Jeowa ʉ̃rʉ Kʼawuabipanʉrã naʉ̃ drʉa jõmaʉ̃nebemaba kʼãwũã odakata, akʉdayi asamblea regional julio akʉza agosto 2020de jõmaʉ̃ba iyabaʉ ewaride. Naʉ̃ asamblea kʼãwũã odaira tradusidaibarabasi 500 bedʼea awuara awuaraka audre, naʉ̃ asamblea tradusira poaga abaʉde ʉ̃ta opanʉ mamina naʉ̃ koronabiru kʼarea asamblea 2020 «Ewari Jõmaʉ̃nẽ Sobiapanaidua» asamblea tradusi panʉraba osida jedeko kimarene eda.

 Mebẽrã tradusi panʉraba akʉza betelde ne eda panʉraba kʼarebasida naʉ̃ trajo oita, mebẽrã tradusi panʉrabara kʼawuasida nesidapanʉta micrófono biata naʉ̃ trajo oira mebẽrã betelde ne edabariabara maʉ̃ kʼarea edasida 1.000 micrófono maʉ̃ta drʉade 200 bʉra mebẽrãra za zokʼabʉesida plata mejãcha gasta ẽ baita, mejãcha edasida mõbe jʉrʉsida naʉ̃ drʉade ẽzadrabʉma zokʼadaita mamaʉ̃ba wuabemarama dedekʼadaita. Mejãcha edasida baera micrófono aba abaka balesi $ 643.000 jõma yi zokʼa bʉeyeda, mawũã plata mejãcha aduada ẽ basi.

 Betelde ne edabarirabara edasi naʉ̃ra abril akʉza mayode, naʉ̃ drʉa jõmaʉ̃nẽ nenedobarira ewada ẽ basi koronabiru kʼarea mawũã berabarisimina mayo jõboadoare yi tradusi panʉrabara ãyi nesidapanʉ jõma erpanasi.

 Betelde ne edabari akʉbariba, Jay Swinneyba jarasi: «Ne nedobarirata akʉza betelde ne eda bariʉ̃me yibia bedʼeapanʉ, Jeowa jaure zareaba kʼarebabʉ mebẽrãba nesidabʉ erbaita akʉza plata mejãcha gasta ẽ baita».

 Nicholas Ahladisba tradusione trajabʉba jarasi: «Yi mebẽrã tradusi panʉrãra yi ãĩ wãbedabe ẽãra mejãcha sobiasida ãya nesidabʉta diasida baera naʉ̃ba kʼarebaibasi baera grabaita, trãbita, videota, pelikulata akʉza diskursota bedʼea 500 awuara awuaraka mebẽrã tradusi panʉbawara babe ẽ basimina».

 Naʉ̃ asamblea oira nekʼãrẽ mejãcha okʉaibarabasi maʉ̃ microfono edaita naʉ̃ jõma edasida maraba soiduba diasida baera platata donate.pr418.com.