Ðò juillet kpo août kpo xwè 2020 tɔn mɛ ɔ, azɔn nukɔntɔn ɔ ɖíe kplékplé nɔví lɛ tɔn na kpɔ́n tuto kpléɖókpɔ́ ɖaxó ɔ tɔn ɖò táan ɖokpo ɔ mɛ é. Bo na dó kpé enɛ wu ɔ, é byɔ ɖɔ è ni lilɛ tuto ɔ e è ko yí dó kan jí é dó gbè 500 jɛji mɛ. Ðò kpaa mɛ ɔ, cobonu è na bló azɔ̌ mɔ̌hun ɖé sín tuto bo lɛ́ fó bǐ ɔ, é nɔ byɔ xwè ɖokpo, alǒ hú mɔ̌. Amɔ̌, jɛmɛji coronavirus ɔ zɔ́n bɔ táan e nɔví e ɖó na lilɛ Kpléɖókpɔ́ Ðaxó 2020 Tɔn “Jɛ Awǎ Hwebǐnu”! ɔ dó gbè ɖevo mɛ lɛ é ɖó é sɔ́ yì sun ɛnɛ ǎ.

 Azɔ̌xɔsa Lilɛdógbeɖevomɛ tɔn kpo Azɔ̌xɔsa Axixwixwlé tɔn kpo e ɖò Hɔ̌nkan Gbɛ̀ ɔ tɔn mǐtɔn é d’alɔ bɔ è wà azɔ̌ kpligidi enɛ. Azɔ̌xɔsa Lilɛdógbeɖevomɛ tɔn ɖ’ayi wu ɖɔ gbɛ̌ta lilɛdógbeɖevomɛ tɔn gegě ɖó hudo azɔ̌wanú tɔn gɔ́ na, bo na dó sixu wà azɔ̌ enɛ, taji ɔ, miklo agbɔ̌nnɔ lɛ. Azɔ̌xɔsa Axixwixwlé tɔn ɔ bló tuto bo xɔ miklo 1 000, lobo má gbɔn fí 200 mɔ̌.

 Bonu è ma na hɛn akwɛ gú ǎ ɔ, è xɔ miklo lɛ kpɔ́ji tɔn, bo yí bǐ ɖò fí ɖokpo ɔ, bɔ enɛ gudo ɔ, è wá sɛ́ ye dó lilɛdógbeɖevomɛtɔ́ lɛ. Xɔ e mǐ xɔ miklo lɛ ɖó kpɔ́ji é zɔ́n bɔ, nú è lɛ́n xixɔkwɛ kpo agbanbíbɛ́kwɛ kpo ɖó kpɔ́ ɔ, miklo ɖokpo na nyí ɖɔ̌la Amɛlika tɔn 170 mɔ̌. Enɛ kpɔ tawun hugǎn ɖokpo ɖokpo tɔn xixɔ.

 Azɔ̌xɔsa Axixwixwlé tɔn ɔ ɖó na xɔ miklo enɛ lɛ bo lɛ́ sɛ́ dó ɖò sun avril kpo mai kpo 2020 tɔn mɛ. È ka ko ɖó dogbó nú nǔ ɖěɖee kúnkplá ajɔ̌xó lɛ é gegě ɖò táan enɛ mɛ, ɖó jɛmɛji ɔ wu. Nǔ ɖò mɔ̌ có, kaka jɛ sun mai tɔn sín fifó ɔ, azɔ̌xɔsa lilɛdógbeɖevomɛ tɔn lɛ, alaxɔ lɛ kpo fí ɖevo e è nɔ wà lilɛdógbeɖevomɛzɔ́ ɖè lɛ é kpo gegě ko mɔ azɔ̌wanú e sín hudo ye ɖó lɛ é.

 Jay Swinney e nɔ kpé nukún dó Azɔ̌xɔsa Axixwixwlé tɔn wu ɖò hɔ̌nkan gbɛ̀ ɔ tɔn mǐtɔn é ɖɔ: “Azɔ̌xɔsa Betɛli tɔn lɛ kpo ajɔ̌tɔ́ vovo ɖěɖee miklo enɛ lɛ xixɔ kan lɛ é kpo w’azɔ̌ alɔ ɖ’alɔ mɛ. Gbigbɔ Jehovah tɔn wɛ zɔ́n bɔ mǐ yawǔ w’azɔ̌ enɛ bo lɛ́ zán nǔnina lɛ ganji dó d’alɔ nɔví sunnu kpo nɔví nyɔnu kpo mǐtɔn lɛ.”

 Nicholas Ahladis ee nɔ w’azɔ̌ ɖò Azɔ̌xɔsa Lilɛdógbeɖevomɛ tɔn ɖò hɔ̌nkan gbɛ̀ ɔ tɔn mǐtɔn é ɖɔ: “Hwenu e lilɛdógbeɖevomɛtɔ́ ee cí xɔ mɛ bo ma sɔ́ nɔ sɛ̀ tɛn ǎ lɛ é mɔ azɔ̌wanú enɛ lɛ é ɔ, é dó wusyɛn lanmɛ nú ye tawun. Ye ɖò zɔ dó yeɖée lɛ có, ye ka kpéwú bo w’azɔ̌ ɖó kpɔ́ ganji bo lilɛ nǔ lɛ dó gbè ɖevo mɛ, lobo yí xóɖiɖɔ lɛ, nǔkpinkplɔn-dó-kplɔ́n-nǔ lɛ kpo han lɛ kpo dó kan jí dó gbè 500 jɛji mɛ.”

 Azɔ̌ enɛ nyí ɖokpo ɖò azɔ̌ tobutobu e è wà dó sɔnǔ nú Kpléɖókpɔ́ Ðaxó 2020 tɔn “Jɛ Awǎ Hwebǐnu”! ɔ nú kplékplé nɔví lɛ tɔn e gbɔn gbɛ̀ ɔ bǐ mɛ é mɛ. Nǔ ɖěɖee a hun alɔ dó na gbɔn donate.pr418.com kpo wlɛnwín ɖevo lɛ kpo gblamɛ lɛ é zɔ́n bɔ è xɔ dandannú enɛ lɛ.