Al axéʼ xi támub an ólchixchik kʼal a Jehová, neʼets kin tsuʼuw an púlik tamkuntaláb regional axi ti 2020 ti internet: al an ítsʼ ti julio ani agosto. Abal patal an epchalchik tin puwél an tsabál kin exbaychik, koʼoy ki wilkʼaʼ al watʼadh 500 i kawintaláb. Abal ka tʼajan axéʼ xi tʼojlab, in yéjenchal watʼadh jun i támub. Kom kʼwájatak an coronavirus, an epchalchik axi u wilkʼom koʼoy kin tʼajaʼ axéʼ xi tʼojláb al utat tseʼ a ítsʼ.

 An epchalchik axi ban Departamento Mundial de Compras ani an departamento de Traducción axi ban central mundial koʼoychik ka tʼójon junax abal kin tʼajaʼ axéʼ xi tʼojláb. An epchalchik axi in okʼnál an Traducción, in tʼajaʼchik ti kwéntaj abal yab in kwaʼalak jawaʼ in yéjenchal abal kin tʼajaʼ axéʼ xi tʼojláb, jantʼoj lej yejentál pel an micrófonos abal ka tʼajan an grabación. An Departamento Mundial de Compras in tsʼaʼiy 1.000 i micrófonos ani in abaʼ al 200 i bichow tin puwél an tsabál.

 Ani tsʼaʼiyat yan, kom antsanáʼ u kalel más tsaʼat. Talchik i epchal in batsʼuw axéʼchik xi micrófonos ani in tʼojojoy abal kin búkʼuw kʼal an epchalchik axi in yéjenchal. Kom in tsʼaʼiychik yan i micrófono, ti junchik kalej 3,430 peso, jaxtám yab in lej pákuwchik yan i tumín.

 Ban ítsʼ ti abril ani mayo ti 2020. An Departamento Mundial de Compras in tsʼaʼiychik axéʼ xi micrófonos ani in abaʼ, bélits abal wéʼ kʼibatak kin tʼajaʼ axéʼ tʼojláb kom u kʼwájatak ban pandemia. Tin taltalits a mayo, an oficinas remotas de traducción ani sucursales in kwaʼalakits jantʼoj kin éyendhaʼ abal kin tʼajaʼ an grabaciones.

 Jay Swinney, axi u tólmix ban Departamento Mundial de Compras, in ulal: «An Departamentos de Betel ani an nújulchik in ejtowámal ka tʼójon lej alwaʼ. Expidh kʼal in tólmixtal a Jehová i ejtowámal ki éyendhaʼ alwaʼ an tumín ani ki tʼajaʼ dhubat an tʼojláb».

 Nicholas Ahladis, axi u tʼojnal ti Traducción, in ulal: «An epchalchik axi u wilkʼom kʼwájatak mápupudh. Lej kulbéj tam tin batsʼuwchik jawaʼ in yéjenchal abal kin tʼajaʼ axéʼ xi tʼojláb. Antsanáʼ in éjtow ti tólmix ti wilkʼom ani kin tʼajaʼ i grabación abal i videos, tʼilomtaláb ani i son, al watʼadh 500 i kawintaláb».

 Antsanáʼ ti tʼajan an tʼojlab abal an púlik tamkuntaláb regional ti 2020 «¡Etsʼey kit kulbejchik» abal patal an epchalchik axi tin puwél an tsabál. Ani patal axéʼ i éjtowal ki tsʼaʼiy ani ki tʼajaʼ kom tatáʼchik a binámal an donaciones kʼal patal a ichích donate.pr418.com ani ti tamkuntaláb.