinarügü departamentu le tídanbei Beteli hama ha úmagiñebei lagañeihóua. Lánirügüñein Heowá sífiri gayara ladügün lun lichugúniwa le hemegeirubei íbirigu houn lau lóufudagun ani maserunga”.

 Nicholas Ahladis, le nadagimeinbei lidan Departamentu lánina Lásügüragüdüniwa lidoun amu Iñeñein, ariñagati: “Gúndaatiña ásügüragüdütiña ha siñabei háfuridun hábiñegiñe lau heresibirunu iseri burí tulu to. Íbini siñá lan hóundaragun hama hapanaagu, ídehatiña lidan lásügürawagüdün luma gürawárua lan burí yanu, bidéu luma uremu lidan lóugiñe 500 iñeñein”.

 Wadagimanu le ligía ábanbei lídangiñe dasi le adügǘbei lun gayara lan ladügǘniwa adamurini wéiriti irumu 2020 “Gunda humá súnwandan”! houn sun íbirigu. Agañeihóuti umegeguni burí le seremei budagia le híchugubei sun huguya lídangiñe donate.pr418.com luma lidan amu burí igaburi.