2020, July le August thla chungah a voikhatnak in vawleicung pumpi i unau pawl nih pengkomh civui program kha caankhat te ah an zoh lai. Cutin zoh khawh awkah program awkhumhmi kha holh 500 leng in leh a hau. Phungchimnak le video pawl holh leh awk le awkhumh awkah kumkhat asiloah mah nak tam a rau tawn. Asinain coronavirus pul rai ruangah holhlettu hna nih 2020 “I Lawm Zungzal Ko U” Pengkomh Civui kha thla li hlanah an liim a hau.

 Jehovah Tehte Hna i Vawleicung Pumpi Zungpi ah a ummi Holhlehnak Department le Thil Cawknak Department nih mah a ngan tukmi project kha an bawmh. Holhlettu phu tampi nih mah rian liimnak caah thilri tampi, a hleiin microphone a ṭha phun ti bantuk an herh ti kha Holhlehnak Department nih an hngalh. Thil Cawknak Department nih microphone 1,000 kha an cawk i hmun 200 hrawngah an kuat.

 Tangka a tlo deuh nakhnga microphone kha tampi in an cawk i hmunkhat ah an kuat, mah hnuah vawleicung pumpi i holhlettu pawl sinah an kuat ṭhan. Microphone kha voikhat ah tampi in an cawk caah kuatnak man i telin pakhat ah buaktlak $170 an pek, cucaah a man cu zatuak 20 leng in a fawi deuh.

 Thil Cawknak Department nih 2020, April le May thla chungah mah thilri pawl cawknak le kuatnak kha an timhtuah. Mah cu pul rai ruangah chawlehnak tampi nih an rian voidang tlukin an ṭuan lo caan kha a si. Asinain May thla dih hrawng ahcun lam hla ah a ummi holhlehnak zung, zung ṭengnge le a dang holhlehnak hmun hna nih a herhmi thilri pawl kha an hmuh cang.

 Thil Cawknak Department a tlangtlatu Jay Swinney nih “Bethel department pawl le mah project ah aa telmi unau dang cu hmunkhat ah ṭha tein rian an ṭuanṭi” tiah a ti. “Cutin khulrang in rian kan ṭuan khawhmi le unau pawl pekmi thawhlawm kha a ṭha bikmi lam in hman a simi cu Jehovah thiang thlarau thawngin a si.”

 Holhlehnak Department ah a ṭuanmi Nicholas Ahladis nih hitin a ti: “Holhlettu pawl nih lockdown lioah mah thilri pawl an hmuhmi cu bawmtu taktak a si. Anmahle holhlehnak team he a dang tein a ummi hna zong nih phungchimnak, drama le hla hna kha holh phun 500 lengin hmunkhat ah holh an leh khawh i aw an i khumh kho.”

 Vawleicung pumpi i unau pawl caah tuahmi 2020 “I Lawm Zungzal Ko U” Pengkomh Civui tlamtling tein chuahnak ah mah project hi aa tel ve. Donate.pr418.com ah le lam dangdang in siang ngaiin nan pekmi thawhlawm cu a herhmi thilri pawl cawknak ah hman a si.