Ka nged’a boso, mbia masu ma bonasango ba wase ńe̱se̱ mu me̱nde̱ jombwa jako̱to̱ne̱ dinde̱ne̱ o mulemlem ma ponda, o myo̱di ma Madibe̱dibe̱ na Dingindi 2020. Ná nika e we̱le̱ bolane̱, e ta e pula ná bekwali ba jako̱to̱ne̱ be po̱ngo̱be̱ ka sinima na tukwabe̱ pe̱ o buka 500 ba leme̱. O ponda ni te̱nge̱n, ye ná e pula mbu mō̱ to̱ buka nika o te̱se̱ ni ńai ebolo na bo̱le̱ pe̱ mo̱. Nde ońola mitakisan diboa la coronavirus di wanno̱, batukwedi ba Jako̱to̱ne̱ Dinde̱ne̱ la 2020 “Bwa muńe̱nge̱ ponda ye̱se̱”! ba si ta to̱ ba diane̱ myo̱di mine̱i o bo̱le̱ y’ebolo.

 O̱fis ni masue̱le̱ batukwedi na o̱fis ni mombweye̱ janda la masango o wase ńe̱se̱ o Mulopo m’ebolo ma Mboṅ a Yehova i sue̱le̱ yen ebolo ende̱ne̱. o̱fis ni masue̱le̱ batukwedi ńe̱n ná mabe̱le̱ ma betukwedi jita ma be̱n ńo̱ng’a belongisan ba mbata o bola y’ebolo, sepo̱n bekase̱ doi ba ngińa. o̱fis ni mombweye̱ janda la masango o wase ńe̱se̱ ńandi 1 000 bekase̱ doi, e loma mo̱ o lambo ka 200 bepolo.

 O bwam ba bolane̱ mo̱ni bwam, bekase̱ doi bandabe̱ nde nduta po̱, be lomabe̱ o wuma iwo̱ ya mom, nde be kakabe̱ pe̱te̱ mabomba denge̱ be mababe̱ o matongo mane̱i ma wase ńe̱se̱. Di janda la mo̱ nduta po̱, longwane̱ ná mususedi ma ekase̱ doi ewo̱ mu be̱ 170 dollar (85 000 franki), janda na loma​—nik’e sibise̱ mususedi 20 ma ngedi omo̱ń ebwea kobisan na nje e wusa busisabe̱.

 O̱fis ni mombweye̱ janda la masango o wase ńe̱se̱ ńandi nde din sango na loma pe̱ mo̱ o myo̱di ma Dibaba na Emiase̱le̱ 2020​—ponda ńena sapi jita i si tano̱ i we̱le̱ jandise̱ ońola diboa la coronavirus. To̱ na nika, la su la mo̱di ma Emiase̱le̱, dongo dinde̱ne̱ la o̱fis a betukwedi, Bete̱l, na bene̱ bepolo ba betukwedi bepe̱pe̱ be ta be mákusa be belongisan.

 Jay Swinney ńe mombwed’a o̱fis ni mombweye̱ janda la masango o wase ńe̱se̱ mo̱ ná: “So̱ṅtane̱le̱ la bwam di ta oteten a o̱fis a Bete̱l na bandise̱ masango o ponda ńe̱se̱ yen ebolo e bolabe̱no̱. To̱ná biso̱ be̱se̱ di latino̱ miwe̱n masu, mudī ma Yehova buka te̱ nde mongwane̱ ná di pomane̱ bola nika na o mususedi mu sibi.”

 Nicholas Ahladis, ńe o o̱fis ni masue̱le̱ batukwedi mo̱ ná: “Batukwedi bena ba ta nde ba dibangane̱ o ndabo o ni ponda ba bo muńe̱nge̱ jita o kusa be belongisan. To̱ná ba tano̱ etum na bane̱ batukwedi ba dibe̱le̱ labu, ba we̱li bola ebolo bwam mwemba o tukwa na no̱ngo̱ pe̱ madoi ma bekwali, sinima, na myenge o buka 500 leme̱.”

 Yen ebolo ye nde ewo̱ oteten a jita bena be bolabe̱ ná bonasango o wase ńe̱se̱ ba we̱le̱ be̱ne̱ Jako̱to̱ne̱ Dinde̱ne̱ la 2020 “Bwa muńe̱nge̱ ponda ye̱se̱”! Tongwea na mabea ma wonja lo mabolano̱ o donate.pr418.com na mambo mape̱pe̱ nde ben belongisan be we̱lino̱ jandabe̱.