Por primer vez, el maga hermano y hermana na entero mundo hay mira con el programa del asemblea de region na igual tiempo na Julio y Agosto 2020. Para queda este posible, el maga recording del programa necesita man translate na mas de 500 lengguaje. De antes, necesita un año o mas pa para plaña y completa con ese clase de proyecto. Pero por causa na coronavirus pandemic, el maga translator quien hay man translate con el 2020 “Pirmi Queda Alegre”! Asemblea de Region tiene ya lang mas de tres meses para hace acaba con el trabajo.

 El Translation Services y Global Purchasing na World Headquarters del maga Testigo de Jehova ya asisti na este bien grande proyecto. Asegun na Translation Services, manada maga translation team el necesita maga equipment para completa con este trabajo, especialmente maga de calidad microphone. Ya ayuda el Global Purchasing para puede cumpra 1,000 microphone y man deliver con ese na cerca 200 locacion.

 Para menora el gasto, bultu ya cumpra con el maga microphone, yan deliver con ese na un lugar y yan repack para imbia con ese na diferente locacion na entero mundo. Por medio de ese, el cada microphone ta cae ya lang na $170 U.S., incluido el shipping—mas barato se compara si cumpra kita con ese uno-uno.

 El Global Purchasing necesita cumpra y imbia con ese na Abril y Mayo 2020—tiempo que limitao ya lang el trabajo del manada negocio por causa na pandemia. Maskin pa ansina, na fin del Mayo, mayoria del maga remote translation office, branch office y otro maga locacion que donde tiene ta hace translation ya puede ricibi el necesita equipment.

 “Tiene cooperacion entre na maga departamento na Bethel y maga negocio hasta acaba este proyecto,” ya habla si Jay Swinney, quien ta mira con el Global Purchasing. “Ya puede kita se hace pronto y ya puede usa enbuenamente con el maga donacion para ayuda con el diaton maga hermano por causa na sagrao espiritu de Jehova.”

 Si Nicholas Ahladis, quien ta trabaja na Translation Services, ya habla: “Ya puede gayot anima con el maga translator cuando ya puede sila ricibi con este maga equipment maskin pa na lockdown sila. El cuanto del maga translator gendeh junto con el otro maga miembro del diila translation team pero ya puede sila trabaja enbuenamente para man translate y man record con el maga talk, drama y cancion na mas de 500 lengguaje.”

 Este amo uno na manada proyecto que ya puede hace para produci con el 2020 “Pirmi Queda Alegre”! Asemblea de Region para na diaton maga hermano y hermana na entero mundo. El de ustedes donacion por medio na donate.pr418.com y otro pa manera, ya hace posible para puede cumpra con este maga necesita equipment.