Saan 2020, zuwekalo ani utikalo la, balimaw bɛɛ bena tile saba lajɛnba ka porogramu filɛ duniɲa kuru bɛɛ kɔnɔ, wagati kelen na. O ɲɔgɔn tun ma deli ka kɛ fɔlɔ la. Walisa o ka se ka kɛ, fɔɔ o kalanw anrezistreman tun ka kɛ ani o kɔ, ka bayɛlɛma kaan 500 ni kɔ bɛɛ la. Koow sira fɛ, o baara ɲɔgɔn be mɛɛn saan kelen wala saan kelen ni kɔ. Nka Coronavirus banna kosɔn, wagati min tun be bayɛlɛmabagaw bolo k’o baara bɛɛ kɛ k’a dafa, o yɛrɛ tun tɛ se kalo naani ma.

 Biro minw be bayɛlɛmani koo ɲɛnabɔ ani biro min be sannikow ɲɛnabɔ an ka sigiyɔrɔsoba la, olu ye dɛmɛ don o baaraba la. Biro minw be bayɛlɛmani koo ɲɛnabɔ, u y’a kɔrɔsi ko bayɛlɛmabagaw jɛnkulu caaman mako tun bena kɛ baarakɛminan dɔw la walisa k’o baara kɛ, i n’a fɔ mikro ɲumanmanw. Biro min be sannikow ɲɛnabɔ an ka sigiyɔrɔsoba la, olu ye labɛnw kɛ walisa ka mikro 1000 bɛɛ san ani k’u ci yɔrɔ 200 ɲɔgɔn na.

 Walisa ka dɔ bɔ musakaw la, u ye mikro caaman san en gros la. O kɔ, u ye u ci bayɛlɛmabagaw jɛnkuluw ma duniɲa kuru bɛɛ kɔnɔ. O cogo la, mikro deen kelen sansɔngɔ n’a cisɔngɔ bɛnna dolari 170 ɲɔgɔn ma (dɔrɔmɛ 95000 FCFA ɲɔgɔn). N’o mikrow tun sanna kelen kelen, u deen kelen sɔngɔ tun bena tɛmɛ dɔrɔmɛ 113000 kan.

 Biro min be sannikow ɲɛnabɔ an ka sigiyɔrɔsoba la, olu tun ka kan k’o minanw san ani k’u ci saan 2020 awirilikalo ani mɛkalo la. O wagati la, feerelikɛla caaman tun tɛ baara kɛ ten coronavirus fɔɲɔbana kosɔn. O n’a ta bɛɛ, bayɛlɛmani birow, Betɛliw ani bayɛlɛmani be kɛ yɔrɔ wɛrɛ minw na, u fanba y’o baarakɛminanw sɔrɔ yanni mɛkalo ka sa.

 Biro min be sannikow ɲɛnabɔ duniɲa kuru bɛɛ kɔnɔ, balimacɛ Jay Swinney ye o kɔrɔsibaga ye. Ale y’a fɔ ko: “Betɛli ka birow ni feerelikɛlaw ye baara kɛ ɲɔgɔn fɛ koɲuman walisa o ka se ka kɛ. Jehova ka hakili senu dɔrɔn lo barika la o sera ka kɛ ani an sera k’o minanw ci joona joona ani sɔngɔ nɔgɔman na walisa ka dɛmɛ don Ala ka Masaya ka baaraw la.”

 Nicholas Ahladis, be baara kɛ ni bayɛlɛmani birow ye. Ale ko: “Bayɛlɛmabaga minw tun be confinement na o tuma na, olu ninsɔndiyara kosɔbɛ k’o minanw sɔrɔ. Confinement kosɔn, hali n’u tun tɛ se ka ɲɔgɔn sɔrɔ ni bayɛlɛmani jɛnkulu mɔgɔ tɔɔw ye, u sera ka baara kɛ ɲɔgɔn fɛ bɛrɛbɛrɛ walisa ka kalanw, dramuw ani dɔnkiliw bayɛlɛma kaan 500 ni kɔ bɛɛ la.”

 Baara caaman minw kɛra walisa ka saan 2020 ka tile saba lajɛnba labila balimaw ye duniɲa kuru bɛɛ kɔnɔ, an ye u la kelen dɔrɔn lo ɲɛfɔ aw ye. Aw y’aw tɛgɛ labila ka nili minw kɛ donate.pr418.com sababu fɛ ani fɛɛrɛ wɛrɛw sababu fɛ, o lo y’a to an sera ka minan dɔw san walisa k’o baara kɛ.